Mesup ni 10/5, Mintri Y tế brei thau hu 78 urang njom  COVID-19 dalam bhap bini, dalam nan rilo di abih lac Bắc Ninh  27 urang, Đà Nẵng 13 urang. Yau nan kuhria tal mon 6  harei 10/5, Việt Nam hu abih tih 1.981 urang njom COVID-19 kayua njom mbak dalam negar. Anak bruk jit  COVID-19 rah tabiak srau kadau, công an rilo tỉnh ban brei padeih taduan harak ngak  thẻ căn cước công dân pagam chip song cang tuk jit hu pasang iek siam mekre meng peih ngak veik.

UBND ban Hòa Bình hu ba tabiak sarak ka bruk paatah di gauk meng maong 12 melam 10/5/2021. Tui nan, dalam ban padeih dom bruk ginum biai, dom bruk pataom labaih 20 urang dalam sa bilik (daok bruk taom gaok cử tri ngak tui adat di Ủy ban pilih ruah tỉnh); oh pataom meng 10 urang tagok langiu di labik ngak bruk, sang bac, sang iek ruak, ieu kakei daok atah di gauk takik abih lac 2m di manuac haong manuac di dom labik hu rilo manuac. Langiu di nan, patakik nao mai di bhap bini nao tal labik karei; padeih abih dom bruk ngak adat di agama, adat cambat, kakuk yang saong taong abih dom bruk ilamo, thể thao, main di dom labik hu rilo manuac. Ban jeng brei padeih dom labik pablei salih , dịch vụ pandar yaok harei, brei padeih radaih pajeng tuai piah ka bhap bini patakik bruk nao mai, oh kuhria radaih pajeng pandap.

Ong Trần Văn Hiệp, Akaok UBND tỉnh Lâm Đồng, hu harak tacei pato bahrau abih ka bruk pacang jit dalam tỉnh hadei di tuk Đà Lạt hu 179 urang lac F1 di urang ruak ka 3141 (huyện Thuận Thành, Bắc Ninh) njom  COVID-19. Urang ruak ni tal Đà Lạt meng  Nha Trang song nao mai rilo mbang dalam tuk vak  meng harei 2 tal harei 5-5.Tui harak tacei pato ni, ong Trần Văn Hiệp hu panuac ieu "tuia damuai tuk ini njauk takik mai rivang main ban Đà Lạt jeng yau tỉnh Lâm Đồng, piah daong klah rabha saong cang tal tuk siam lagaih meng mai tal ban, Đà Lạt, tỉnh Lâm Đồng".

Dom harei tapa, dom labik hu rilo bhap bini Khmer daok di huyện Vị Thủy, tỉnh Hậu Giang hu tabiak pathau khan ka bruk pilih ruah tal dom puk labik mikva daok. Dom labik paha Khmer daok pablak pathau khan ka bruk pilih ruah dalam bhap bini Khmer di xã. Di var pathau khan, urang pathau khan hu yaih khan dom adat hukum, biak lagaih haong bhap bini, abih di nyu nan lac dom adat hukum ka bruk pilih ruah. Tỉnh Hậu Giang urak ni hu 525 ấp, labik hu 728.500 rahra, hu parabha jeng 880 labik buh phiếu. Tal urak ni, tỉnh hu peih 880 kapul pilih ruah. Dom puk, labik praong, bhap bini rilo hu parabha jeng dua atau klau labik buh phiếu; yaok labik buh phiếu jeng rilo jang 300 cử tri saong ala 4.000 cử tri.

Mesup ni 10-5, kapal pajeng radeih  pasei ka  2 song ka  3 di jalan metro ka 1 (Bến Thành - Suối Tiên) hu pataok tame pabah lamnge Khánh Hội TP.HCM hadei di rilo harei  tabiak mai meng  Nhật Bản. Yau nan, kuhria tal urak ni hu 3 dalam abih tih 17 radeih pasei  di metro ka 1 hu blei tame negar drei. Mban khik ramik jalan pasei  đô thị ban raya HCM brei thau bruk blei tame song ba 3 radeih pasei camereip  di jalan metro ka 1 lac sa dalam dom bruk biak prong di danak dak, brei mboh bruk lac meng pataom tame padang ngak salih tapa vaktu peih ngak iek song ba pandar.

Tui blah yaok pataom worldometers.info, kuhria tal maong 8 harei 10/5 (tui maong Việt Nam), angaok dunya hu jaik 1 rituh 59 trieu urang njom virus SARS-CoV-2 ba talk ruak jalan suak yava COVID-19, dalam nan hu labaih 3 triệu 3 rituh urang metai. Dom urang ruak hu taong ruak thit ruak lac labaih 136 trieu 4 rituh ribau urang.  Negar njauk kan kandah di abih jeng lac Mỹ, daok Ấn Độ dang ka dua di dunya ka dom urang njom, min dang ka klau di dunya ka dom urang metai.  

Hãng tin Roi-tơ (Reuters) harei 9/5 brei thau Trung Quốc meda padang sa  jalan pacang angaok ceik glong abih di dunya  Ê-vơ-rét (Everest) piah pacang cakak jit  COVID-19 tapa taom gaok di dom urang ndik ceik  meng Nê-pan song dom urang roh duah  mai meng Tây Tạng. Khaw tin ni hu ba tabiak dalam tuk Nê-pan, lac negar jeng hu ngak po sa binah Ê-vơ-rét dok dang anak bruk hu menuac njom  SARS-CoV-2.  Harei  9/5 Nê-pan hu 8.777 urang dương tính song virus SARS-CoV-2, tui nan abih tih  urang njom COVID-19 di negar ni meng tuk hu jit tal harei ini, lac  394.000.

Cảnh sát Somalia brei thau hu takik di nyu 6 urang metai saong 6 urang karei njauk rambuac dalam bruk taong bom pametai rup eng rahtabiak di melam 9/5 taong tame sa bilai cảnh sát di ban ine Mogadishu.dom urang metai hu 4 rahra saong 2 sĩ quan cảnh sát, dalam nan hu sa sĩ quan pakat glaong di bilai cảnh sát nan, urang hu brei thau lac menuac di mbang taong ini. Tal urak ni ka oh hu kapul halei taduan lac ngak tabiak bruk ini. Min tukvak tapa, dom mbang taong di ban ine di Somalia bhian kayua kapul al-Shabaab hu pambuak haong gah Al-Qaeda peih ngak. /.

Urang lang: Thu Thảo - H.Pha