Kapul K93 duah, pataom mek talang di negar Campuchia

Kak kajap haong kapul K93 meng di tuk padang tagok saong hu maong lac labik piah pagam pambak tame, lac menuac pachreih ba ka dom rai urang jaka, urang lin kapul K93 dalam tuk ngak bruk - Đại tá, Anh hùng tapon nyom bol pan phao kraong bhap bini Huỳnh Trí brei thau: Saron mbon bo khol drei daok hu harei ini, mai meng rilo ralow darah di dom urang lin. Daok diuk lac sa bruk biak patuah, nan ye bruk duah, pataom, mek saong ba mai palei negar talang liệt sĩ metai dalam dom saman mesuh metak ngan haong taneh ia, palei negar oh njauk lac bruk ngak bo daok lac meng baoh hatai.

  Labik kapul K93 duah, pataom di negar Campuchia bhian lac mbon ceik kan kandah, rilo meng nao takai, rilo labik daok hu mbom mìn saong janih jru mek daok kandon viek hadei di mesuh metak, nan ye bruk nao duah biak kan kandah, di rilo labik bruk rok mek meng prein manuac. Yaom lac yau nan, piah ngak hu bruk bo Đảng saong kanja jao brei, kapul kham marat kuac dom tal mbaok taneh, dom labik ia craoh, kuac yaok ribau m3 taneh, patau meng pandap sit sot, gam nao gam peih jalan yaok ribau km… piah duah, ba dom talang mai veik haong palei negar.

Thượng tá Lê Đắc Thoa, Chính trị viên kapul K93 - Bộ Chỉ huy Quân sự tỉnh An Giang brei thau, meng dom harei camereip bahrau padang tagok, kapul K93 gaok oh takik kan kandah ka bruk mbang huak, ndih daok, kurang pandap panda, jeng ka oh bhian randap haong bruk ngak bahrau ni. Taphia di nan, dom bruk mesuh metak tapa blaoh suai lavik, jalan mbak, puk palei salih bahrau abih, mblang taneh praong, jalan atah, ceik glai kan kandah, langik tasik jeng biak kan kandah, dom urang jaka, urang lin hu mbaok tapak tame mbang mesuh urak ini umur jeng biak praong, prein yava oh daok khang kadang, akaok sahneng jeng oh daok hadah hadai, hu dom urang metai nan ye bruk brei thau, tacei labik kubo jeng oh tantu, cambaih laih.

Langiu di nan, tuk ngak bruk di negar Campuchia, urang jaka, urang lin dalam kapul ka oh thau cambaih jalan nao pak ni, adat cambat tanarakun… min meng hatai anit dom rai dahlau, dom ame, dom sa-ai ndih trun ka taneh ia, ka rahra… dalam 20 thun tapa, urang kaja, urang lin kapul K93 tuk halei jeng paglaong bruk ngak, kham marat yam tapa dom kan kandah piah ngak siam bruk ngak.

Jeng tui Thượng tá Lê Đắc Thoa, dalam tuk ngak bruk di kapul daok gaok kan kandah karei lac gilai di negar saabat lac gilai tamo nan ye hu athur biak jhak, abih di nyu nan lac ula độc saong jamaok… Taduan hu panuac khan ye njauk rok, duah rilo labik jeng oh mboh. Dom kan kandah oh ngak ka urang jaka, urang lin dalam kapul K93 kadun likuk, kayua dom urang jaka, urang lin Kapul K93 thau cambaih dom pandik harao di amaik ame, adei sa-ai, gauk gar di dom liệt sĩ daok cang yaok harei piah ba talang mai haong palei negar.

Urang jaka, urang lin di kapul K93 tuk halei jeng patagok ilamo meng kan di bol bala bhap bini Việt Nam, ngak njauk tui adat hukum, khik ramik talei jum pataom dunya, iek praong adat cambat tanarakun di bhap bini, bhian taom gaok, pambuak haong bhap bini negar sahabat; pathau khan, langyah ka bhap bini negar sahabat thau cambaih bruk ngak di kapul K93; peih bruk iek ruak, brei jru tavao oh mek jien, alin hadaih ka bhap bini Campuchia gaok kan kandah, ngak jalan mbak ka bhap bini, ramik pasiam tatua … Dom bruk ngak nan hu padang hatai jia, ba mai hatai anit ranam di karja saong bhap bini Campuchia, meng nan hu rilo bhap bini khan brei kapul thau dom khau tin hu yaom glaong.

  Dalam 20 thun tapa, dom urang jaka, urang lin di kapul K93 hu nao tal labaih 170 xã, 21 huyện, di 3 tỉnh Takeo, Kompong Speu, Kokong di negar Campuchia saong 28 xã di 3 huyện An Phú, Tịnh Biên, Tri Tôn, tỉnh An Giang. Tal urak ni, kapul K93 hu duah mboh, pataom mek hu 1.956 talang liệt sĩ urang halain hatain, chuyên gia Việt Nam metai dalam dom saman mesuh metak di taneh ia sahabat Campuchia ba mai palei negar, dalam nan hu 251 talang liệt sĩ thau hu angan. Taeng di tỉnh An Giang, kapul K93 hu duah mboh, pataom mek hu 1.254 talang liệt sĩ; dalam nan hu 130 talang liệt sĩ  thau hu angan. 

Thượng tá Lê Đắc Thoa khan lac: “Tuk vak khol dahlak daok di sang biak takik, adei saai dalam kapul meda lac oh hu thun halei hu raok Tết di sang haong gauk gar. Khol dahlak meng Campuchia mai sang lac harei 4 bingun Tết, daok me-in haong adei saai dalam sang hu domk harei, blaoh adei saai tagok jalan nao ngak bruk. Glaih glar yau nan min urang jaka, urang lin tuk halei jeng saneng mboh, hu caik hatai tal bruk ngak biak glaong”.

Gam haong bruk duah, pataom, mek ba mai palei negar talang liệt sĩ urang lin halain hatain, chuyên gia Việt Nam metai tapa dom saman mesuh metak di negar Campuchia, Kapul njauk caik hatai sangka saong ngak siam bruk Jak ba di labik daok saong bruk đối ngoại quân sự, ngoại giao haong karja, tapon nyaom bol pan phao kraong bhap bini Campuchia.

Meng dom bruk ngak hu biak gheih yau nan, kapul K93 hu Đảng, kanja alin 2 Huân chương Chiến công hạng Nhì saong hạng Ba; Mintri Quốc phòng alin harak mayaom; Bộ Tư lệnh Quân khu 9 hu dua mbang alin hala ndok kapul naih gheih 5 thun gam dalam bruk pacacah Quyết thắng gam saong rilo pok meyaom karei …

Bruk njauk biai nan lac, kapul K93 lac sa dalam dom kapul naih gheih di tỉnh An Giang hadah  mbaok meta hu tame nyaom roya pacacah gauk anit ranam taneh ia mbang ka X thun 2020. Nan jeng lac prien pachrieh ba, lac, hatai jia saong lac pandap ba tui piah ka urang lin kapul K93 “takai khang patau lamin”, daok tapa craoh, tapa gilai angaok jalan nao duah talang liệt sĩ metai dalam dom saman di tỉnh An Giang saong urang lin halain hatain, chuyên gia Việt Nam metai dalam dom saman mesuh metak di negar Campuchia piah ba mai palei negar./.

Urang lang: Thu Thảo – 30/11