Pathau mikva saong taong abih gauk!

Bingu Cúc lac sa dalam dom janih bingu hu rilo menuac takre kayua nyu mekre saong diuk hu livik. Urang pala bingu meda ruah pajaih bingu Cúc tui hatai takre atau tui bruk pala piah pasiam sang danaok. Kadha: “Urang ngak hamu caong thau” harei ini, kol dahlak hu kadha vak tacei jalan pala bingu cúc. Da-a mikva saong taong abih gauk tui pang.

  Taneh piah pala saong jalan ngak taneh piah bingu tamuh siam:

  Njauk pilih taneh samu, tathuak ia siam, hu ia pruh oh njom nerak. Tacoh taneh dahlau sa adit, hadei di nan pok ro glaong ka taneh nyu pasaoh, ngak ka mbaok ro nyu samu bloh buh khak halok ka taneh. Khak hu proi samu angaok mbaok ro, mek jaleing srau khak haong haluk ka nyu samu gauk. Meyah urang pala  caong pala Cúc tame chậu ye meda srau yau ini:  1/2 haluk phù sa lai haong 1/4 khak var ro, srau haong 1/4 xơ dừa. Lingiu di nan, njauk pruh ka nyu samu Ridomil (nồng độ 3g dalam sa lít) piah pametai anek ruak dahlau di tuk pala.

Jalan iek glang piah phun tabiak rilo bingu hu sambo mekre:

Brei gam gam ngak hareik saong pok ro. Tuk phun daok sit, brei pok gha ka nyu glaong. Tuk phun pala hu labaih 40 harei, brei ngak hareik. Urang pala bingu njauk caik hatai tal bruk pruh ia tui dua jalan nan lac tưới rãnh saong pruh angaok mbaok. Tưới rãnh lac pruh brei dauk 2/3 rãnh dalam 1 tal 2 tuk, brei ia njom tame ro bloh hadei di nan tathuak ia tabiak. Tui bruk pasah di bingu, meng 7 tal 10 harei meda pruh sa mbang. Daok bruk pruh ia angaok mbaok, urang pala bingu njauk pruh sit sit tagok mbaok bingu mbiah tal tuk taneh pasah. Lingiu di nan, yaok janih pajaih cúc jeng hu jalan kaoh caduk, cakak dhar karei di gauk. Hadei di tuk pala hu meng 15 tal 20 harei, cakak caduk caik veik 3 tal 4 dhar bingu ngan saong janih cúc hu bingu praong. Urang pala bingu brei bhian cakak caduk saong dom dhar oh siam. Tal tuk tabiak bingu brei cakak klaak dom bingu sit, bingu phụ, caik veik bingu praong, bingu chính piah raong ka nyu praong./.