Bình Dương ba nao daok pa-atah yau haong 26 urang meng Hải Dương tame Bình Dương hadei di mbang padeih Tết

Jabat Rajaei bahrau hu harak brei thau ka panuac tamat di Thủ tướng Nguyễn Xuân Phúc dalam mbang nyaom di Rajaei ka pacang caga jit Covid-19. Thủ tướng ieu dom tỉnh ban daok hu jit brei pataom prein ngak dahlau bruk pasang iek jit ruak, khang hatai oh caik brei njom mbak praong, jhul khang bruk pacang cakak labik njom mbak, samar duah urang taom gaok, dut iek praong saong samar drah, peih bruk pacang caga jit hu siam lagaih meng gah y tế saong bruk kinh tế - xã hội, khik kajap bruk peih ngak hu 2 bruk nan. Thủ tướng ieu Mintri Y tế tacei pato langyah gen dom janih virus bahrau samar jang piah samar hu jalan pacang caga ka nyu lagaih.

Jala pandiak 18/2, Pasak pasang iek ruak kik TPHCM (HCDC) brei thau, urak ni ban raya oh hu urang halei njom bahrau Covid-19. Urang njom Covid-19 duah mbho di ban raya lac 210, dalam nan 165 urang thit ruak, 45 urang dok iek ruak. Tal urak ni, TPHCM hu taduan 3.528 urang pathau khan y tế, ba brei dok karei 155 urang. Tapa duh iek meneing 3.464 urang, hu 3.266 urang âm tính, 198 urang dok cang kết quả.

UBND tỉnh Bình Dương brei thau, gah ngành chức năng hu pasang iek saong ba nao daok pa-atah di labik praong 26 urang meng Hải Dương tame Bình Dương hadei di mbang padeih Tết thun sak kubao. Tui kuhria, anak tal meda hu jaik 500.000 rang ngak meng Bình Dương nao palei mbang Tết blaoh mai veik ngak bruk. UBND tỉnh tacei dom gah, dom puk palei duah thau cambaih bruk urang ngak, peih ngak catang bruk khai báo y tế saong dom bruk pacang caga jit ruak di labik ngak bruk. 

Dom harei akaok thun bahrau 2021, bhap bini di "bhum taneh" thanh long Bình Thuận biak tatuah drei tuk janih boh kayau ni tagok glong, yaom meng 17-20 ribau đồng/sa kg. Ni lac yaom glong di abih dalam rilo bilan tapa. Hiệp hội thanh long Bình Thuận brei thau, dom doanh nghiệp blei thanh long di pak ni hu ngak bruk veik, peih mbaok akaok thun yau nan ye ba tal bruk boh oh ginup pablei. Meng nan yaom thanh long tagok khang. Min, bruk tagok yaom ni meda lac "tagok di anak meta" song meda srau kadau dalam tuk vak anak tal.

Pasak kuhria mboh dahlau bruk langik tasik pakat negar khan lac, dalam 3 harei tal, di Hạ Long (Quảng Ninh), Hải Phòng haong Hà Nội meda hu tanut UV (tia cực tím) meng mbiah (lac 3-5) tagok tal tanut jhak glaong (lac 6-7). Dom ban praong di Trung bộ hu tanut 6-8, daok dom ban praong di Nam bộ hu tanut UV jhak biak glaong (9-10). Meng ini tal harei 26/2, di Nam bộ melam oh hu hajan, harei pandiak. Đông Nam bộ melam haong mesup langik la-an.

Dom gilang pandap mbang di Anh dok dang anak bruk mbang pandar tagok glaong kayua dak harei dak hu rilo sang khin hu pandap mbang pabak brei saoh dalam tuk jit Covid-19 rah tabiak srau kadau. Dahlau deih, yaok gilang pandap mbang di Anh pabak brei saoh labaih 70 kiện pandap mbang yaok adit. Min, urak ni tagok labaih 300 kiện, tui kuhria parabha ka labaih 800 urang song meda tagok glaong meyah jit ruak oh hu pasiam veik.

Harei ini (18/2), sa kapul tin tặc hu angan ieu lac Myanmar Hackers ngak brei dang veik rilo website di karja kayua bol bala Myanmar pasang iek. Bruk taong tame mạng rah tabiak dalam tuk bol bala Myanmar cakak klaoh Internet harei ka 4. Dahlau di nan, yaok rabau urang Myanmar trun jalan cagar veik bruk bol bala tagok pan karja. Bol bala Myanmar sanya peih bruk bầu cử saong jao veik karja, saong tah klaak panuac lac pajaleih karja.

Harei 17/2, kapan haoh Boeing 737 MAX hu peih mbang pajeng tuai camereip di châu Âu hadei di tuk janih kapan haoh ni oh brei par dalam 22 bilan kayua 2 mbang gaok bala angaok langik biak trak di Indonesia song Ethiopia, ngak brei abih tih 346 urang metai. Dom urang pasang iek ndom lac makna prong ba tal bala nan kayua sa labik langyah mbang par nyu suan. Brazil lac negar camereip brei adat ka Boeing 737 MAX peih gilac veik, patui di nan lac Mỹ song Canada./.

Urang lang: M. Phương – Hani Pha – 18/02 16:00:00