Ong Phan Văn Mãi - Phó bí thư thường trực Thành ủy TP.HCM – brei thau, tapa mek mẫu dut iek labaih 100.000 anek saih pakacah saong urang ngak bruk di mbang pakacah tamat THPT thun ni hu 18 mẫu pagam gauk mboh dương tính haong COVID-19. Peih bruk langyah, gah y te brei thau lac hu 12 urang dương tính meng dut iek tui jalan RT-PCR. Urak ni dom urang ni hu brei daok karei tui adat. Tui ong Mãi, langiu di dom mẫu dut iek mboh duong tinh nan, dom mẫu karei daok hu pasang iek saong dom urang njom ini ka oh lac puac abih. Tal tukvak ni bruk pakacah tamat THPT mbang ka 1 jeng daok hu peih tabiak di harei 7 saong 8-7. Min, iek tui bruk bo hu dom jalan salih karei ka nyu lagaih.

  Tui panuac caong di dom tỉnh ban, mintri jalan mbak pajeng ba njauk hatai brei padeih dom mbang par pajeng tuai meng mblang kapan haoh Tân Sơn Nhất tal dom mblang kapan haoh Thọ Xuân (Thanh Hóa); Vân Đồn (Quảng Ninh), Cát Bi (Hải Phòng), Pleiku (Gia Lai), Đồng Hới (Quảng Bình), Vinh (Nghệ An), Chu Lai (Quảng Nam), Phú Bài (Thừa Thiên Huế) , Côn Đảo ( BR-VT)  piah pacang caga jit COVID-19.  Urak in, mblang kapan haoh  Tân Sơn Nhất tok dok hu 40 - 60 mbang par dalam negar yaok harei. Dalam tuk tame bilan ni yaok thun, yaok harei Tân Sơn Nhất hu meng 350 - 400 mbang par dalam negar.

Darak đầu mối Bình Điền, TP HCM brei padeih bruk pataom ba pandap tame meng maong 8 harei 6/7 tal tuk halei mboh khik hu bruk pacang caga jit. UBND Quận 8 brei thau, di darak đầu mối Bình Điền hu rilo urang dương tính saong ngak njom pambak tal dom quận huyện, dom tinh, bal jaik taphia.

Harei  5-7, di dom sang iek ruak Quân dân y gah timun, sang eik ruak ban Thủ Đức, sang iek ruak  Lê Văn Thịnh (ban  Thủ Đức)… yaok ribau menuac urang ba gauk nao dut iek COVID-19. Urang nao dut iek rilo meng lac urang peih radaih, urang ngak bruk di ban raya HCM min sang dok di ban Dĩ An (Bình Dương) atau Đồng Nai…Min, kayua urang nao dut iek biak rilo, di rilo sang iek ruak rah tabiak bruk jeik gauk, oh khik hu bruk paatah di gauk … mesup ni  pasak pasang iek ruak kik  ban raya HCM (HCDC) brei thau, urak ni  pren dut iek samar di ban raya meda mek hu 150.000 - 200.000 urang dalam sa harei. Gam haong nan, gah y tế jeng hu pambuak bruk song gah truyền thông roh duah peih bruk brei  mã QR Code ka dom urang hu  kết quả dut iek, daong palagaih dalam tuk bhap bini tame tabiak ban raya atau nao tal dom labik dalam ban raya.

Harei ni (6/7) dom kapuk duah urang lahik di thuỷ điện Rào Trăng 3 tỉnh Thừa Thiên Huế hu pataom radaih, manuac piah duah di labik ka 2 saong caga nao duah di bãi bồi ka 3. Dahlau di nan, harei 2/7, hu duah mboh rilo pandap panda pandar yaok harei di dom urang njauk bala lahik yau ye: khar aw, takhaok, radaih njauk lam trun di bãi bồi ka 1. Bãi bồi ka 2 hu patau randaih biak rilo nan ye bruk  duah gaok rilo kan kandah. Tal urak ni, dalam 17 urang labik, bahrau duah mboh  6 rup tau di urang metai.

Jabat  y tế  Australia harei kabroi tabiak panuac brei thau, labaih  600 urang y tế di  2 sang iek ruak prong di ban Sydney brei dok karei kayua taom gaok hong urang njom Covid-19, ngak ka bruk y tế negar ni laik tame “pathau khan meriak”. Urak ni dom sang iek ruak di karja di Australia  dok dalam bruk “pathau khan meriak”, patakik urang tame tabiak piah iek ruak, iek glang ka urang ruak, taom gaok gauk gar ruak trak jaik metai, atau hu harak sinya klauk vaccine.

Jabat y tế Ấn Độ bahrau ni hu duah mboh sa bruk biak kan kandah pambuak tal talang, di dom urang bhian njom Covid-19. Gah y tế Mum-bai, Ấn Độ brei thau, tal urak ni urang hu mboh takik di nyu lac 19 urang njom ruak matai tế bào talang atau daok ieu lac ruak “hoại tử vô mạch”. Bruk dreih yau gauk di dom urang ruak ni lac dom urang nan thei jeng bhian njom Covid-19 dahlau nan. Tui pathau khan di y te brei mboh cambaih laih, abih tih dom urang ruak ala 40 thun, daok hu taong ruak di sang iek ruak di pak ni saong mboh dom triệu chứng 2 bilan hadei di tuk thit ruak Covid-19. Urang ilamu y tế kakei lac, meda hu rilo urang njom ruak ni tamuh tabiak dalam dom bilan anak tal. Ruak matai tế bào talang meda hu thit ruak saong oh cang blac raih mayah mboh ruak tuk aval.

  Adit blaoh, bruk dom kapul lin Mỹ tabiak truh căn cứ không quân Bagram (Pasak quyền lực song tacei ba bruk quân sự di Mỹ  di Apganixtan) brei mboh bruk padeih hu mbaok di bol bala  Mỹ di negar Nam Á ni. Bruk  Mỹ khang hatai ba lin tabiak truh, yaom lac Taliban meblah mek rilo labik ngak brei urang mboh duh hatai ka bruk  an ninh di Apganixtan. Dalam luac 20 thun, hu labaih 800 ribau lin Mỹ hu mbaok di Afghanistan, labaih  2.400 lin Mỹ metai, labaih 200 ribau urang njauk rambuac. Abih tih pok jien ka bruk  quân sự kayua mintriQuốc phòng Mỹ kuhria mboh ka bruk mesruh ni, lac labaih sa ribau tỷ đôla./.

Urang lang: H.Pha & Thu Thảo -6/7/2021