Labaih 2 thun ini mai, mô hình pala njam hacih tui tiêu chuẩn Viet Gap di ong Nguyễn Mạnh Thắng, daok di thôn Trung Nghĩa, xã Hòa Ninh, huyện Hòa Vang, bal Đà Nẵng ba mai kein laba glaong. Ong Thắng brei thau: puac thun 2016, ong buh tabiak labaih 2 tỉ đồng, kaoh klak 1 héc-ta phun keo, ủi haluk ka nyu tapak samu, ngak lồng kareih camin, hệ thống pruh aia, blei thiết bị pala njam hacih công nghệ glaong.

Tui ong Thắng, pala njam dalam sang kareih camin khik hu độ ẩm, ánh sáng. Taphia di nan, hệ thống pruh aia tự động daong ka phun njam cakrok patagok siam. Urak ini, mô hình ngak njam hacih tui Viet Gap di ong Thắng angaok mblang taneh 20.000 m2, ralo meng pala dom janih njam yau sabei, njam pual, xà lách, baoh paya, baoh tamun ia, kadhaoh, amariak Nhật, amariak Đà Lạt.

Yaok thun, ong Thắng pablei tabiak darak pasar labaih 500 tấn njam patam dom janih. Ong Thắng kuhria mboh lac, hadei di tuk kaoh abih phun jien buh tame, ong daok laba hu labaih 300 triệu đồng. Ngak mbang dak harei dak hu kein laba, ong Thắng dang tabiak padang Hợp tác xã njam patam, baoh karaoh Hòa Vang, ba bruk ngak ka bhap bani dalam palei ngan haong yaom jien mek tame 5,2 triệu đồng yaok urang yaok bilan. Ong Nguyễn Mạnh Thắng, Akaok Hợp tác xã njam patam, baoh karaoh Hòa Vang, bal Đà Nẵng brei thau: Hu Karja daong 50% jien phun piah ngak 2 mô hình pandar công nghệ glaong akaok meti di bal Đà Nẵng. Dalam nan, drei pala dom chuỗi njam hacih bahrau abih di bruk ngak nong urak ini ngak habar ngak tabiak chuỗi an toàn ka mikva sahanang hatai. Pambuak bruk haong urang nong piah ngak tabiak dom mô hình ini daong ka mikva dalam palei hu bruk ngak tani tanat. Anak tal drei peih cơ sở ka 3. Drei buh jien tabiak ralo, min hu laba lac hu paje.

       Ong Đặng Phú Hành, Phaok akaok UB bhap bani huyện Hòa Vang, bal Đà Nẵng brei thau: huyện Hòa Vang nan lac labik hu mblang taneh ngak nong prong abih bal ngan haong 65 hécta. Dom thun tapa, bruk ngak nong di huyện Hòa Vang hu cakrok khang, năng suất, sản lượng phun pala, anek athur raong hu patagok. Urak ini, dalam huyện Hòa Vang hu labaih 20 mô hình pandar công nghệ glaong dalam bruk ngak nong… akaok mereip ba mai kein laba hu mboh di anak meta. Tui ong Đặng Phú Hành, huyện Hòa Vang meda padang dom cơ sở dịch vụ duh ka bruk cakrok patagok bruk ngak nong công nghệ glaong. Khaol dahlak peih tabiak bruk ngak nong tui jalan lac ngak nong công nghệ glaong duh ka bal Đà Nẵng. Tapa nan dalam bruk ngak ini, dalam dom thun tapa khaol dahlak hu panuac iew dom doanh nghiệp dom nhà đầu tư hu ilamu kinh nghiệm dalam cakrok patagok bruk ngak nong công nghệ glaong di Lâm Đồng mai đầu tư dalam huyện. Bruk njauk biai nan lac, dom pandap panda kaya nong di huyện Hòa Vang thun ini pablei hu grap tanat saong hu labik dang dalam darak pasar. 

  Bal Đà Nẵng lac sa dalam dom labik daong pren ralo ka urang nong jhul pakhang bruk pandar công nghệ glaong tame bruk ngak nong. Gah ngak padai, bal hu daong meteh yaom jien blei thiết bị, hệ thống pruh aia patak pataom, phun sương jeng hu daong  meteh yaom jien lắp đặt. Yaok thun, gah ngak nong bal buh tabiak 300 tal 500 triệu đồng, daong ka urang nong ba ilamu kỹ thuật pandar công nghệ glaong tame bruk ngak nong. UB bhap bani bal Đà Nẵng hu mboh tangin phê duyệt quy hoạch 7 labik patagok bruk ngak nong công nghệ glaong, pataom tame bruk ngak njam hacih sa-at, raong anek athur menuk ada, ngak bimao pablei saong ngak jru. Ong Võ Công Trí, Phaok Bí thư Thường trực Thành ủy Đà Nẵng brei thau: Đề án jhul khang bruk pandar công nghệ glaong tame bruk ngak mbang pala drak mek hu jak jeng siam mekre tuk akaok mekreip. Taong abih phun jien buh tame dalam bruk ngak nong labaih 30 tỷ đồng saong nyu hu ngak jeng dom salih bahrau biak siam ka bruk cakrok patagok kinh tế xã hội dalam huyện Hòa Vang. Dom dự án pandar công nghệ glaong, dom quy hoạch khaol drei daok peih ngak jeng hu siam mekre, kein laba tuk akaok mereip./.