Pathau mikva saong grauk yut ! Tui Tổng Cục thủy lợi, bilan thu thun ini bhum Nam Trung meda kurang hajan saong jalan ia nduac. Ia di dom binek, kavei jeng biar jang duk saong dung tích thiết kế yau nan ye mbuan hu pandiak bhang ralo. Tui kuhria mboh dahlau, bilan Hè -Thu anak tal meda rah tabiak pandiak khang saong kurang ia trak. Piah daong cakak bruk ini, barau ini di Ninh Thuận mintri ngak nong saong patagok palaei pala hu peih diễn đàn “dom jalan ngak piah caga  pandiak bhang dalam bruk ngak nong bhum Duyên hải Nam Trung bộ”.

Di diễn đàn, dom panuac ndom jeng mboh lac, salih janih phun pala lac sa jalan ngak siam. Saai Thuận Ngọc Bắp tacei tabiak meng bruk anak meta di puk palei drei :Pandiak bhang labaih dua thun ini mai, xã brei salih dahlau tapa phun ratak, pala ritak abih takik ia, ritak tamuh siam. Dahlau diah tapen kraong Trân ini pala padai abih. Pandiak bhang dui atah, labaih 2 thun ini mai xã brei ka mikva salin tapa phun pala ini. Yaok dua adit  ia gah kraong Trân ba trun, ba mai sa mbang ka mikva pruh ka phun pala, meng nan phun ritak cakrok tani tanat.

Meyah pala ritak aih kuh,  ia pruh tok pandar sumu 20% ia pruh ka phun padai. Ông Châu Tím daok di xã Phước Hải, huyện Ninh Phước, tinh Ninh Thuận brei thau alamu khik ia pruh piah khik phun pala meng bruk “ pandar kadung nilon piah khik ia veik, hadei di nan ba ia tame hamu daong padai”

Tiến sỹ Nguyễn Thanh Phương – Phó Viện Trưởng, Viện alamu Kỹ thuật ngak nong Duyên Hải Nam Trung Bộ brei thau bruk siam lagaih di dom mô hình pala drak daong caga toa riya bhum Nam Trung Bộ: Duk saong dahlau deih, duk saong pruh ia meng doa livik mai jeng lac mikva patrun hu 35000 m3, . Ka dua lac kol drei salih tapa phun pala thu di taneh padai piah caga halak halin di vụ ini tapa vụ diah. Saong bruk praong tuk salih nan lac ruah dom janih phun takik pandar ia. Ka klau lac phun hu tukvak cakrok katut abih piah takik gaok pandiak bhang saong sa bruk tra lac duah dom pajaih diuk siam dalam pandiak bhang.

Pambak praong dom mô hình salih janih phun pala kaya raong hu jak jeng, pandar dom alamu bahrau ka pajaih,  pacang caga jit ruak , caga pacang dom kan kandah meng lingik tasik, lac bruk njauk ngak dalam tukvak ini ./.

Thúy Linh