Thủ tướng hu panuac ieu Akaok Mintri y tế brei klauk ginup vacxine ka tong abih rahra 

Harei 14/12, Jabat Rajaei hu harak brei thau panuac di Thủ tướng Rajaei ieu Akaok Mintri Y tế peih nyaom biai haong dom chuyên gia, urang ilamu dalam bilan 12 piah hu jalan pacang cakak, pasang iek, jhul kadun likuk dom urang njaom Covid-19 trak tagok saong metai. Thủ tướng jeng hu panuac ieu Akaok Mintri Y tế tacei pato dom jalan ngak jhul samar bruk klauk vaccine caga Covid-19; pathau khan dom jru vaccine caga Covid-19 mai dalam bilan 12 piah klauk ginup tui bruk daok caong, bruk peih ngak xã hội hóa jru taong ruak Covid-19 saong ba tame tani tanat yaom kaom.

Bier harei 14/12, Sở Chỉ huy pacang caga jit Covid-19 tỉnh Cà Mau brei thau, dalam harei, dalam tỉnh hu 1.001 urang njom Covid-19, dalam nan hu 859 urang dalam rahra. Ni lac mbang akaok meti tỉnh ni hu  dom urang njom yam tapa tanut 1.000 urang sa harei. Anak bruk jit ruak Covid-19 daok rahtabiak sarau kadhau, Sở Y tế tỉnh Cà Mau hu harak ieu kakei taong abih dom labik y tế di karja saong langiu karja patui viek daong prein tame dom bruk pacang caga jit; abih di nyu nan lac hu mbaok tame bilai y tế nao mai piah daong ka dom labik paglaong bruk sangka iek glang, pato tacei taong ruak F0 di sang, trun trak damak ka dom labik y tế.

Hadei di 11 thun peih ngak danak dak "Pato pakai bruk ngak ka urang ngak palei pala tal thun 2020" di Sarak ka 1956/QÐ-TTg harei 27/11/2009, bruk pato bruk ngak ka urang ngak palei pala hu ba mai rilo siam lagaih, meng nan, paglaong ilamu menuac ngak, pasiam bruk ngak, paglaong jien mek tame ka urang ngak, rik daong padang ngak palei pala bahrau saong patrun kathaot khang kajap. Min tui taong yaom di Gilang pariak dunya, yaom lac hu dom jak jeng praong, min Việt Nam jeng oh ka ngak hu abih saong hu dom cuang kandah bahrau dalam patrun kathaot, dalam nan kathaot jeng daok pambuak tal bruk bac da-a saong ilamu ngak bruk biar.

Piah ka bruk rivang main samar hu pasiam veik, samar mek viek bruk jhul samar patagok dalam tuk siam makre bahrau, tỉnh Ninh Thuận hu ba tabiak rilo jalan langyah piah pachreih tuai mai rivang main, ba bruk du lịch lagaih salamat, siam makre, khik tani tanat bruk pacang caga jit COVID-19. Anak meta tỉnh brei peih pambang raok tuai du lịch dalam taneh ia ngan haong danak dak “Urang Việt Nam nao rivang main di Việt Nam”. Tui nan, tuai rivang main tuk nao tal Ninh Thuận njauk klauk ginup 2 mbang vaccine caga COVID-19 atau thit ruak oh tapa 6 bilan kuhria meng di tuk pasang iek jit; gam tui di nan jeng hu dut iek SARS-CoV-2 mboh âm tính daok dalam tukvak lac 72 maong.

Sở Padang ngak tỉnh Bình Thuận bahrau taong phat hành chính Cty Cổ phần Thiên Hải – po padang ngak danak dak labik biệt thự cao cấp saong ravang me-in – padeih padei đồi Hòn Rơm di phường Mũi Né, ban sit Phan Thiết, kayua padang ngak 24 khối móng oh hu harak adat. Dahlau di nan, Cty Cổ phần Thiên Hải jeng njauk UBND tỉnh Bình Thuận taong phat 300.000.000 đồng kayua peih bruk padang ngak labik biệt thự cao cấp saong ravang me-in – padeih padei đồi Hòn Rơm min oh hu pathau khan ka bruk pambak tal alam môi trường hu pasang iek brei adat ngak tui hukum.

Klauk jru vaccine caga Covid-19 paglaong meda daong pacang bruk njom mbak di jit Covid-19 tuk dom urang caong hu daong rilo di abih meda pambuak haong vắc-xin aval di abih. Tổng Giám đốc Gah Y tế dunya  Tedros Adhanom Ghebreyesus hu ndem yau nan dalam sa mbang ginum biai online di harei kabroi. Langiu di nan, urang dang akaok gah Y tế jeng brei mboh duh hatai ka dom taneh ia kaya mada hu jhul samar bruk klauk jru paglaong hadei di tuk rahtabiak biến thể Omicron meda ngak viek bruk khik piah vắc-xin, ngak ka bruk oh samu gauk dak harei dak trak damak jang. Urak ini hu 77 taneh ia hu mboh dom urang njom biến thể Ô-mi-crôn; dom taneh ia oh njauk taong yaom bier ka biến thể ni kayua nyu daok njom mbak biak samar ka oh bhian mboh di dom biến thể dahlau dieh.

UB châu Âu (EC) harei kabroi ba tabiak dom ramik veik di“Harak pambuak bruk tự do nao mai haong gauk” (Schengen) tui jalan patagok quyền pasang iek jalan tapen negar dalam EC ka dom taneh ia di EC jeng yau jalan ngak catang pasang iek jalan tapen negar gah langiu piah pacang hu siam jang anak bruk rilo menuac di cư bahrau. Tui dom ramik veik hu UB châu Âu (EC) brei thau, sa taneh ia di Hiệp ước Schengen hu adat brei dui atah tukvak kreik pabah mbang negar di drei dalam 90 harei, salih ka 60 harei yau urak ini. Meyah daok caga pacang haong dom bruk mbuan njaom mbak oh kuhria mboh dahlau hu, tukvak ini hu tagok jang, meng 06 bilan tal 2 thun saong meda dui atah jang.

Harei 14/12, sa radaih bồn pajeng manjek patuh di ban pabah lamnge Cap-Haitien di Haiti ngak ka labaih 40 urang metai saong yaok pluh urang njauk rambuac. Bruk patuh rahtabiak di tuk hu rilo menuac pataom vil val labik bala nan. Thủ tướng Haiti Ariel Henry khan lac taneh ia ini meda peih bruk pakat negar dalam 3 harei piah hadar dom urang njauk bala metai dalam mbang patuh radaih bồn ni. Kapul chức năng daok samar padang dom sang iek ruak dã chiến piah taong ruak ka dom urang njauk pandung dalam mbang patuh kayua sang iek ruak di pak ini daok tapa prein./.

Urang lang: Thu Thảo -Mousaphuong-15/12