Tui khau tin yaok pataom bahrau di abih di Kuk caga salamat khau tin, Mintri Khau tin saong Prai dakwah brei thau lac, dalam 11 bilan meng akaok thun 2023 mai, Mintri ini mada taduan hu labaih 15.900 baoh kadha pathau khan ka bruk pachot pagat bleik salih mai mang urang pandar Internet Việt Nam payua tal dom danak dak caga kakei, dalam nan hu labaih 91% panuac kakei pambuak tal bruk ngak bleik salih pachot pagat dalam gam haong gilang paraik jien padai.

Kuk caga salamat khau tin, Mintri Khau tin saong Prai dakwah (TT&TT) bahrau ba tabiak dom panuac kakei brei thau rahra njauk caik hatai caga tal dom janih jalan pagat bahrau tamuh tabiak. Tui Jabat ini, Polih tỉnh Hải Dương bahrau cap mek khik sa kapul nyaom urang pagat urang bleik, blah mek ndap nda kaya ngui meng jalan yaih khan, pablei salih janih pandap brei co pang klaik, puac bac klaik geing kadha ndom mayai di dalam phone.

Piah caga bruk kadah bleik pagat ini, Kuk Khau tin saong Prai dakwah khan tal bhap bini rahra njauk caga hatai blei dom janih ndap nda jammraih pablei barat di jalan dhuan; nyu mboh lap barap min tapi mbuan si nyu bleih mek dom khau tin, baoh kadha di drei.

Bruk blei eng blei tapak jeng ye pandar dom janih jamraik pandap panda piah mek sap ndom mayai, mek binguk dalam tuk ka oh hu jabat kanja brei adat pandar tui hukum; meda njauk taong phat jien padai tui harak atau trak di nyu njauk kaoh hukum makamah. Bruk taong bhat kaoh hukum oh brei taeng ka dom urang pablei salih pandap panda bleih salih ini bo daok taong phat kaoh hukum brei ka urang blei urang pandar pandap pandanya.

Taong tame hatai hua di urang pandar gam haong masa tukvak puac thun, dom urang bleih salih ba tabiak ralo janih pacuh pachrot jeng ye janji ralo janih kadha taa raok piah paluo pachreih dom urang blei hu mayaom laba praong hu daong brei saoh ndap nda. Patui di nan, kon bleih kon co pacuh pachreih urang blei ndap nda buh jien tame piah hu taduan jien haong ndap nda urang lin brei. Min, dak tuk dak ma-in mboh jien buh tame dak praong, dak ralo jeng ye caong hatai piah duah hu ralo jien padai ndap nda ralo jang, dalam tuk kon bleih salih pacuh pachreih urang pandar dui ba tame jamraik phon di drei dom janih kanjah piah meblah mek pandar saong meblah mek drap ar ndap nda kaya ngui lek taka gilang paraik dalam jamraik phone, rami ramik tame app di dalam jamraik phone piah mek gilac paok jien bo drei hu buh tabiak.

Piah pacang cakak bruk pachot pagat di online daok mboh ratabiak dak harei dak ralo di masa tukvak puac thun, gah Khau tin saong Prai dakwah brei thau lac: meda patui veik paglaong bruk pathau khan piah paglaong hatai sahaneng khik ramik siam makre salamat khau tin ka rahra yau ye peih ngak dom bruk ngak series “Khau tin adit” ngan haong dom khau tin ka bruk pachot pagat online daok rah tabiak piah ba tabiak dom panuac kakei jang yau dom kakei rahra samar drah daong ka rahra eng drei khik caga khau tin di drei di internet; patabiak ngak dom jalan wep khau tin di mangaok Bahmbang negar (khonggianmang.vn) di dom gah internet piah ba khau tin, pathau khan ka dom bruk khik karo kajap salamat khau tin, jeng ye tal dom pachot pagat di online.