Phun bạch đàn hu pala jeng glai brei ka drei dom kein laba gah kinh tế, taphia di nan, phun jeng hu pala jeng talei tapen jalan ngak jeng dom talei phun cảnh biak mekre, kayua phun samu tapak, sambo hadah, oh tabiak dhar ala rup phun, ngan haong dom dhar hala mbau pahe, ngak ka drei mboh chreih hatai, njuan njaih tuk nao ala phun Bạch đàn saong dom glai bạch đàn. Kadha “Urang ngak hamu caong thau” harei ini, hu kadha vak ndom tal ilamu pala phun bạch đàn.

Mikva urang nong njauk caik hatai:

1. Ngak taneh:

Dalam puac bilan thu (jaik bilan 5), dom labik taneh biak dốc oh pandar hu mac ye njauk ngak taneh meng jalan jah tak, am cuh. Dom labik taneh samu tapak, pandar mac ủi, san lấp ụ mối, gha phun, hareik harom... pataom veik sa labik blaoh cuh klaak, njauk caik hatai tuk ủi juai palai tayah tal taneh mbaok. Hadei di nan pandar dàn li-ua 3 chảo saong 7 chảo li-ua dua mbang, dalam meng 20 tal 30cm. Meyah pala Bạch đàn pak dom tỉnh  miền Tây njauk tagok ro.

Tuk tagok ro njauk caik hatai: 

Meyah tagok ro meng tangin: ngak jeng luống prong 3m, glaong 8 tấc, kênh prong 5m. Tagok ro meng mac (mac Challenger 2 "step") ngak jeng ro prong  2 m 3, glaong 3 tấc, kênh 2 m 3.

2. Takac lubang pala

Dalam sa hecta pala meng 1.500 tal 2.000 phun. Lubang takac prong 20x20x20cm. Hu buh khak halok atau oh tui bruk đầu tư saong tui janih taneh. Meyah hu jien njauk buh halok chip tame gha phun. Meyah pala glai pandar mac ye njauk pala talei atah talei 3 m meteh, daok phun atah phun meng 2m tagok.

3. Ilamu pala

Tukvak pala bhian laik tame akaok bilan hajan, meng kreh bilan 6 tal abih bilan 7. Dahlau di tuk pala njauk tuh aia ka phun anek, cakak klaak kadung ni lông, juai ngak patuh paok haluk, caik phun tapak tame kreh lubang, takoi gha biar jang mbaok taneh jaik 2cm, lam haluk trun vin taom dhar, kateik ka nyu katil mboiah, khik ka phun nyu tapak.

4. Iek glang:

Hadei di tuk pala hu sa bilan nao mong iek mboh phun halei metai njauk pala halok, hadei di 3 bilan pasang iek mboh phun diuk 90% nan lac hu. Sa thun meda ngak hareik dua mbang pagam haong buh khak (khak van ro 2kg sa gha atau 100g NPK sa gha  tui điều kiện). Bruk pandar dom jalan ngak lâm sinh yau: Ngak taneh toàn diện saong buh khak, bruk praong tagok yaok thun thun gah đường kính saong chiều cao jeng njauk glaong jang dom  phun hu pala dalam tukvak yau gauk min oh buh khak saong oh ngak taneh toàn diện./.