Ban raya Hồ Chí Minh hu ieu dom sang iek ruak di tư nhân tame bruk taong ruak ka urang ruak COVID-19

Hu veik 1.188.000 mbang vaccine COVID-19 AstraZeneca meng jalan COVAX mai tal Việt Nam tuk biar harei kabroi 2/8, tui nan, abih tih vaccine COVID-19 daong ka Việt Nam urak ini tagok tal 8.681.300 mbang. Dalam nan, hu 5 triệu 100 mbang vaccine Moderna hu Rajaei Hoa Kỳ daong brei saong 3 triệu 681 rabau 200 mbang AstraZeneca tui jalan  COVAX.  Tal urak ini, Việt Nam hu klauk labaih 6 triệu 400 rabau mbang vaccine caga COVID-19 ka bhap bini. Dom  vaccine pabak brei hu daong ka Mintri Y tế peih praong bruk klauk jru saong klauk hu ka rilo menuac jang, meng nan, daong ka Việt Nam ngak hu bruk lac klauk vaccine pacang caga ruak ka labaih 70% menuac sia dalam taneh ia di puac quý I thun 2022.

Ban raya Hồ Chí Minh hu ieu dom sang iek ruak di tư nhân tame bruk taong ruak ka urang ruak COVID-19 ngan saong 675 papan ndih iek ruak. Hu dom doanh nghiệp tame daong bruk, ba radaih taxi, radaih pajeng tuai ngak jeng radaih cấp cứu saong duh di labik. Tui nan, Cty cổ phần tập đoàn Mai Linh hu daong 200 radaih taxi ka  Pasak cấp cứu 115. Ban raya jeng hu panuac ieu Cty cổ phần radaih pajeng tuai Phương Trang daong 225 radaih ngak radaih cấp cứu saong duh ka bruk di labik saong jao ka Chủ tịch UBND 22 quận, huyện, ban Thủ Đức pandar piah duh ka bruk taong ruak tuk hu F0 ruak trak tagok.

Kuhria tal puac bilan 7, tỉnh Long An hu daong jaik 150 tỉ đồng brei ka jaik 340 rabau urang. Dalam nan, 36.528 urang ngak bruk tự do hu daong tapak yaom jien  jaik 33 tỷ đồng. Gah Bảo hiểm xã hội trun yaom jien blei bảo hiểm bala tuk ngak bruk, ruak kayua bruk ngak brei ka 5.237 kapul, nyaom,jabat, labik ngak bruk ngan saong 296.119 urang ngak, haong yaom jien trun jaik 105 tỷ đồng.  Langiu di nan, meng harei tamuh jit COVID-19 mbang ka 4 tal urak ini, dom puk palei dalam tỉnh Long An hu jak ba xã hội hóa daong ka rahra gaok kan kandah kayua jit ruak, abih di nyu lac di dom labik brei daok karei, labik pacang veik haong yaom jien jaik 28 tỷ đồng.

Tui panuac khan meng negar Japon ka bruk pakacah Olympic Hóa học pakat dunya thun 2021 di kapul taneh ia Việt Nam, taong abih 4 anek saih di VN tame pakacah jeng mek hu huy chương, lac 3 HC ameh haong 1 HC pariak. Dom adei mek hu HC ameh lac: Nguyễn Duy Anh haong Nguyễn Lê Thảo Anh, Sang bac Trung học Phổ thông chuyên Hà Nội-Amsterdam; Phạm Đức Nam Phương, sang bac Trung học Phổ thông chuyên Nguyễn Trãi, tỉnh Hải Dương.  Adei Nguyễn Hoàng Dương,  sang bac Trung học Phổ thông chuyên Khoa học tự nhiên, Đại học Quốc gia Hà Nội mek hu HC pariak.  Olympic Hóa học pakat dunya thun 2021 kayua Japon dang tabiak peih, hu ngak tui jalan pakacah online, hu mbaok di 79 taneh ia saong bhum taneh.

