Dom urang sup meta duah hu bruk ngak hadei di tuk bac bloh 

Daok 1 bilan tra sa-ai Phạm Văn Cường, umo 33 thun, palei daok di tỉnh An Giang meda mboh jalan veik meng 2 gah meta di drei. Sang kan kathaot, tuk daok sit Cường daok haong ong muk pajeng ame, tal umo 4 thun, tuk tui ong muk tabiak hamu ye njauk asar padai par tame meta gah hanuak. Meng nan, meta gah hanuak di sa-ai oh daok mboh hagait, sa-ai mboh melau saong nao mai, maong iek biak kan kandah luac dalam 29 thun tapa. Bahrau ini, 1 urang ruak ung thư di TPHCM metai alin hadiah veik giác mạc, Cường hu Kapul daong urang ruak kan kathaot ban raya HCM pambuak haong sang iek ruak Nguyễn Trãi blac raih pagam giác mạc, ngak brei meta di sa-ai hu hadah veik:

  "Adei hu yau nan biak uan tabuan, dahlau daih oh mboh jalan hagait, urak ini hu blac meta, hu mboh jalan veik.Meta hadah hu 2 gah ye adei mbuan lagaih nao duah bruk ngak, dahlau daih meta khut sa gah biak kan duah hu labik pah drei ngak".

Daok sa-ai Nguyễn Văn Tú, umo 47 thun, daok di huyện Hóc Môn, ban raya HCM njauk asar randaih par tame meta tuk peih radaih kua. Labaih 1 bilan ndih iek ruak, dom bác sĩ brei thau sa gah meta di sa-ai khut, oh daok mboh jalan. Meng nan, sa-ai Tú biak duh hatai, takik ndom biai jang, bruk peih radaih kua yaok harei jeng oh mbuan lagaih. Harei tapa harei, sa-ai maong akaok urang ieu phone hadei di tuk tut angan  pagam giác mạc di Kapul daong urang ruak kan kathaot ban raya HCM. Biak patuah lac, meng hu menuac alin hadiah giác mạc, sa-ai Tú hu pilih ruah piah pagam giác mạc brei saoh, oh mek jien hagait. Urak ini, sa-ai meda peih radaih kua, oh daok duh hatai, hu mbuan lagaih dalam nao mai:

"Nguyễn văn Tu: nao jalan hu lagaih jang, ngak mbang duah jien jeng mbuan jang. Urak ini jeng daok peih radaih kua saong daong diuk pablei lisei di tapen jalan ka urang ngak. Biak uan tabuan thau dhar phor menuac alin hadiah giác mạc ka dahlak, brei ka dahlak hu mboih jalan veik, dahlak kham merat diukrai siam mekre".

Nan lac 2 urang biak patuah dalam yaok rabau urang kan kathaot sup meta daok cang hu alin hadiah giác mạc. Tui Kapul daong urang ruak kan kathaot ban raya HCM, yaok thun hu jaik 2.000 urang sup 1 gah atau 2 gah meta kayua khut giác mạc tut angan pagam giác mạc brei saoh. Min tok hu 2- 3 urang brei giác mạc, nan lac tok pagam hu ka 4 - 6 urang. Ong Trần Thành Long, Akaok Kapul daong urang ruak kan kathaot ban raya HCM khan lac, dom menuac alin hadiah giác mạc oh rilo, bo daok hu bruk rilo menuac tut angan alin hadiah min tuk palang lahik, gauk gar dalam sang oh brei, nan ye giác mạc takik ye dak takik jang. Hu dom kapul di negar lingiu tacei labik giác mạc min jien buh tabiak piah blac raih mek giác mạc nan pagam ka urang sup meta kan kathaot lac jaik 2.000 đô la Mỹ sa mbang nan ye oh hu jien piah ngak.

Ong Long brei thau, Kapul hu dom bác sĩ haong sang iek ruak halan hatian blac raih giác mạc brei saoh ka urang ruak. Nan ye, meyah hu menuac alin hadiah dalam taneh ia ye urang sup meta daok hu jalan piah hadah meta:

"Tran Thanh Long: Bac sĩ ngak bruk brei saoh, hu tuk hu urang mai bo oh hu jien ye bác sĩ daok daong brei jien radaih. Lavik lavik Kapul jeng hu nao ravang, brei pandap, iek raidiuk urang hu hagait salih bahrau halei oh, meyah mboh siam jang ye drei khan brei rilo menuac thau, brei urang ngak pahla mboh blaoh daong."

Bác sĩ Trần Thanh Danh, Trưởng khoa Mắt – Sang iek ruak Nguyễn Trãi (TPHCM) brei thau, jaik 10 thun tapa, khoa hu pagam giác mạc brei ka 49 urang ruak. Jeng tui bác sĩ Danh, dalam yaok rabau urang ruak daok cang hu pagam giác mạc ye bruk pilih ruah urang taduan lac bruk biak kan kandah ngan saong dom y bác sĩ. Dom urang hu pilih ruah dahlau piah pagam giác mạc lac urang sup 2 meta, urang daok ranaih ngak mbang raong sang:

"Biak di nyu hatai sahneng alin hadiah giác mạc di Việt Nam drei ka oh glaong, caong lac anak tal meda hu rilo menuac hu hatai sahneng siam, mboh atah, alin brei meneing rup pabhap di drei tuk metai piah brei ka urang caong hu, abih di nyu lac urang sup meta tuk umo daok ranaih, daok rambah rambup ngak mbang duah jien raong sang".

Sa urang siam mekre oh patuah palang lahik lingiu di bruk alin hadiah 2 giác mạc, daok daong hu ka rilo menuac tapa bruk alin hadiah dom janih karei dalam rup pabhap yau ye phổi, tai, baoh hatai... Bruk alin hadiah nan oh lac daong tapak ka urang taduan bo daok daong ka abih menuac dalam sang urang ruak saong patrun naong trak ka xã hội. Kayua yau nan ye, klaak nao hatai sahneng lac metai brei daok ginup, alin hadiah meneing rup pabhap jeng lac bruk pambuak talei ka sa raidiuk bahrau. Sa urang metai ba bruk siam mekre tal dom urang karei tuk halei jeng lac bruk hu yaom glaong, lac sa bruk ngak siam njauk pok meyaom, njauk thau dhar phor dalam xã hội./.

Urang lang: Mousaphuong- 14/11