Sa-ai Bùi Văn Tuấn (daok di phường 21, quận Bình Thạnh, TPHCM) brei thau, dahlau diah sa-ai bhian blei pandap tapak min tukvak puac thun kayua tavak rilo bruk yau nan ye sa-ai njuak blei pandap online. Dom harei dahlau, sa-ai Tuấn hu kakei blei sa mac njuk dhul yaom 800.000 đồng, bruk meyaih khan ka pandap biak laghaih haong bruk pandar di sang. Hu urang pablei pandap iew phon khan brei thau cambaih jang ka mac nan saong tukvak bảo hành biak tani tanat, meyah mac khut hagait hu salih dalam 35 harei akaok mereip nan ye sa-ai mboh sahanang hatai saong taduan blei. Harei akaok mereip cắm điện mac jeng daok nduac min pandar oh yau panuac yaih khan, pandar hu 30 minit ye mac oh daok nduac tra. Sa-ai Tuấn khan lac: “Dahlak iew phon ka urang pablei pandap nan tal 3 mbang min oh pang mac. Hadei di nan, dahlak ba nao tal hãng hu urang dang pablei brei thau lac pandap ja. Iew phon gilac veik ka số phon klak jeng oh ieu hu”.

Sa-ai Mai Thị Lan (phường Thống Nhất, TP Biên Hòa, tỉnh Đồng Nai) jeng brei thau, tuk Tết Nguyên đán meng blaoh, sa-ai blei combo mỹ phẩm hu kem pasiam kalik mbaok, menyek rapao akaok, sữa menei, aia pahe. Hadei di tuk trun yaom 30%, dom pandap nan hu yaom pablei 1,2 triệu đồng. Hu meyaih khan lac pandap teik tangin di Hàn Quốc, nan ye sa-ai kakei blei. Melam 15/2 (lac harei 6 bingun Tết), hadei di tuk nao ngak mai sang, sa-ai hu shiper jao pandap tal tangin, pasang iek pandap mboh oh njauk hagait nan ye bayar jien ginup abih. Min hadei di rilo mbang pandar kem pasiam kalik mboh pahe oh daok yau dahlau, kalik mbaok thu; daok menyek raphao akaok ye mboh mbuk khin jruh nan ye sa-ai padeih pandar. Iew phon piah tangi sua min oh ieu hu, duah tame veik blah web nan, mboh dom janih pandap oh daok hu mbaok di labik pablei.

Amuk Đàm Thị Hằng (daok di Thủ Dầu Một, Bình Dương) khan lac, amuk bhian njauk lah pachot tuk blei pandap online nan ye pandap halei oh hu pablei di jaik labik daok meng blei angaok mạng saong duah dom labik hu angan je, atau blei đi dom urang bhian randap piah plaih blei pandap oh siam.

Tui amuk Phan Thị Việt Thu – akaok Kapul Khik caga urang blei pandar TPHCM, urak ini, bruk urang blei pandar gaok bruk blei njauk pandap ja, pandap oh siam angaok dom “darak mạng” biak rilo. Abih di nyu lac, kapul gaok biak rilo bruk blei njauk pandap ja, pandap ngak mblah tui min kayua bruk khiếu nại abih rilo tukvak, dalam tuk yaom pandap oh glaong  nan ye rilo menuac oh khiếu nại atau klaak bruk meteh dhi.

Ong Bùi Văn Vỹ - Urang dang akaok Công ty cổ phần pandap pandar Thái Dương (TPHCM) brei thau, bruk blei salih angaok dom mạng xã hội daok lac jalan nao di dunya saong Việt Nam khaol drei jeng yau nan. Min jalan ngak ini di negar drei daok rilo tavak tavaiy ye ye quy định, chế tài, khik iek daok cadu, “rituh bingu pacah gauk nerak”, bar thei thei ngak. Tui ong Vỹ, di dom negar, urang padang hu dom adat saong ilamu pablei siam mekre, ba đạo đức pablei salih tagok mangaok di abih, pandap panda di siêu thị atau pablei di tapen jalan, angaok mạng jeng siam dreih grauk, nan ye bruk pablei salih online meng daok hu saong tagok hu. Ong Vỹ kakei lac: “Dalam tuk yau urak ini, meyah blei pandap angaok mạng, urang blei pandar njauk palih ruah dom sàn giao dịch hu angan je, hu brei adat ngak. Meyah oh hu yau nan,njauk blei pandap tapak di dom labik pablei salih lavik thun, labik  cambaih laih nan lac jalan siam di abih piah oh njauk lah pachot”./.