Dah page ini (10/7), HĐND TP.HCM peih Mbang nyaom ka 10, khóa X piah ginum biai, pasang iek, brei tapa harak pathau khan di UBND Ban raya peih ngak Sarak 98 ka bruk ngak iek dom jalan ngak, sarak angan je piah cak rok patagok TP.HCM. Khan brei thau di mbang nyaom, Ủy viên Mintri Chính trị, Bí thư Thành ủy TP.HCM Nguyễn Văn Nên brei thau lac, dalam 7 nyaom jalan ngak hu Sarak ba tabiak ye bruk bo Quốc hội jao ka HĐND Ban raya lac biak praong ngan haong 14 bruk ngak hu makna praong. Kayua yau nan ye, dom urang lambaok HĐND Ban raya njauk patagok bruk ngak, hatai di drei dalam bruk ginum biai, rik tame jaik haong anak mata piah ba tabiak sarak ka mbang nyaom biai ini hu chất lượng glaong di abih, biak cambaih laih, mbuan thau, mbuan ngak, mbuan pasang iek.

 Sở Ilamu, Thể thao saong Du lịch TP. Cần Thơ bahrau peih mbaok  “Harei pataom Du lịch Ilamu darak angaok kraong Cái Răng” TP. Cần Thơ mbang ka VII. Di harei pataom ini, TP Cần Thơ hu tabiak mbaok labik parang iek, pablei pandap OCOP, caik di labik ngak hủ tiếu Nhà Bè, di darak angaok kraong Cái Răng. Jalan ngak ini gam patagok hu yaom glaong ilamu hadah krah tapa bruk pablei salih angaok kraong ia di rahra bhum ĐBSCL, gam rik daong parilo janih pandap di darak angaok kraong Cái Răng. Tapa nan, daong palagaih ka dom po pablei salih saong tuai damuai hu blei dom pandap karei di ban, siam mekre, hu chất lượng. Urak ini TP Cần Thơ hu 92 janih pandap OCOP.

UBND tỉnh Hậu Giang daok pataom prein tame pato tacei biyar jien, daong tái định cư Danak dak binah 3, di Danak dak jalan nduac samar Châu Đốc - Cần Thơ - Sóc Trăng, tukvak 1, kham marat ngak salah dalam thun ini. Dalam nan, piah tani tanat jalan biyar jien, daong tái định cư, UBND tỉnh hu brei tapa Danak dak Labik tái định cư Cây Dương 1. Yaok labik tái định hu phun jien buh tame lac 110 tỷ đồng. Taong abih 2 labik tái định cư ini tui kuhria meda hu labaih 560 nền. Danak dak binah 3 di Danak dak buh jien tame padang ngak jalan nduac samar Châu Đốc - Cần Thơ - Sóc Trăng, tukvak 1, hu yaom jien buh tame ngak abih tih lac labaih 9.600 tỷ đồng.

Meng akaok thun tal ini, tuk darak pasar Trung Quốc peih pabah mbang veik, baoh thanh long pablei hu siam, yaom tagok glaong, urang pala hu laba. Min jaik 1 adit mai ini, thanh long pablei takik laik, yaom lap, hu pablei grauk labik di TP HCM yaom 15.000 đồng/2kg. Di Long An yaom thanh long jeng mala 10.000 đồng/kg ngan haong 3 janih thanh long: ralow bhong meriah, ralow mbong patih saong thanh long kanduh katam kanyik. Tui panuac khan di urang pala thanh long, makna lac kayua urak ini daok hu rilo janih baoh kayau karei jeng daok tame bilan paik baoh, nan ye yaom trun biar.

Dalam dom harei tapa, Sang iek ruak Đa khoa tỉnh Sóc Trăng, Sang iek ruak chuyên khoa Sản Nhi tỉnh Sóc Trăng pambuak haong Liên chi hội Tim mạch nhi saong Ruak baoh hatai meng tuk manek tabiak di Ban raya Hồ Chí Minh peih bruk iek ruak saong taong ruak ka labaih 4.000 urang kan kathaot dalam saong langiu tỉnh Sóc Trăng. Dom urang ruak hu dom bác sĩ langyah prein yava, pasang iek iek ruak hatai baoh meng tuk manek tabiak saong iek ruak, pabak brei jru, taong ruak ka tagei saong dom janih ruak karei oh mek jien. Dalam labaih 10 thun tapa, danak dak iek ruak oh mek jien di Sang iek ruak Đa khoa tỉnh Sóc Trăng hu peih ngak 184 mbang blaic raih baoh hatai saong pasang iek ruak hatai baoh meng tuk manek tabiak ka labaih 400 adei daok di Sóc Trăng.

Sa sruh kapal njuk ia hu tên lửa hành trình nduac meng năng lượng hạt nhân di Mỹ hu pataok tame pabah lamnge Busan di Hàn Quốc bilan dahlau. Tapa nan, Triều Tiên hu panuac lên án bruk ngak ini di Mỹ saong ndom lac, bruk ini nyu đe dọa hạt nhân tal Triều Tiên saong dom taneh ia dalam bhum, ngak jhak tal bruk sron mbon. Di bilan 4, dom urang pan akaok Hàn Quốc saong Mỹ njauk gauk lac sa sruh kapal njuk ia hu tên lửa đạn đạo pagam hạt nhân di Lin tasik Mỹ meda tapa ravang Hàn Quốc mbang camereip kuhria meng dom thun 1980.

Jabat uranaih saong baoh sang Nhật Bản daok peih bruk pasang iek ka dom bruk bo uranaih njauk taong paoh di negar ini. Mbang pasang iek ini hu peih tabiak hadei di tuk jabat ini taduan hu panuac khan ka dom mbang taong paoh uranaih hu amaik ame di sa nyaom agama, tui adat cambat halei nan. Bruk ngak ini lac piah duah mboh dom uranaih njauk taong paoh saong hu dom bruk rami ramik lagaih piah daong ka dom adei. Amaik ame dom adei meda oh pandar bruk taong paohmin oh njauk hatai ka bruk blaic raih, atau taduan bruk alin darah tuk adei njauk ruak kik njauk nao taong ruak.

Sa bruk klauk meng to rah tabiak di sang bac di tỉnh Quảng Đông, gah Meraong Trung Quốc ngak brei 6 urang metai saong 1 urang njauk rambus. Urak ini cảnh sát oh ka brei thau hagait ka dom urang gaok bala. Dahlau di nan, thun 2021, bruk klauk meng to di sa sang bac mẫu giáo daok di labik tự trị dân tộc Choang Quảng Tây, jeng ngak tatuan megei dalam bhap bini. Bruk nan ngak brei 2 uranaih metai saong 16 urang njauk rambus./.