Kadha “Hukum negar saong raidiuk” harei ini, kol dahlak hulin likau khan kadha vak di Văn Tiến angaok báo Quân đội Nhân dân ka bruk“daong rahra thau, njauk hatai tui bruk phân giới cắm mốc”.

Sa mesup harei adit, jurang jakar Đồn Biên phòng Thạnh Trị hu mbaok di sang ong Đào Văn Thức, daok di palei Bình Bắc, xã Bình Hòa Tây (huyện Mộc Hóa) piah jak ba sang ong oh pala drak di mangaok taneh gah daih jalan tapen negar hadei di tuk hu “phân giới cắm mốc” blaoh  di mangaok mbaok haluk jalan tapen negan Việt Nam-Campuchia, hu jao ka gah Campuchia. Piah ka sang ong thau cambaih jang ka bruk ngak nan, urang jakar Đồn Biên phòng Thạnh Trị hu khan brei thau ka “Harak pabak Hiệp ước tacei tabiak jalan tapen negar di taneh ia thun 1985 saong Hiệp ước pabak veik thun 2005 di negar Cộng hòa xã hội chủ nghĩa Việt Nam haong Negar Campuchia” brei ka dom urang dalam sang thau cambaih. Thau hu bruk ngak praong di Đảng saong Karja, saong ong Thức halan hatian oh daok pala drak di labik taneh nan.

Ong Đào Văn Thức khan lac: “Sang ong urak ini hu taneh pala drak yam tapa jalan tapen negar. Tuk camereip, dahlak suh sah lo tuk thau lac Karja mek veik taneh nan. Min hadei di tuk thau ka makna di bruk khik ramik jalan tapen negar, cột mốc, kol dahlak jeng pachreih tui dom jalan ngak di Đảng saong karja piah rik daong dak padang bhum tapen negar sron mbon, siam mekre saong cakrok. Sang dahlak jeng caong khin dom pakat karja samar hu sarak daong ka dom sang hu taneh daok gah daih jalan tapen negar samar tani tanat raidiuk”.

Urak ini, di bhum tapen negar labik Đồn Biên phòng Thạnh Trị khik iek hu dom sang hu taneh pala drak daok gah daih jalan tapen negar (meng labik mốc 201.2 tal 202.2 - palei Bình Bắc). Kayua yau nan ye, oh lac pathau khan tapak tal yaok baoh sang, Đồn Biên phòng Thạnh Trị daok hu pambuak bruk haong Kapul pato pakai quốc phòng saong an ninh huyện Mộc Hóa ba dom asal kadha pambuak tal mbaok taneh bhum tapen negar saong dom asal kadha praong di Hukum Biên phòng Việt Nam pathau khan praong dalam bol bhap rahra tapa dom jalan thông tin đại chúng. Meng nan, taong abih dom baoh sang jeng pachreih tui jalan ngak di Đảng saong karja pambuak tal dom mblang taneh daok gah daih jalan tapen negar. 

Thiếu tá Lê Trung Sơn, Chính trị viên Đồn Biên phòng Thạnh Trị brei thau: “Piah ka bhap bini njauk hatai pachreih tui, pakat ủy, Mban chỉ huy Đồn hu tacei pato dom kapul, bilai peih ngak samu gauk dom bruk gah biên phòng, ba tabiak dom jalan ngak njauk haong bruk di anak meta dalam pathau khan, jak ba dom sang hu taneh njauk mek veik. Gam haong nan, Đồn hu duah thau, piah mboh saong pacang cakak dom bruk kol kanjah jhak pacuh pajarak bhap bini khiếu kiện ngak srau kadau tal bruk an ninh chính trị, siam mekre, sron mbon puk palei”.

Abih di nyu lac, tapa bruk pathau khan, pato pakai, jak ba, urang jakar, urang lin Đồn Biên phòng Thạnh Trị hu daong ngak brei paglaong hatai sahneng saong trách nhiệm di dom sang dalam labik đóng quân ka bruk ngak tui sarak di  Đảng saong Karja ka phân giới, cắm mốc di jalan tapen negar Long An jaik taphia haong negar Campuchia.