Yaom lac daok gaok ralo kan kandah min meng hu bruk naih gheih dalam pal akaok, tacei jalan di karja, bruk njauk hatai pachreih tui di bhap bani, dom xã dalam tỉnh Đắc Lắc mek hu ginup 19 tiêu chí dalam danak dak pakat negar padang ngak palei pala bahrau. Kadha vak di H’Xíu, Urang vak di rayo sap ndom VN daok di Tây Nguyên hu khan brei thau ilamu di dom xã mek hu chuẩn padang ngak palei pala bahrau. Daa mikva saong taong abih gauk tui pang :

Tuk danak dak pakat negar padang ngak palei pala bahrau peih ngak di xã Hòa Đông, huyện Krông Pách, tỉnh Đắc Lắc di thun 2011, xã bahrau ngak  hu 7/19 tiêu chí ka palei pala bahrau. Peih ngak danak dak padang ngak palei pala bahrau, dom puk, palei hu ieu pataom bhap bani pilih ruah mBan patagok pakat puk, palei piah peih ngak dom Sarak, jalan ngak di pakat angaok saong di xã tal yaok bhap bani tui ralo jalan ngak. Amuk Lương Thị Đợi, daok pak thôn 17, xã Hòa Đông, huyện Krông Pách lac: “Hu bruk pal akaok di xã jang yau di palei ye mikva njauk hatai ngak tui, daong pren, gul pataom gauk padang ngak palei pala bahrau. Lac sa urang bol, khaol dahlak biak pachreih ui danak dak ini”.

Hadei di jaik 5 thun peih ngak danak dak, tal abih bilan 6 thun 2015, xã Hòa Đông mek hu ginup 19 tiêu chí, mbaok meta palei pala hu ralo salih bahrau, jalan mbak nao mai dalam palei hu tuh xi-măng labaih 90%, sang bac dom pakat hu padang ngak ginup abih, khang kajap, baoh sang kathaot trun daok 3,4% . An ninh trật tự hu khik kajap. Ong Nguyễn Đình Vượng, akaok UB bhap bani xã Hòa Đông brei thau: “Dalam tuk peih ngak tiêu chí kan di abih nan lac tiêu chí ka An ninh trật tự. Dalam dom thun tapa khaol dahlak pataom tame padang lực lượng quân sự, công an. Langiu lực lượng công an xã, padang hu 19 kapul dân phòng di 19 puk, palei hu trang bị ginup abih khan ao, công cụ piah ka dom urang nan mbuan lagaih dalam bruk khik caga an ninh trật tự.”.

Bilan 5-2015,  xã Ea Kao, bal sit Buôn Ma Thuột hu công nhận lac xã mek hu chuẩn Palei pala bahrau. Ini lac xã ngak hu dahlau di abih bruk peih ngak Danak dak pakat negar padang ngak palei pala bahrau pak Đắc Lắc tukvak 2010 – 2015. Ong Phan Văn Trường, Akaok UB bhap bani xã Ea Kao brei thau: “Khin ngak hu bruk ini, khaol dahlak hu bruk tacei pato meng Bí thư Đảng ủy, tal taong abih hệ thống chính trị jeng hu mbaok tame. Khaol dahlak patahu khan, jak ba bhap bani saong bhap bani thei jeng pachreih tui. Dahlau diah puk palei oh rik daong hagait min urak ini jeng rik daong xi măng piah ngak jalan nao mai dalam palei. Mboh bruk nan biak siam, ngak jalan nan piah nao miat miat ye thei jeng khin dang tabiak ngak”.

Tapa bruk peih ngak Danak dak pakat negar padang ngak palei pala bahrau pak Đắc Lắc brei mboh lac, piah mek hu dom bruk ba tabiak, gam haong bruk pal akaok ba jalan naih gheih di karja, kadha praong di abih nan lac bruk njauk hatai pachreih tui di bhap bani. Ini lac kadha prong daong ka bruk peih ngak hu mbuan laghaih saong hu siam mekre./.