Urang tame VN hu pathau khan song brei dok karei chip 

Jabat rajaei bahrau hu harak brei thau panuac di Thủ tướng rajaei ka bruk peih mbang par ba urang Việt Nam di negar langiu  mai palei di quý 1-2021. Kayua hu anek ruak bahrau di virus Covid-19 njom mbak samar jang di rilo negar, Thủ tướng rajaei tacei brei takik di abih dom mbang par ba menuac tame Việt Nam meng ni tal Tết. Meyah mboh lac njauk ngak, yaok mbang par taduan urang mai hu dom  mintri: Y tế, Ngoại giao, Quốc phòng, Công an, jalan mbak pajeng ba, pathau khan Thủ tướng pasang iek, brei panuac. Dom urang tame VN njauk brei dok karei katut harei  brei paatah di gauk 14 harei, oh kuhria dom menuac kayua mintri  Ngoại giao pasang iek langyah.

Pasak pasang iek ruak kik tỉnh Bà Rịa – Vũng Tàu bahrau brei thau ka bruk 2 urang negar Nga tapa dut iek mboh dương tính haong SARS-COV-2. "Urang ruak ka 1334", umo 31 thun, gam haong anek kumei sa thun dương tính veik haong nCoV hadei di 16 harei thit ruak. Pasak pasang iek ruak kik Bà Rịa -Vũng Tàu hu ba dua anek maik nao daok karei, taong ruak; urang pasang saong dua urang ngak gah y tế hu brei daok karei di labik praong; 11 urang F2 daok karei di sang. Bà Rịa - Vũng Tàu tal urak ni oh mboh urang halei njom ruak dalam rahra. Tỉnh daok taong ruak ka 71 urang ruak Covid-19 abih tih jeng lac urang tame negar.

Viện Kiểm sát bhap bini TPHCM bahrau mbaoh tangin tame harak brei  Dương Văn Hậu, umo 29 thun - "urang ruak 1342" tabiak kaoh tui hukum ka bruk ngak brei njom mbak jit ruak ka urang karei tui paka  240 Bộ Luật Hình sự 2015. Urang likei duh tuai angaok kapal haoh Vietnam Airlines njauk duas  oh ngak tui hukum brei paatah di gauk, njom mbak  nCoV ka 3 urang karei. Bruk ni hu ba tabiak hadei di labaih 1 bilan Công an TPHCM khởi tố bruk nan. Harei  22/12/2020, Hậu song  3 urang ruak pagam tal lac 1347, 1348, 1349 hu iek abih  ruak Covid-19.

Dah page (12/1),Trịnh Sướng,54 thun,urang kaya mada gah xăng manyek di miền Tây, njauk ba tabiak langyah tui hukum gam saong 38 urang karei dalam bruk ngak tabiak xăng giả praong abih.Tapa pasang iek mboh lac, meng thun 2017 tal thun 2019, dua kho xăng manyek di Trịnh Sướng daok di SócTrăng saong Cần Thơ hu ngak tabiak labaih 137 triệu lít xăng giả dom janih, samu yaom xăng biak lac 2.492 tỷ đồng. Sướng saong kol tangin takai di nyu hu pablei pandap ja tapa 8 labik pablei xăng manjeik di drei saong pablei ka yaok rituh labik pablei lẻ di dom công ty karei. Phiên toà tui kuhria dui atah dalam 18 harei.

Jalan krong Cái Lớn - Cái Bé hu phun jien buh tame ngak abih labaih 3.300 tỷ đồng hu ba pandar sa cống di bilan anak tal piah pasang iek njom mbak ka jiak  20.000 ha dalam bilan thu thun ni. Mban khik ramik song padang ngak krong ribong 10 (Mintri ngak nong song patagok palei pala) brei thau, bruk padang ngak jalan krong ribong prong abih di gah pai dok hu jhul khang piah samar ba tame pandar. Langiu di cống Cái Bé hu pandar di kreih bilan  2 tal,  cống Cái Lớn hu ngak salah  song caik van di bilan 6. Danak dak hadei di tuk ngak salah bloh hu pasang iek, parabha ia ka dom tỉnh Kiên Giang, Hậu Giang, Cà Mau song Bạc Liêu ngan saong taneh pala prong labaih 384.000 ha.

Gah Dân chủ di Hạ viện Mỹ harei 11/01 hu yaih khan sarak kaok duas Tổng thống Donald Trump ngan haong bruk lac pachreih gauk ngak srau kadhau. Tui nan, dom panuac ndem di Tổng thống Trump ka bruk bleih saleih dalam bruk pilih ruah nyu pachreih urang trun jalan ngak srau kadhau di jabat sang Quốc hội harei 6/01. Dom Hạ nghị sỹ Dân chủ jeng duah jalan brei tapa sa sarak karei ieu Phó Tổng thống Mai Pen-xơ (Mike Pence) saong rajaei pajaleih Tổng thống Trump tui Tu chính án 25. Min, sarak ni gaok bruk cagar veik di dom hạ nghị sỹ cộng hòa saong Hạ viện meda njauk buh phiếu ka sarak ni dalam harei 12/1.

Uang dang akaok Gah Y tế dunya WHO Tê-đrốt Át-ha-nôm Ghê-brê-yê-sút (Tedros Adhanom Ghebreyesus) hu pok meyaom bruk  Trung Quốc brei adat ka 1 nyaom urang ilamu dunya tal negar ni piah duah thau ka asal di virus Sars Cov-2 song jalan virus njom tame rup menuac. Dahlau di nan Ủy ban Y tế negar Trung Quốc brei thau  meng harei 14/1, nyaom 10 urang ilamu di  WHO tal ban Vũ Hán di tỉnh Hồ Bắc, labik virus ni mbang camereip di abih hu duah mboh di puac thun 2019.

Nhật Bản bahrau duah mboh sa anek ruak bahrau di virus SARS-CoV-2 mboh nyu karei jang anek ruak hu duah mboh di Anh saong Nam Phi. Bruk duah mboh ni daok brei mboh dom kan kandah di janih virus ba tal Covid-19 saong oh njauk iek lap anak dom kan kandah di jit ruak. Tui mintri Y tế - Lao động saong Phúc lợi Nhật Bản, anek ruak nan hu dalam 4 urang, dalam nan hu 2 urang praong thun saong 2 ranaih. Urak ni jabat y tế Nhật Bản jeng ka oh brei thau cambaih hu jalan njom mbak saong tanut kanjak jhak di anek ruak bahrau ni./.

Urang lang: Hanipha-Thu Thảo -12/1