Hà Nội brei pasang iek bruk pacang caga jit ruak

Dah page ni (5/11) mintri Y tế khan lac hu sa urang dương tính nCoV, lac urang tame negar meng Oman. Dahlau di nan, bier harei sup kabroi 4/11, Mban pato tacei pakat negar pacang caga jit Covid-19 hu khan brei thau ka 3 urang njom bahrau Covid-19, jeng lac urang tame negar, daok hu brei daok karei piah taong ruak di Bà Rịa - Vũng Tàu. Tal urak ni, Việt Nam hu 1.207 urang njom Covid-19, dalam nan hu 1.069 urang hu thit ruak. Anak bruk bhap bini daok iek lap, oh cuk pataih pacang pabah di labik hu rilo manuac, UBND ban ine Hà Nội brei thau, ban ine meda padang 5 kapul pasang iek bruk pacang caga jit ruak saong peih bruk pasang iek di 30 quận, huyện, ban sit meng harei ni (5/11).

UBND TPHCM bahrau hu harak pok tagok Thủ tướng, Mintri padang ngak, mintri Nội vụ pasang iek, njauk hatai haong bruk taong yaom labik kuhria padang ban Thủ Đức tui tanut đô thị janih I, piah tapa nan ngak danak dak  padang ban Thủ Đức. Tui nan, labik kuhria padang ban Thủ Đức lac pataom veik quận 2, quận 9 song quận Thủ Đức, angaok taneh prong labaih 211,5km², menuac urang labaih  1,5 triệu urang, khik hu tanut  đô thị janih I tui bruk batabiak urak ni.

Báo Điện tử bangsa saong patagok bahrau hu tabiak mbaok. Patui bruk saong cak rok patagok dom yaom glaong ndung bak makna di blah harak báo in, Báo Điện tử bangsa saong patagok meda peih praong asal kadha vak, pataom tame dalam di dom gah hu prien khang piah jhuk patagok dom ilamo siam makre di drei. Tapa pasang iek gah kinh tế-xã hội di 53 bangsa takik thun 2019, dom baoh sang mikva bangsa takik pandar Internet lac 61,3%. Bruk tabiak rai di Báo Điện tử bangsa saong patagok ba mai kein laba ka mikva bangsa takik hu puac sa blah mbao chính thống, hu asal kadha dalam pambuak haong radiuk di bhap bini.

700 hala doh negar bahrau hu Sở Công Thương tỉnh Bình Thuận jao ka  BĐBP tỉnh piah brei ka urang tong ikan. Ni lac pandap alin biak hu makna, rik dong pachreih ba, pabak pren ka mik va tong ikan   dalam tuk tabiak tasik tong chap ikan gam song bruk khik caga siam mekre bhum tasik, palao kaoh palei negar. Tukvak tapa, peih ngak danak dak “Alin hala doh negar  song thaot binguk Wa Hồ ka urang tong ikan”, BĐBP tỉnh Bình Thuận hu peih bruk jao brei dom ribau hala doh negar  song thaot binguk Wa Hồ ka urang tong ikan; rik dong patagok talei jum pataom bol bala song bhap bini angaok bhum tasik, pathau khan ka urang tong ikan thau cambaih laih jang ka quyền ngak po taneh ia, tasik palao di Việt Nam.

Ia dauk dui atah dalam tukvak tapa ngak khat lahik trak ka taneh pala padai hè thu di Cà Mau. Dalam nan, labaih 1.400 ha njauk lahik abih, bhap bini klak nao oh yuak. Bruk dauk ia dui atah jeng ngak ka 500 ha njam patam saong 287 ha phun mbang baoh di huyện Trần Văn Thời njauk khat lahik; 477 ha phun mbang baoh saong 247 ha njam patam di bhap bini huyện U Minh, tỉnh Cà Mau njauk lahik năng suất…UBND tỉnh Cà Mau hu ieu kakei Sở ngak nong saong patagok palei pala tỉnh pasang iek, brei thau cambaih dom janih bala meng langik tasik di dom huyện, ban di pak ni, pato tacei dom bhum palei samar daong ka bhap bini padang veik bruk ngak mbang, pala drak.

Bruk palih ruah Tổng thống Mỹ dok lagaih ka ong Joe Biden di đảng Dân Chủ tuk ong mek hu jayah  di bang Wisconsin song Michigan, tapa mbaok Tổng thống Donald Trumph biak atah. Urak ni urang pal akaok  negar  Mỹ tok daok sa jalan piah janeh veik lac janeh abih di  4 bang: Nevada, Pennsylvania, Bắc Ca-rô-li-na (North Carolina) Georgia. Urang jakar bang Nê-va-đa brei thau bruk pasang iek hala phiếu hu hu khan brei thau  di jala pandiak harei 5/11 tui tuk vak  Mỹ (njauk meteh melam ni tui tuk vak Việt Nam). Nyaom  tranh cử di ong Donald Trumph hu ba rilo harak pathau tagok  tòa án, peih jalan ka bruk cagar veik kết quả di dom bang praong ba tal jalan tame  Nhà Trắng.

Anak bruk dom urang njom bahrau Covid-19 daok tagok khang, rilo negar châu Âu daok ngak catang jang dom adat pacang caga jit njom pabak. Italia hu ba tabiak bruk giới nghiêm di dalam negar, meng maong 10 melam 5/11 tal 3/12. Hungary jeng tabiak bruk giới nghiêm meng maong 12 melam 3/11 di tuk dom urang njom di ni tagok khang, yam tagok dom tanut glaong abih bhian mboh dalam mbang njom camereip. Di Áo, meng harei 3/11, dom nhà hàng saong quán bar njauk gum pambang dalam 4 adit, dom bruk ngak gah ilamo, thể thao jeng brei padeih. Hy Lạp jeng brei pacang cacak veik sa binah di ban ine Athens saong gah barak negar dalam takik abih lac 1 bilan.

Rajaei Australia khan lac mek hu thỏa thuận yaom 1,5 tỷ AUD piah hu quyền pandar pabak 2 janih vaccine pacang Covid-19 bruk dok hu  dom hãng jru tavao ngak iek tuk vak puac abih. Urak ni, neger ni hu mbaoh tame tame 4 thỏa thuận blei  vaccine song abih tih jiak 135 triệu mbang, dalam tuk bhap bini oh ka tal 26 triệu urang . Australia urak ni lac negar nao dahlai di dunya dalam bruk dong dom negar patagok hu pandar vaccine pacang Covid-19. Rajei negar ni ndom lac hu dong abih vaccine ka bhap bini bhum  Đông Nam Á song Ấn Độ-Thái Bình Dương./.

Urang lang: Thu Thảo -H.Pha  5/11/2020 11:34:52