Mada hu kanja pamadeih brei thau ralo mbang min tapi jeng daok hu oh tukik urang daok jie tui dom kadha pacuh gauk tui tame msraiy jien jeng ye daong patapa patapak di internet, mbuan si bleik muban si blah jien ndo kaya ngui… Tame ieik dom hala prai yaih brei masraiy patapa harei di gilang jien, kon dahalak mboh ralo khao tin yaih dom janih brei masraiy gam haong dom baoh panuac janji sinyia brei masraiy mbuan sanang haong paok jien praong gam tui bayar tukik meng 1,5-3% yaom taong abih jien payeng nao mai.

Pagap ye di Facebook Phúc Gia yaih pachreih brei daong paguan tuk wak masa dom paok jien masraiy meng 5 triệu đồng tal 30 tỷ đồng gam haong harak gar mbuan sanang jeng ye tui jien laba gap takre. Caong tut tangin tame tanut bình luận, capat mboh hu sa urang brei angan Mr Phúc, urang di gilang jien, ndom mayai biai nao mai tapa Messenger. Tal tuk khol drei brei hatai khin patapa paguan harei nyim masraiy di gilang jien 150 triệu đồng, urang likei ini brei thau lac mada daong patapa harei paguan drah samar; gam tui di nan nyu khin drei brei thau dom kao tin rup drei dan haong payua ka nyu payar 2%/ jien patapa paguan harei bayar labaih kurang 3 triệu đồng. Mboh lac dalam bruk ndom mayai nao mai di nyu oh lagaih njauk lahik abih jien drei barau payua mang blaoh.

Yau ye ông T.N.Hải. (daok di P.Trung Dũng, TP.Biên Hòa). Bilan 10-2023, kayua khin hu jien drah samar, ông Hải pik mata masraiy jien “tín dụng đen” 50 triệu đồng gam haong jien laba 8% dan haong paguan masa bayar harei 1-1-2024. Tal harei paguan, ông Hải oh nduac hu jien. Tapa urang krein brei khan, ông Hai duah tal labik daong paguan tukwak di intenet. Tui urang pambuak haong drei, ông Hai njauk payar jien patapa paguan harei payar 2,5 triệu đồng, min tapi tal tuk brei thau dom khao tin haong bayar jien, ông Hai tok daok cang oh hei jabap mai. Ralo mbang ieu phone ka nyu jeng oh pambuak hu ph hu thei jabap mai, ông Hải meng thau lac urang pableih drei.

Oh lac bleih salih urang masraiy jien kayua khin patapa harei paguan bayar jien di intenet, ralo urang hu jien labaih – kayua khin caong hu laba ralo, hu jien drah dalam dom harei – jeng ba rup tame bruk patapa masa paguan jien masraiy min oh sangka pacang jaga karo kajap…, njauk ka urang bleik njauk lahik jien jien padai kaya ngui tamuh tabiak di ralo palei. Barau di ini, ông H.Q.V. (daok di Q.Hải Châu, TP.Đà Nẵng) mada bleik pachot lahik bih 9,8 tỷ đồng kayua brei ka urang patapa harei jien masraiy di gilang jien.

Mboh oh lac tukik urang masraiy gilang jien, labik brei jien masraiy min tapi ngak mbang kan daman yau nan ye oh dil ganap njauk harei bayar jien. Piah truh patapa harei pataguan, tapa hu tín dụng chak kanjah njauk masraiy jian laba glaong jeng ye jie tu dom labik pachot yaih angak intenet brei patapa harei paguan bayar jien. Mboh ralo jamo gau njauk caik hatai. 

Juru hukum Ngô Văn Định, Phó giám đốc Pasak Patacei hukum nagar Pahasa Urang Hukum Hội Luật gia tỉnh Đồng Nai brei thau, abih dom kadha nao mai brei ka bruk patapa harei paguan atau dom jien masraiy di intenet oh hu kaya ngui tantu njuak tui hukum nagar brei, khao tin masraiy jeng ye dom janih di nyu oh dah krah, panuac kadha pambuak gauk jamo gau di urang masraiy jeng ye urang brei masraiy. Ka oh ndom mayai tal abih harei paguan bayar ka gilang jien ralo kadha chung njauk oh cambac lac, jeng ye tal manuac brei masraiy ralo janih kadha mek hukum nagar mai pacang piah pateik geik, kham tam urang… Kayua yau nan ye, bhap bini rahra urang pandar intenet njauk caik hatai caga janih kadha cauci mai ka rup drei./.