Mai rivang palei ikan bè Bình Thạnh huyện Cao Lãnh, mboh bruk raong ikan bè di mikva biak chreih chrai. Labik ini ralo meng raong ikan điêu hồng, sa janih ikan meng livik mai di labik ini. Langiu ikan điêu hồng, ralo mikva daok raong ikan nàng 2, daok ieu lac ikan thác lác cườm.

Lac urang raong ikan thác lác cườm hu ralo ilamu di palei bè, saai Nguyễn Văn Út jeng hu caga biak rilo ikan thác lác cườm piah pablei tuk lễ saong tết nguyên đán jaik tal. Sa-ai brei thau, thun ini yaom ikan oh glaong yau yaok thun nan ye mikva jeng gaok kan kandah. Kayua nyu hu rilo dinh dưỡng saong mbang bingi nan ye ikan nàng 2 hu ralo urang takre mbang. Saai Nguyễn Văn Út – Xã Bình Thạnh – Huyện Cao Lãnh – tỉnh Đồng Tháp khan lac:“Meyah yaom meng 40.000 đồng tagok ye urang raong hu laba. Daok ala nan oh hu laba. Meng ini tal tết meda pablei labaih 70 tấn. Urak ini urang raong ralo lo. Meyah dom tỉnh karei takik ikan ye yaom meda tagok”.

Gam saong dom janih ikan ia taba karei ye ikan nàng 2 daok hu bhap bini raong biak ralo, abih di nyu nan lac di dom lồng bè tapen kraong Tiền. Siam lagaih di ikan lac praong samar, takik jit ruak nan ye hu ralo baoh sang raong. Nan ye, dalam xã Bình Thạnh urak ini hu labaih 100 lồng bè raong ikan ini, tui kuhria, ikan pablei tabiak darak pasar, abih di nyu nan lac dalam tuk tết lac labaih 500 tấn ikan.

Daok di xã An Phong, huyện Thanh Bình, cơ sở ikan chép giòn Ngư Tiên di saai Lê Văn Dũng jeng daok caga labaih 30 tấn ikan dom janih piah pablei tuk tết anek sak menuk. Dalam nan ralo meng lac ikan chép hồng saong ikan trắm juk. Ini lac dua janih ikan daok hu rilo urang pablei salih mai duah blei. Meng kỹ thuật raong khép kín saong khik kajap quy trình an toàn vệ sinh thực phẩm, cơ sở di saai Dũng hu raong saong pablei ka darak pasar yaok rituh tấn ikan yaok thun. Tuk tết, ikan giòn di cơ sở jeng pachreih hu biak ralo tuai damuai meng dom ban praong mai blei. Saai Lê Văn Dũng, po cơ sở ikan giòn Ngư Tiên, Xã An Phong, huyện Thanh Bình brei thau:“Meng hadei giáng sinh mbiah tal tukvak jaik tết ye urang blei biak ralo. Cơ sở barau ba tabiak darak pasar 2 janih ikan trắm juk saong ikan chép hồng piah ngak đặc sản barau”.

Thun ini kayua halau ia oh siam nan ye bruk palao dom janih ikan đặc sản gaok kan kandah jang. Kayua yau nan ye, tui urang raong ikan di labik ini, ikan thun ini takik jang yaok thun. Tui jalan daok pamaong tal nan lac pablei dom janih ikan barau, đặc sản, cơ sở sangka ruah duah pandar kỹ thuật tame bruk raong.

Thau cambaih bruk darak pasar saong ba tabiak pablei njauk tukvak, ralo urang raong ikan đặc sản di Đồng Tháp daok brei mboh bruk sami samar, lagaih tui bruk drak pasar. Piah tapa nan, pabak bruk blei mbang di urang tuk tết tal mai./.