Kiên Giang bahrau peih bruk pok angan “amaik Việt Nam Anh hùng” ka 54 amaik metai blaoh

Hội đồng palih ruah pakat negar njauk hatai song panuac likau di Uỷ ban palih ruah tỉnh Khánh Hòa ka bruk peih pilih ruah njauk harei 23/5/2021 ka dom labik plaik phiếu di palao Trường Sa Lớn, di ban Trường Sa. Dom labik plaik phiếu dok veik di ban Trường Sa song 2 xã đảo Sinh Tồn, Song Tử Tây peih bruk plaik phiếu dalam harei 16/5/2021, avar jang 7 harei dut song harei palih ruah pakat negar. Hu thau, huyện Trường Sa hu 48 urang hu tabiak mbaok piah pilih ruah ka HĐND pakat huyện song 72 urang piah pilih ruah ka HĐND pakat xã.

Anak bruk jit ruak Covid-19 daok rah tabiak dalam kan kandah, Mentri Pato megru iew dom tỉnh, ban, labik pato megru brei padang jalan peih bruk pakacah THPT thun 2021 dalam tuk hu jit ruak, tuk halei jeng caga jalan salih tapa pato bac online meyah jit tamuh tabiak gilac veik. Mentri jeng hu panuac ieu paglaong bruk pasang iek, taong yaom tui jalan pakhang bruk pandar ilamu bac da-a di anek saih, urang bac; taong yaom njauk prein bac di anek saih; pakauk bruk pato pataom, pato jaik, cakak klak danak dak.

Kiên Giang bahrau peih bruk pok angan “amaik Việt Nam Anh hùng” ka 54 amaik metai blaoh song alin hadiah Huân chương Độc lập ka 22 boh sang hu rilo liệt sĩ song tok hu sa anek bo lac liệt sĩ. Kuhria tal urak ni, tỉnh Kiên Giang hu 1.744 amaik hu karja brei angan lac “Amaik Việt Nam Anh hùng”, 65 boh sang hu liệt sĩ hu pok brei Huân chương Độc lập. Min, urak ni dom amaik dok duik biak takik.

Tatua Nguyễn Thái Học, ban sit Long Xuyên, tỉnh An Giang hu yaom phun jien buh tame ngak abih tih 200 tỷ đồng birau ngak salah saong brei radaih peih tapa hadei di 2 thun padang ngak. Phaok akok negar Võ Thị Ánh Xuân mai hu mbaok. Ini lac danak dak praong di tỉnh An Giang, hu buh jien tame ngak piah ba mbuan lagaih ka bruk nao mai meng pasak hành chính di tỉnh pambuak saong labik hành chính Ban Long Xuyên.

Mik va urang nong tỉnh Bà Rịa - Vũng Tàu dok yam tame yuak bilan đông xuân thun 2020 - 2021. Meng hu langik tasik siam lagaih, nan ye padai đông xuân thun ni tagok glong. Tui Hợp tác xã ngak nong song Dịch vụ An Nhứt, meda mek hu 7- 8 tấn sa ha, glong jang vụ thun bloh meng 600 - 800 kg sa ha. Urak ni yaom padai pablei hu yaom meng 5.700 - 6.000 đồng sa kg, laba labaih 50 triệu đồng/sa ha.

Rajaei Nhật Bản khan lac hu brei tapa blaoh jalan peih ngak paok jien daong oh bayar veik drah samar yaom 4 tỷ 200 treiu yen sumu 39 trieu USD piah daong padang ngak mac jamraih pajeng ba vaccine di nhiệt độ la-ar mai labik klauk jru ka dom taneh ia daok cak rok patagok. Taduan paok jien daong mbang ini lac hu 31 taneh ia di bhum Trung Mỹ, Nam Mỹ saong châu Phi. Bilan 3, Nhật Bản jeng brei paoak jien daong dreih yau nan yaom 4 tỷ 5 rituh triệu yen ka 25 taneh ia bhum châu Á, dalam nan hu 10 taneh ia ASEAN, 5 taneh ia Tây Nam Á saong 10 taneh ia pulao tasik Thái Bình Dương.

Bruk klauk Covid-19 di Bra-xin dok mbuan si jaleih tuk dom urang njom song metai di negar ni dok tagok glong, dalam tuk rilo bhap bini bahrau hu klauk sa mbang vắc-xin. Tui mintri Y tế Bra-xin, vắc-xin Covid-19 bo negar ni taduan hu kuhria tal harei ini bahrau hu 73 triệu mbang, trun jiak 30% dut song tui kuhria. Bruk ni hu mong lac kayua urang pabak vắc-xin suai damuai dalam bruk jao jru song dom janih vắc-xin dalam negar dok cang brei adat pandar. Bra-xin urak ni lac negar hu urang metai kayua Covid-19 glong di abih dang ka 2 di dunya hu jiak 400 ribau urang.

Quốc hội Trung Quốc bahrau brei tapa “hukum pacang palai pajoa pandap mbang”. Hukum ini piah khik ginup gah pabak pandap mbang tani tanat ka labaih 1 tỷ 4 rituh trieu bhap bini, pacang veik dom bruk mbang manyum palai pajoa yau daok kandong veik meng lavik mai dalam bruk mbang huak daok dang di negar ni. Tui nan, dom nhà hàng pato tacei oh njauk ngak ka tuai ieu pandap mbang labaih, njauk taong phat tal 36 triệu đồng. Urang pablei salih ngak pandap mbang ngak palai pajoa biak trak meda njauk taong phat glaong abih lac 180 triệu đồng. Abih di nyu nan lac, bruk ngak tabiak, papar dom danak dak video yaih khan bruk mbang manyum palai pajoa meda njauk taong phat glaong abih tal 360 triệu đồng.

Urang lang: Ái Nghiêm – Hani Pha – 03/05