Palei A rớch hu 134 baoh sang. Raidiuk di labaih 500 bol bhap Cơ Tu labik ini biak sron mbon salamat. Dalam 8 urang metai birau ini, 1 urang kayua menyum alak mblung ia metai, 1 urang metai kayua bala angaok jalan mbak, 1 urang metai kayua menyum alak mesao gauk dalam sang, 5 urang metai kayua umo taha, ruak trak. Bruk cuang kandah jang tuk phong vien di dua blah mbao ba tin mikva dalam palei huac “metai jhak” nan ye klak palei nao daok labik karei.

Ông Bling Ching oh ka abih haduh hatai tuk diuk ong lac amuk Pơ Loong Thị Rươm birau plang lahik. Diuk ong hu taco pajeng meng radaih patuh nao rivang gauk gar min taco ong mebuh alak, peih radaih thaok tame radaih tải. Diuk ong metai, taco ong njauk rambuac trak. Ong Bling Ching khan lac: 

 “Diuk hulin plang ye, hulin haduh hatai rilo. Min lin mboh nan kayua thar vak min, peih radaih bo menyum alak thaok tame radaih tải, metai saong njauk rambuac nan mai meng drei ngak di drei. Biak di nyu oh njauk lac kayua yau nan bo mikva palei ini huac bo klak palei nao. Lac bala min drei brei tacei pato anek taco drei tabiak jalan brei peih radaih njauk jalan, njauk hukum juai peih samar”

Hu dom urang dalam palei umo thun taha, ruak trak suai lavik gam langik la-ar tuk Tet Nguyen dan yau nan ye metai. Taha palei Pơ Loong Dươi, palei A rớch lac:

 “ Dalam palei hu menuac metai, min kayua ruak kik. Dalak khang kadang yau in, min taha ye metai, oh hu thei daok miat hu? Nan lac bruk metai lihik oh thei plaih hu. Nan ye lac mboh metai jhak blaoh klak palei nao labik karei nan lac panuac ndom suan, oh njauk. Dahlak lac taha palei saong dom urang jakar palei, xã, huyện ndem saong mikva palei yau nan. Oh hu hagait huac. Brei kham ngak mbang.”

Ông Pơ Loong Nương- Bí thư Chi bộ palei, lac:“ Yau nan metai di palei ini oh hu hagait karei piah menyai. Bruk dom harak mbaok lac“metai jhak”nan oh biak, oh njauk.”

Dahlau di ini klau thun, palei But Tưa, xã Sông Kôn, huyện Đông Giang rah tabiak bruk urang klak palei nao kayua sahaneng lac dalam palei hu menuac metai sak kayua Yang  mek. Tuk nan hu karja saong dom kapul nyaom kham merat pathau khan, jak ba, mikva veik mai palei, tani tanat raidiuk. Anak bruk ba tin oh njauk ka bruk metai jhak di palei Arớt, karja huyen Đông Giang hu ngak bruk piah oh caik brei rah tabiak bruk yau klau thun dahlau. Muk ATing Tươi, Phó Chủ tịch UB bhap bini huyện Đông Giang, tỉnh Quảng Nam, brei thau:“Khol dahlak brei urang jakar Pasak Y te huyen mai iek ruak ka bhap bini saong jak ba kapul dam dara mai ramik ngak hacih alam moi truong ka palei A rớt, xã A Ting. Dom harei ini, urang jakar huyen ieu pataom dom pakat mat tran, kapul nyaom nao pachreih ba mikva piah sahanang hatai ngak mbang saong paglaong raidiuk.”

Yau nan, bruk ba tin lac hu dom urang metai jhak ngak ka mikva Cơ Tu palei Arớt klak palei nao lac bruk oh njauk, oh biak. Mikva palei ARớt urak ini jeng daok bui sambai ba gauk padang ngak palei pala birau./.