Sruh radaih pajeng kaya nong di mikva xã Trà Leng daok nduac tame ban raya HCM meng harei kabroi. Dahlau di nan, meng harei 29/7 tal harei 1/8, pachreih tui bruk jak ba rik pataom pandap ngak mbang huak, njam patam, baoh kraoh daong ka rahra ban raya HCM yam tapa kan kandah kayua jit ruak COVID-19, mikva xã Trà Leng chreih chrai nao kaoh mek paloi, rabung, bingu patei glai, baoh lahong that hu abih tih labaih 2 tấn payua tame TPHCM.  Hadei di dom mbang rabuk ia sua rah tabiak gam gam dalam thun 2020, bhap bini xã Trà Leng laik tame kan kandah, rambah rambup. Meng hu bruk daong di bhap bini dalam taneh ia, dalam nan hu ban raya HCM, bo bhap bini xã Trà Leng meng yam tapa hu kan kandah, padang raidiuk bahrau. Kayua yau nan ye, bruk ba gauk daong kaya nong brei ka rahra TP.HCM lac sa bruk piah bhap bini xã Trà Leng brei mboh hatai thau dhar phor.  Jeng dalam mbang ini, mikva di 9 xã karei dalam huyện Nam Trà My jeng rik pataom hu labaih 13 tấn meteh dom janih kaya nong payua tame TP.HCM.

Vũ Hán, pasak di tỉnh Hồ Bắc, gah kreh negar Trung Trung Quốc, hu 8 urang njaom SARS-CoV-2  dalam harei 2/8.  Dahlau di nan, ban ini oh hu urang ruak halei dalam bhap bini kuhria meng bilan 6/2020. Taong abih 31 tỉnh, ban dalam taneh ia Trung Quốc hu panuac kakei bhap bini oh nao mai meyah oh hu bruk hagait kayua jit daok tamuh tabiak. Dom urang ngak praong haong urang jakar y tế taneh ia ini jeng brei thau bruk mbuan njaom mbak khang di biến thể Delta, saong ieu Trung Quốc iek tui dom mbang jit tamuh tabiak bahrau di ini, samar pacing veik dom labik ngak oh siam ka pacang caga jit, abih di nyu lac dom sang iek ruak saong mblang kapal haoh, labik mbuan njaom mbak di abih..

Harei 2/8, Mentri Y tế Indonesia Budi Gunadi Sadikin brei thau bruk kuhria caga  dahlau lac jhak di abih tuk urang njom Covid-19  tagok biak glaong oh rah tabiak di taneh ia ini. Rajaei taneh ia ini kuhria mboh dahlau urang njom Covid-19 meda tagok tal 70.000  urang yaok harei, yau nan min mbiah tal ini urang njom ruak glong abih lac 50.000 urang. Akok Mentri Y te Budi iew bhap bini brei caga rup kayua bruk njom mbak di jit Covid-19 urak ini daok rah tabiak sraw kadau kan si thau dahlau saong meda rah tabiak oh lac labik halei.

Gah khik iek jalan tapen negar Mỹ bahrau ini chap mek jaik 1.000 menuac tame negar suan hukum di ala tatua di bang Texas, dalam tuk rajaei taneh ia ini daok glaih glar haong bruk “di cư:. Gah khik iek jalan tapen negar Mỹ dahlau di nan hu pandar dom sruh kapal haoh oh hu menuac peih piah pasang iek saong duah thau ka bruk ini. Bruk nan rah tabiak dalam tuk karja di Tổng thống Joe Biden daok kham merat pacang rilo menuac meng Nam Mỹ nduac tame dak harei dak rilo, kuhria meng tuk ong tagok ngak tong thong saong cagar veik dom sarak ka bruk nhập cư./.

Urang lang: M. Phương –Ai Nghiem - 03/08 14:04:29