Bruk ngak ia mesin hu rilo urang mai rivang iek duah thau

Kayua jit ruak Covid-19, bruk pablei ikan cơm, tapung ikan tapa Trung Quốc gaok kan kandah. Tui nan, dom palei yau Hàm Tiến, Phan Thiết, Mũi Né … rilo meng pablei aia mesin ka tuai mai rivang ma-in ngak pandap alin hadiah.   

Tuai mai rivang ma-in rilo abih dalam bilan hè, min urak ini, rilo labik rivang ma-in njauk kareik pabah mbang, jalan mbak jua lange. Dom bruk mbang tui yau pablei aia mesin jeng kan kandah tui. Darak pasar prong yau bal raya HCM jeng daok peih bruk brei daok atah di gauk piah pacang caga jit Covid-19. Labik pablei salih kareik pabah mbang nan ye bruk pablei aia mesin jeng trun khang.

Ong Huỳnh Đức Ngọc, po labik ngak aia mesin meng kan Ngọc Định di bal Phan Thiết brei thau, yaok bilan tabung glaong rivang ma-in, labik ngak ia mesin Ngọc Định pablei hu jaik 10.000 lít ia mesin. Thun ini, ong Ngọc kuhria mboh bruk pablei salih di drei trun jaik 50%. Bruk pablei salih aia mesin trun daok takik nan ye bruk blei ikan cơm piah ngak ia mesin jeng trun tui. Hu sa bruk cuang kandah tra, nan lac aia mesin meng kan oh caik suai lavik hu. Kayua lac meyah caik suai lavik, aia mesil nyu par lahik meneing, sambo màu aia mesin jeng jhuk veik, oh daok jangaih saong oh mekre yau tuk camereip.   

Di dom labik ngak aia mesin karei, rilo labik jeng daok peih kho piah blei ikan cơm min oh blei rilo. Ong Nguyễn Hữu Dũng, po labik ngak aia mesin Bà Hai (bal Phan Thiết) brei thau, labik ini khik piah hu labaih 200 tấn. Urak ini, ikan cơm hu rilo min ong Dũng tok brei blei 50% kayua daok huac ka darak pasar pablei tabiak.  

Vụ ikan Nam thun ini mai suai kayua pambak tame angin Tây Nam. Ong Nguyễn Ngọc Tấn (daok di bal Phan Thiết) brei thau, kreih bilan 5 ong brei kapal gilai tabiak tasik. Akaok bilan ikan Nam, ikan cơm mai biak rilo angaok bhum tasik Mũi Né. Yaom ikan cơm akaok bilan trun tagok meng 15.000-17.000 đồng/kg, ngak ka urang taong ikan biak chreih chrai, min yaom pablei urak ini daok trun. Sa-ai Nguyễn Xuân Trường, urang taong ikan daok di phường Phú Hài (bal Phan Thiết) mboh duh hatai, ikan cơm Bình Thuận mbuan laik tame bruk laik yaom. Urak ini, yaom ikan cơm janih 1 pablei ka dom labik ngak aia mesin tok hu meng 10.500-11.000 đồng sa kg, trun meng 2.000-3.000 đồng sa kg dut haong thun dahlau. Sa-ai Trường khan lac, dahlau diah, ikan cơm pablei tabiak negar langiu biak laghaih, ngak jeng pren meriak gauk ngan haong ikan cơm piah ngak aia mesin. Urak ini bruk pablei tabiak negar langiu gaok kan kandah, ikan cơm pablei ka dom labik ngak aia mesin yaom lap nan ye urang taong mek ikan khat rilo. Gaok mai rilo labik ngak aia mesin oh daok blei ikan nan ye hu oh takik urang taong ikan oh daok khin tabiak tasik./.

Urang lang: Jasi -8/7