Viet Nam brei klauk abih urang mbang ka sa dalam bilan tal

Jala pandiak ini, gah klauk jru VNVC hu jao gac 1.317.500 mbang vaccine Covid-19 di AstraZeneca brei ka Mintri Y tế. Yau nan, tok dalam bilan 9/2021, VNVC hu jao labaih 5 triệu mbang vaccine AstraZeneca brei ka Mintri Y tế, samar pabak brei ka ban raya HCM haong dom tỉnh, ban pacang jit. Dom lô vắc xin ini daok dalam Harak pambuak bruk di Gah klauk jru VNVC kakei blei dahlau 30 triệu mbang vaccine Covid-19 di AstraZeneca meng puac thun 2020. Tal urak ini, tui harak pambuak bruk ini hu ba mai jaik 15 triệu mbang vaccine pacang Covid-19 ka Việt Nam.

Tui kuhria, ban raya HCM brei tabiak sarak bahrau pambuak tal pacang caga jit di ban raya, hu ba pandar meng harei 1/10. Tui nan, bruk pajeng ba tuai nao mai, jalan radiah, jalan pasei, jalan ia hu peih ngak veik oh tapa meteh prein. Brei adat peih dom bruk pataom rilo menuac di gah langiu langik, dalam sang min ala 10 urang. Meyah klauk ginup vaccine atau F0 abih ruak, hu pataom gauk ala  50 urang. Dom bruk thể dục thể thao praong oh tapa 30% prein. Labik cakak mbuk ngak bruk oh tapa meteh prein.

Tui yaok pataom oh ka ginup abih, kuhria tal harei 26/9, dom tỉnh, ban bhum bhap bini bangsa takik hu jaik 678.500 urang njauk COVID-19. Dalam nan, hu labaih 15.000 urang bangsa takik, di bhum Tây Nam Bộ hu 1.355 ca; bhum kreh negar haong Tây Nguyên 1.499 urang. Min rilo di abih jeng lac di ban raya HCM haong dom tỉnh Đông Nam Bộ hu jaik 10.500 urang.

  Tui Sở Pato Megru Đắk Lắk, dalam tỉnh hu labaih 60% anek saih tiểu học oh ginup pandap piah bac online, rilo meng lac anek saih bangsa takik. Piah lang talaih kan kandah, Sở Pato Megru tỉnh ieu dom sang bac peih dom jalan pato bac ka nyu lagaih. Dom adei oh hu máy tính, phone tangin, tivi, gru ngak bài pato, hu jalan tui iek, duah thau bruk bac da-a di anek saih piah samar ramik ka siam. Daok anek saih tiểu học, gru jao bài ka anek saih tui jalan phiếu bac da-a piah tacei pato dom adei bac eng.

Bình Thuận daok padang jalan ba du lịch mai ngak bruk veik dalam siam mekre bahrau. Tui kuhria tỉnh brei peih ngak iek bruk peih pabah mbang raok tuai meng harei 20/10 tal harei 25/12/2021 di dom hotel hu brei angan lac meng 3 - 5 patuk atau samu nan, labik ravang iek mek hu tanut siam mekre salamat hu UB bhap bini tỉnh pok brei. Labik peih ngak iek rilo meng lac di ban Phan Thiết, daok dom huyện, ban karei iek tui bruk daok rah tabiak bo peih ngak iek.

Bruk klauk vaccine praong abih dalam sajarah anek menuac daok rah tabiak ngan haong labaih 6 tỷ 120 triệu mbang vaccine COVID-19 hu klauk di angaok dunya. Dalam nan, Trung Quốc rilo abih ngan saong 2 tỷ 190 triệu mbang. Patui di nan, lac Ấn Độ labaih 855 triệu mbang hu klauk bloh. Ini lac 2 taneh ia rilo menuac abih di dunya. Min jeng daok 3 taneh ia oh ka peih bruk klauk vaccine caga COVID-19 lac Burundi, Eritrea haong Triều Tiên.

Meng labaih 40 triệu mbang vaccine COVID-19 daok hu, Mỹ jia lac hu ginup vaccine klauk ka urang taha caong klauk mbang 3 saong uraniah umo ala 12 thun, lac umo thun hu gah y tế Mỹ brei adat klauk di tukvak anak tal. Tal urak ini, jeng daok labaih 70 triệu urang Mỹ ka oh klauk. Urang y tế daok hu panuac ieu rahra klauk pacang, dalam tuk menuac metai yaok harei  tagok 1.900 urang dalam dom adit bloh. Mỹ jeng hu panuac sanya alin hadiah brei ka dom taneh ia labaih 1 tỷ mbang vaccine.

Rajaei Indonesia daok kuhria peih ngak sarak “bong bóng du lịch” akaok meti haong Singapore. Labik du lịch Lagoi angaok pulao Bintan dalam dom pulao Riau lac labik camereip abih peih ngak iek, tuai Singapore mbuan tal labik ini meng phà. Meng kreh thun ini, Indonesia hu ngak salah bloh bruk padang “bong bóng du lịch” haong 5 taneh ia, lac Singapore, Dom tiểu vương quốc Ả-rập Thống nhất, Qatar, Trung Quốc, Hà Lan. Tukvak tapa, jit praong COVID-19 ngak brei gah du lịch di “palei negar ribau ribau pulao kaoh” khat lahik yaok tỷ USD./.

Urang lang: Mousaphuong -27/9