Meng hu bruk sangka daong ba di Trung ương saong puk palei ka bruk peih ngak sarak bangsa, rai diuk mbang ngui, daok dang di bhap bani Khmer tỉnh Vĩnh Long dak harei dak patagok. Puk palei hu padang ngak jalan mbak nao mai, sang danaok praong, siam. Yaok ribau baoh sang hu daong brei phun jien piah cakrok patagok bruk ngak mbang pala drak, dak harei dak tapa truh kathaot, yam tagok ngak kaya meda, uranaih hu nao bac. Kadha vak di Quốc Dũng angaok harak báo Nhân dân:

Dom thun tapa, tỉnh Vĩnh Long sangka padang ngak kết cấu hạ tầng, patagok bruk pato megru, iek glang pren yava ka bhap bani, abih di nyu nan lac klau  xã biak kan kandah hu salih bahrau mboh di anak meta. Jalan mbak nao mai di 11 xã bangsa urak ini hu siam jang, hu jalan radaih ô-tô nao tal pasak xã, jalan meng xã tal dom ấp nao mai mbuan lagaih dalam bilan pandiak jeng ye bilan hajan.

Sa-ai Thạch Ruôn daok pak xã Tân Mỹ, huyện Trà Ôn bui sambai lac: “Sang dahlak hu dự án daong patagok bruk ngak mbang pala drak alin brei sa drei limo pajaih, tal urak ini menek hu 3 drei la-oi blaoh. Dahlau diah diuk pasang khaol dahlak njauk daok gam angaok taneh di urang karei, tok pacang tạm, sang taik tahak, oh hu bruk ngak hagait tani tanat. Urak ini hu sang paje, daok hu daong brei limo menek nan ye drei oh daok kathaot tra, oh daok kuhria lisei huak,  ao cuk yau dahlau diah tra.”

Jeng meng baoh sang kathaot, hu mesre phun jien piah cakrok patagok ngan haong lãi suất ưu đãi meng dom danak dak, dự án di Karja brei ka bhap bani Khmer kan kandah, urak ini sang sa-ai Kiên Sô Thanh daok di ấp Phù Ly 2, xã Đông Bình, bal sit Bình Minh yam tagok ngak kaya meda, rai diuk hu paglaong. Meng phun jien mesre ưu đãi 10 triệu đồng, sa-ai Kiên Sô Thanh blei hu sa drei limo binai piah raong menek. Meng kham merat ngak mbang, tari tareng, gam yuak hareik raong limo, gam nao ngak pah ka mikva dalam xã, tok labaih sa thun hadei, sang sa-ai Sô Thanh oh daok kan kandah, drei limo binai jeng menek hu sa drei la-oi.

Ong Thạch Dương, akaok Ban Bangsa tỉnh Vĩnh Long brei thau, dom thun tapa, peih ngak dom sarak daong ba urang Khmer dalam tỉnh, dalam nan danak dak  135 hu brei dahlau phun jien labaih 3,46 tỷ đồng padang ngak jalan mbak nao mai saong 5 dự án patagok bruk ngak mbang pala drak piah ngak jeng pren khang patagok kinh tế - xã hội samu gauk ka dom xã hu ralo bhap bani bangsa takik. Peih ngak dom dandak brei ka baoh sang urang bangsa takik biak kan kandah mesre jien piah ngak mbang, tỉnh Vĩnh Long hu brei mesre labaih 15,9 tỷ đồng daong ka labaih 1.500 mbang baoh sang urang bangsa hu phun jien piah patagok bruk ngak mbang pala drak. Urak ini hu biak ralo sarak, danak dak saong dự án daong ka bhap bani urang bangsa meng trung ương tal puk palei hu dom pakat ủy Đảng tacei pato, peih ngak hu siam lagaih. Peih ngak Quyết định ka 54/2012/QĐ-TTg di Thủ tướng Raja-ei ka sarak brei mesre phun jien patagok bruk ngak mbang pala drak ngan haong baoh sang urang bangsa takik biak kan kandah vaktu 2012 - 2015, tỉnh Vĩnh Long hu pasang iek, ngak harak padang angan 1.181 baoh sang bangsa Khmer caong mesre phun jien ngan haong định mức 8 triệu đồng sa baoh sang, abih tih jaik 9,5 tỷ đồng. Yaom lac daok ralo kan kandah, min dalam dom thun tapa, tỉnh hu ralo kham merat langyah abih mbong bruk daong brei taneh daok, taneh pala drak, aia pandar ka bhap bani Khmer kathaot. Tal urak ini, dom xã bhum urang bangsa takik jeng hu jalan điện negar saong hu labaih 98% baoh sang hu điện pandar.

Dom thun tapa, di dom xã hu ralo bhap bani Khmer, gah pato megru hu padang ngak bahrau 40 sang bac meng mầm non tal trung học phổ thông. Abih tih anek saih Khmer dom pakat hu tame sang bac lac 98%. Langiu di bruk bac sap phổ thông, anek saih tiểu học urang Khmer daok hu bac akhar Khmer tui danak dak di Mentri Pato megru. Dalam abih tih 15 sang bac mầm non, phổ thông di klau xã bhum urang bangsa takik daok rilo, hu klau sang bac mek hu chuẩn pakat negar./.