Xã Phước Hậu, huyện Ninh Phước padang ngak hu palei pala bahrau 

Thun 2019, huyện Ninh Phước mek hu taong abih 9 tiêu chí saong hadah mbaok meta hu Thủ tướng Raja-ei brei angan mek hu chuẩn palei pala bahrau. Thun 2011, tuk bahrau peih ngak danak dak bruk ngak negar padang ngak palei pala bahrau, huyện Ninh Phước tuk nan biak kan kandah, bruk ngak nong meblah jaik 52%, jien mek tame ka kadung jien karja biar, bruk ngak mbang kinh tế - xã hội daok kurang  saong oh ka khang. Tuk nan, jien mek tame kuhria rah tapa tui akaok menuac di huyện tok hu 8,7 triệu đồng sa urang sa thun; baoh sang kathaot jaik 11%.

Tal harei ini, hadei di jaik 10 thun, huyện Ninh Phước hu ieu pataom saong pablak tame dom pren khang, abih tih hu labaih 2.330 tỷ đồng brei ka bruk padang ngak cơ sở hạ tầng, dak harei dak pabak ka bruk cak rok patagok kinh tế - xã hội di puk palei. Urak ini, taong abih yaom pandap ngak tabiak gah kaya nong, kaya glai, kaya ikan di huyện hu labaih 2.541,3 tỷ đồng, glaong jang labaih 4,13 mbang dut haong thun 2011. Njauk ndom tal di abih lac rai diuk bhap bani dalam huyện, abih di nyu lac bhum urang bangsa takik hu patagok biak rilo. Nao tame dalam dom palei, xã, jalan mbak nao mai mbuan laghaih, bhap bani pandar ilamu kỹ thuật bahrau tame bruk ngak nong, salih janih phun pala saong athur raong ka nyu laghaih, ba mai kein laba glaong.

Ong Bá Bình Lợi, urang Cam daok di palei Mblang kacak Phước Đồng, xã Phước Hậu, huyện Ninh Phước brei thau lac dalam 10 thun tapa rai diuk di sang ong saong mikva pak ini hu salih bahrau abih janih: “Tuk ka oh padang ngak palei pala bahrau, ye jalan mbak nao mai kan kandah lo…”

Tukvak tapa, Ninh Phước biak caik hatai tal bruk rami ramik veik gah ngak nong, rilo bruk ngak mbang pala drak tui chuỗi liên kết hu kein laba, dom kaya nong di puk palei brei mboh hu angan je di drei angaok darak pasa yau: nho, madar, rabung hijao...

Tal urak ini, bruk ngak nong jeng daok meblah prong dalam kinh tế di huyện min jien mek tame kuhria rah tapa tui akaok manuac di Ninh Phước hu 43 triệu đồng sa urang sa thun, tagok 4 mbang dut haong thun 2011, baoh sang kathaot tui tanut bahrau tok daok 3,69%, trun 3 mbang dut haong thun 2011.

  Ong Trượng Văn Tin, akaok Kapul urang nong xã Phước Hậu, huyện Ninh Phước brei thau, xã saong huyện biak sangka tal bruk daong ka urang nong salih jalan ngak mbang pala drak pagam haong bruk duah labik pablei kaya nong, caik pren khang  buh tame padang ngak patagok hạ tầng, khik kajap bruk patrun kathaot rilo gah: “ Dahlak biak caong khin lac Đảng, Karja hu bruk sangka, ngak habar ba rai diuk di mikva, abih di nyu lac dom xã palei pala bahrau cak rok patagok jang tui tanut patrun kathaot khang kajap tui rilo gah”.

Bruk daok kham merat pamaong tal di huyện Ninh Phước lac tal puac thun 2025 hu taong abih 8 xã mek hu angan palei pala bahrau paglaong, dalam nan hu 1 tal 2 xã kiểu mẫu saong paglaong chất lượng huyện palei pala bahrau, jien mek tame kuhria tui akaok menuac hu labaih 79 triệu đồng sa thun.

Tui ong Phạm Văn Hậu, Phaok akaok UB bha bani tỉnh Ninh Thuận ye dom bruk ngak hu njauk uan tabuan nan di huyện Ninh Phước hu bruk rik daong biak prong di bhap bani dalam huyện, ba gauk rik pren, daong jien padang ngak palei pala.

Tuk vak anak tal, Ninh Phước njauk patui veik bruk paglaong chất lượng padang ngak palei pala bahrau jang piah cak rok patagok tani tanat. Gam haong bruk buh jien tame padang ngak di karja, caong khin hu rilo jang bruk rik daong meng gah doanh nghiệp, dom baoh sang: “Urang ngak prong hu mbaok tame dahlau saong bhap bani ngak tui hadei. Dom phun jien rik daong di doanh nghiệp saong dom danak dak di karja yau habar jeng hu khan brei thau cambaih laih. Ngak habar piah ka bhap bani mboh bruk ngak nan hu kein laba ye mikva ngak tui biak samar.”

Padang ngak palei pala bahrau hu labik peih mbaok min oh hu labik tamat. Kayua yau nan ye, dom pakat karja saong bhap bani huyện Ninh Phước, tỉnh Ninh Thuận jeng daok hu rilo bruk njauk ngak di gah anak. Ninh Phước kham merat jeng palei pala bahrau kiểu mẫu dalam tuk vak anak tal./.

Urang lang: Jasi – 01/11