Sở Jalan mbak pajeng ba tỉnh Sơn La padeih bruk pajeng ba tuai meng radaih ôtô meng Sơn La tal Ban Hà Nội

Jaik 400 urang birau njom Covid-19 hu mboh dalam tukvak katut panak di Bắc Giang nan mai meng tỉnh ini saong dom gah pambuak tal di Mentri Y tế, Mentri Quốc Phòng samar dut iek ruak dalam kalau harei tapa. Bruk mek mau dut iek ruak hu peih ngak di taong abih dom sang mac dalam labik ngak kong saong labik daok di urang ngak dalam tỉnh. Urang F1 jeng urang F0 di Cong ty SJ Tech meblah jaik 80% saong bruk nan di C.ty Hosiden lac 55%. Taong abih dom urang ngak nan dahlau di tuk dut iek mboh dương tính abih gauk hu daok di labik brei daok pa-atah tui Sarak 16 yau nan ye pasang khik hu ruak njom mbak. Akok Mentri Y tế Nguyễn Thanh Long iew tỉnh ini brei khik catang bruk daok karei, ngak tui bruk ba tabiak lac brei daok paatah di gauk di dom labik sang daok di urang ngak, labik nan iek nan yau labik daok karei. Oh brei urang daok labik brei pa-atah tabiak gah langiu.

Panuac khan meng dhar kapul taong ruak, mBan tacei jalan pacang caga jit pakat negar brei thau, hu jaik 150 urang ruak dalam 2.800 urang ruak COVID-19 daok taong ruak dalam trak damak atau daok trak tagok. Dalam nan, 4 urang biak trak, mbuan metai, daok pandr ECMO (jamriak tim phổi langiu rup pabhap). Dalam abih tih urang ruak daok taong ruak, dom urang ruak oh ka mboh hu hagait meblah 55%, urang ruak mboh hu ruak njul jaik 37%; hu dom urang ruak mboh lac meda trak tagok, daok hu patuk, pandiak, saong daok trak tagok, hu dom urang ruak trak saong mbuan metai. Dut saong dom mbang jit dahlau, urang ruak oh hu triệu chứng biar jang.

Meng tuk kreh melam ini 26/5 mbiah tal tuk hu puac khan birau, Sở Jalan mbak pajeng ba tỉnh Sơn La padeih bruk pajeng ba tuai meng radaih ôtô di dom jalan, radaih hợp đồng, radaih dulich, radaih taxi nao saong mai meng Sơn La tal Ban Hà Nội, langiu dom radaih duh ka bruk pacang caga jit, radaih ngak bruk karei duh ka jabat chức năng. Mbiah tal tukvak ini, tỉnh Sơn La brei padeih peih radaih pajeng tuai tal 15 tỉnh, ban, lac: Hòa Bình, Điện Biên, Nghệ An, Hà Tĩnh, Thanh Hóa, Hải Phòng, Quảng Ninh, Lào Cai, Lai Châu, Yên Bái, Phú Thọ, Tuyên Quang, Thái Nguyên, Ninh Bình và Hà Nội.

Harei 25-5, Akaok Mintri Y tế Nguyễn Thanh Long lambaok ka Mintri Y tế taduan mek 15 tỉ đồng saong 1 triệu mbang vắc xin caga COVID-19 meng lambaok Gilang pariak TMCP Sài Gòn - Hà Nội saong T&T Group. Jeng dalam harei 25-5, Gilang pariak TMCP Sài Gòn - Hà Nội (SHB) jeng hu alin hadiah 15 tỉ đồng brei ka Mintri Y tế piah blei vắc xin pacang caga jit COVID-19. Dahlau di nan, harei 24-5, T&T Group hu daong ka 2 tỉnh Bắc Ninh saong Bắc Giang pok jien 5 tỉ đồng haong 1.000 tấn brah. Mintri Y tế kuhria mboh lac Việt Nam caong blei 150 triệu mbang vắc xin pacang COVID-19 piah klauk ka labaih 75 triệu menuac. Abih tih yaom jien piah blei lac 25.200 tỉ đồng.

Tukvak 3 tuk 40 minit page ini 26/5, apui khuah di Gilang pariak VP Kiên Giang labik jalan Trần Phú, Ban Rạch Giá. Di labik ini, sauk juk par tagok me-om abih labik nan saong mbau sauk trak. Mikva pak ini jan pabah mbang, iew urang khik iek min oh mehit. Labaih 15 minit hadei, Cảnh sát pacang khuah padam khuah Công an tỉnh brei radaih saong kapol urang mai padam khuah. Tuk tabung glong hu tal 8 sruh tadaih mai padam apui. Mbiah tal mong 6 page, apui khuah hu padam, pacang apui khuah tapa labik karei. Yau nan min, gah pacang padam apui khuah daok brei radaih mai veik piah padam gah dalam labik nan.

Nhà Trắng harei kabroi brei thau lac jeng oh ka hu ginup kadha piah brei thau ka asal di virus corona, hu panuac ieu peih sa bruk duah thau độc lập ka bruk ini. Dalam tuk nan, Hãng tin Reuters ba panuac di Rajaei Mỹ brei thau lac dom jabat tình báo Mỹ daok pasang iek dom pathau khan ka bruk lac dom urang roh duah di Trung Quốc njauk ruak dahlau meng tuk taneh ia ini hu dom urang ruak COVID-19 camereip abih di bilan 12-2019. Urang brei panuac di mintri Ngoại giao Trung Quốc Triệu Lập Kiên hu panuac phản đối saong lac bruk ndom nan suan, oh biak yau nan.

Malta, sa negar di Liên minh châu Âu, hu jeng taneh ia akok meti tabiak panuac lac mek hu bruk oh njom mbak jit dalam bhap bini kayua hu klauk jru vaccine caga ruak Covid-19 ka 70% urang umo dam dara ngan saong takik di nyu lac klauk hu sa mbang. Tal urak ini taneh ia ini hu abih tih 30.506 urang njom mbak saong 417 urang metai kayua jit COVID-19 (tui blah web Worldometers mon 13tuk harei 25-5).

Dom mbang ngak iek tên lửa phòng không S-500 di Nga daok rah tabiak dalam siam mekre saong tui kuhria, samar hu pabak ka dom tapon nyom bol pan phao kraong di taneh ia ini. Ini lac panuac khan di Tổng thống Vladimir Putin dalam mbang nyaom di Sochi haong dom urang pan akaok Mintri Quốc phòng saong lambaok dom doanh nghiệp công nghiệp quốc phòng harei 25/5. Pambuak tal bruk pasiam gah tapon nyom bol pan phao kraong, ong Putin ndom lac meng bruk srau kadau di angaok dunya saong dom bruk mbuan ba tal srau kadau di tapen negar Nga, dom tapon nyaom bol pan phao kraong brei caga mesruh di tanut glaong./.

Urang lang: M. Phương – Ái Nghiêm – 26/05 10:39:45