Jalan ngak halei piah pacang pandiak bhang suai lavik di Ninh Thuan?

Ninh Thuan lac bhum thu lagu abih dalam taneh ia, nan ye bhian gaok khat lahik trak kayua tua riya rah tabiak di gah kreh negar. Njauk tal tuk, Ninh Thuan njauk kuhria tal sa jalan pacang tua riya piah tani tanat bruk ngak mbang kinh te – xa hoi saong raidiuk bhapbini. Viet QUoc – urang vak di rayo sap ndom VN daok di ban raya HCM hu kadha vak “jalan ngak halei piah pacang pandiak bhang suai lavik di Ninh Thuan? Daa mikva saong grauk yut tui pang:

 Urak ini,  xã Phước Trung, huyện Bác Ái hu maong lac labik pandiak bhang di abih dalam tinh Ninh Thuan. Labaih sa thun nao tapa bo bilan hajan jeng oh ka mai. Dua danao ia Phước Nhơn saong Phước Trung  thu tal taok. Dom taneh ngak nong njauk klak saoh. Mblang hareik thu, dom tapol athur  di bhapbini njauk ba nao labik karei duah kaya mbang saong ia menyum. Bruk pala drak njauk padheih, kan kandah trak tal raidiuk di bhapbini. Ông Chamalé Đá, sa urang nong daok di ở xã Phước Trung, huyện Bác Ái brei thau : Thu lagu yau ini oh hu ia pruh ka njam patam, hamu padai. Hamu padai oh hu ia, oh ngak hagait hu. Pak ini oh hu hajan ye  oh ka pala drak hu.

Taneh riya oh pala drak hu meda ba tal eik lipa. Lingiu di nan, ia pandar pak ini jeng dak harei dak thu. Dom bilan tapa, taong abih janih njauk  caong tame bruk daong di karja. Saai Chamalé Thị Sớ, sa urang daok di palei Đồng Dày, xã Phước Trung ndom lac :Đồng Dày ini biak rambah ka ia. Urak ini meyah oh hu karja pajeng ia daong meda lac pak ini oh thau nao duah ia pak halei bo menyum.)

Tal puac bilan 6, Ninh Thuan hu tal 5.497 sang saong  23.130 menuac kurang ia, hu pabak brei ia pandar yaok harei. Labaih 1.300 drei athur hu takaiy metai kayua pandiak bhang. Dalam bilan Đông Xuân, labaih 500 hécta  phun pala lahik mbong, jaik 1.570 héc-ta trun takik năng suất, 6.100 héc-ta njauk padheih pala drak kayua kurang ia. Tal bilan hè thu, labaih 10.200 héc-ta padai saong phun pala angaok thu jeng padheih pala kayua kurang ia.

Piah tani tanat raidiuk bhapbini, meng akaok thun tal ini tỉnh Ninh Thuận hu pabak brei 3 mbang brah daong eik di rajaei abih tih 3.100 tấn. Dom labik kurang ia pandar, bhapbini hu karja brei jien pah ridaih pajeng ia meng labik karei mai. Kuhria tal urak ini, rajaei hu daong ka tinh Ninh Thuan 172 tỷ đồng piah pacang pandiak bhang. Bhapbini di dom labik jeng hu kuac danao, khoan bingun saong buh jien tabiak ngak he thong pruh patak pataom piah daong taneh phun pala daok veik di bhum tua riya. Min, dom bruk nan tok lac bruk ngak di anak meta. Kayua meng lavik mai tinh Ninh Thuan lac sa tinh thu lagu, langik salih that thuong ye urak ini, tua riya meda mai veik.

Piah pacang caga pandiak bhang suai lavik, Ninh Thuan daok kuhria ramik veik gah ngak nong. Dalam tinh urak ini hu jaik 26.000 héc-ta taneh padai, caong hu rilo ia yau nan ye njauk iek veik kein laba di janih phun pala ini. Ninh Thuan meda salih phun padai meng dom janih phun diuk hu dalam pandiak bhang, hu yaom kinh te glaong jang. Ông Lê Văn Bình, Phó akaok Ủy ban bhapbini tỉnh Ninh Thuận ndom lac : Bhum pandiak bhang ini oh njauk pala 26.000 héc-ta padai. Năng suất glaong tal halei jeng oh khik hu an ninh padai brah di negar. Nan ye urak ini tinh daok peih bruk rami ramik veik gah ngak nong Nông tui jalan phun hagait, anek hagait lagaih haong lingik pandiak saong takik hu ia pruh yau tinh Ninh Thuận.).

Gam saong nan, tinh daok buh jien tame ngak dom công trình thủy lợi, abih di nyu nan lac dom danao padang ia. Tui ông Nguyễn Văn Tỉnh, Phó Tổng cục Thủy lợi, mintri ngak nong saong patagok palei pala, di bhum bhian hu tua riyah rah tabiak, labik halei meda ngak hu danao padang ia njauk buh jien tame ngak. He thong ia hu padang ngak, pambuak pagam saong gauk jeng gah thủy lợi liên thông, meda pabak drah samal ka dom labik kurang ia. Barau ini, tỉnh Ninh Thuận hu pok panuac likau rajaei saong hu brei buh jien tame ka hệ thống thủy lợi Tân Mỹ saong đập dâng Sông Dinh, hu quy mô praong saong biak hu yaom glaong ngan saong tỉnh. Danakdak ini tuk ngak blaoh meda langyah hu bruk tua riya di tỉnh. Ông Nguyễn Văn Tỉnh, Phó Tổng cục Thủy lợi brei thau : Urak ini di tỉnh Ninh Thuận,  abih tih 20 danao padang ia tok padang hu 192 triệu m3. Dalam tuk nan, meyah kol drei ngak hu hệ thống thủy lợi Tân Mỹ, ye danao Sông Cái padang hu tal 220 triệu m3 meda lac ini sa dự án biak praong, meda duh biak siam ka bruk pacang pandiak bhang di tỉnh Ninh Thuận.)

Langiu di nan, tui dom chuyên gia ngak nong, Ninh Thuận njauk buh  pren yava tame ka bruk pasaim veik glai akaok tabung. Glai akaok tabung meyah hu pasiam veik saong hu khik caga, meda daong khik saong pabak ia brei ka dom kraong ribong danao padang piah ia di bilan thu. Hu yau nan Ninh Thuan meng pacang pandiak bhang hu suai lavik, siam mekre./.