Kayua Enino, meng thun bloh mbiah tal ni, di dom tỉnh tapen tasikl Nam Trung bộ takik hajan, ngak kan kandah tal rai duik di bhap bini. Yaom lac bahrau akaok bilan thu min pandiak bhang rah tabiak khang di grauk labik. Di tỉnh Ninh Thuận, urak ni rilo danao thu abih ia, dom bingun ia di bhap bini jeng thu lagu, ia piah pandar saong rong glang, pala drak dak harei dak kurang. Di xã Nhơn Hải, huyện Ninh Hải- sa dalam dom labik dok pandiak bhang trak di abih di tỉnh Ninh Thuận, labaih 200 boh sang song jiak 900 urang dok kurang ia pandar trak, rilo anek athur metai kayua oh hu ia.  Ong Nguyễn Thành, palei  Khánh Tân, xã Nhơn Hải brei thau: meng tết mbiah tal ni, sang ong nao blei ia hacih di atah mai pandar song yaom jiak 100 ribau đồng sa m3, pandar patak patom jeng aboh 500 ribau đồng yaok bilan. Oh hu jien blei ia ka anek athur ong ba athur nao atah duah jalan ia. Urak ni hu Bộ Tư lệnh Quân khu 5 ba ia mai tal labik brei saoh ka mik va, ong Nguyễn Thành biak bui sambai lac:

Urak ni hu bruk sangka di Bộ Tư lệnh Quân khu 5, Bộ Chỉ huy quân sự tỉnh ba ia mai labik ni dong ka mik va, mik va biak bui sambai, chreih hatai. Lambaok ka tong abih bhap bini xã Khánh Tân likau uan tabuan bruk sangka dong ba di Bộ Tư lệnh Quân khu 5, cong khin dalam tuk vak anak tal ngak habar ka pakat angaok hu sangka jang. 

Hadei di mbang pasang iek song tacei pato di Thủ tướng Nguyễn Xuân Phúc di  tỉnh Ninh Thuận, Bộ Tư lệnh Quân khu 5 hu tacei Bộ Chỉ huy Quân sự tinh ini pasang iek bruk pandiak bhang piah dong ba. Tal urak ni Bộ Tư lệnh Quân khu 5 hu ba 3 sruh radeih bồn tame tỉnh Ninh Thuận. Anak meta dalam sa bilan anak tal, dom radeih bồn gam gam pajeng ia saat tal yaok palei pala dok kurang ia piah dong ka bhap bini. Đại tá Huỳnh Công Năng, Chỉ huy Trưởng Bộ Chỉ huy Quân sự tỉnh Ninh Thuận brei thau:

Meng akaok bilan 2  mbiah tal ni, Bộ Chỉ huy quân sự tỉnh hu pajeng ba labaih 300 mét khối ia dong ka 213 boh sang dok di palei Khánh Tân, xã Nhơn Hải. Urak ni dok pambuak bruk song lực lượng di  Quân khu 5 pajeng ia dong ka bhap bini di dom bhum taneh pandiak bhang dok dalam tỉnh. Dalam tuk vak anak tal Bội Chỉ huy quân sự tỉnh hu mbaok tame dong bhap bini pacang pandiak piah khik ka jalan ia pandar ka bhap bini.

Thun bloh, pandiak bhang ngak kan kandah tapak ka jiak 6000 boh sang di 4 huyện di tỉnh Ninh Thuận, ngak ka bhap bini kurang ia pandar. Labaih 2.500 anek pabe, pabo, kubau, limo metai, jiak  10.500 héc tapadai song njam patam padeih sản xuất. Thun ni, pandiak bhang mai aval jang song hu pathau khan meda trak jang rilo. UB bhap bini tỉnh Ninh Thuận hu tacei ba ka gah ngak nong song dom puk palei padeih bruk pala drak labaih 10 ha padai song njam patanm, jang yau duah dom labik khik jalan ia piah bhap bini palao rong anek athur. Ông Trần Quốc Nam, Phó Chủ tịch Ub bhap bini tỉnh Ninh Thuận brei thau, klah rabha di gah bol bala peih ngak dong ka puk palei. 

Hu bruk dong ba njauk tuk di mintri Quốc phòng, Bộ Tư lệnh Quân khu 5, hu dong biak samar song pabak hu hatai khin di bhap bini rah ra. Bruk dong ba njauk tuk di Bộ Tư lệnh Quân khu 5 biak hu makna prong glong song tỉnh cong khin dalam tuk vak anak tal, dom đơn vị di tapon nyaom bol pang phao krong, Bộ Tư lệnh Quân khu 5 brei sangka dong ba ka mik va yam tapa mbang kan kandah kayua pandiak bhang./.