Hadei di tuk pabo amaik menek bloh, nyu mahu ia biak ralo, mikva brei pabo amaik menyum ia tui hatai nyu (ia hu lai saradang 1% atau sara 0,5%). Dalam 4 - 5 menit akaok meti, kayua pabo amaik daok glaih, saong kayua nyu takre anek, nan ye oh khin mbang. Dom harei camereip hadei di tuk menek, dom drei pabo menek mbang akaok meti bhian oh brei anek mum kayua oh ka randap. Mikva njauk caik hatai brei pabo amaik mbang pandap mbang mbuan ralai yau hareik meda, bu tangei, bei piah pren yava samar khang veik pren yava. Hadei di nan brei mbang pandap mbang hajao meda, asar ngũ cốc, baoh karaoh. Langiu di nan, brei pacang ruak bại liệt ka pabo amaik meng bruk klauk canxi gluconat.

Daok pabo anek barau ndih tapui ye iek glang yau habar? Tuk pabo anek barau ndih tapui tabiak, mek khan uak hacih labar di dhung saong cambuai ka pabo anek, mek talei hacih kak labik atah di pasak meng 5 tal 6 cm, kanal caik veik meng 3 tal 4 cm kuhria meng labik kak, uak brei darah meng labik kak tabiak abih, cakak pasak bloh sát trùng meng jru meriah atau cồn Iốt. Paok tal lipih di gah ala plak takai pabo anek bahrau ndih tapui.

Pabo anek barau menek oh ka thu blau meda dang tagok hu saong mum amaik hu. Dom drei pabo anek biak yếu oh ka mum amaik eng hu, njauk iak ia tasau akaok meti brei ka pabo menyum suai di abih nan lac sa tuk hadei di tuk menek tabiak. Ia tasau akaok meti lac pandap mbang oh salih hu ngan saong pabo anek barau menek. Kayua yau nan ye pabo anek dak mum hu ralo ia tasau akaok meti dak samar praong, khang kadang saong pacang hu ralo ruak. Ralo drei pabo anek barau menek oh ka eng drei mum amaik hu, brei pasram ka pabo anek mum dalam dom harei camereip, kateik hanjul cambuai pabo anek tame taong tasau pabo amaik, atau takaic cambuai pabo anek piah nyu pabum hu tasau pabo amaik, meda cambat tame taong tasau pabo amaik brei ka ia tasau tabiak piah pabo anek pasram mum, dalam tuk pabo anek mum, drei brei khik pabo amaik yau habar ka pabo anek hu mum trei.

Dalam 10 harei akaok meti pabo anek daok hong pabo amaik saong nyu hu mum tui hatai, pasram ka nyu mum samu gauk dua gah taong tasau. Meng harei ka 11 brei ba tapol anek tabiak truh amaik saong raong dalam var ro karei, yaok harei ba anek mai mum, pasram ka pabo anek mbang hareik, hu 80 atau 90 harei brei pabo anek lui mum./.