Thun 1998, tuk xã An Hải hu sarak patagok bruk ngak nong meng jhul khang bruk pandar ilamu kỹ thuật, ba jalan ngak mbang bahrau ka urang nong, saai Châu Văn Năng lac sa dalam dom boh sang nao dahlau hu mbaok tame.

Saai Năng khan lac: Sang drei hu 8 ha taneh ngak mbang, rilo meng lac dok dalam bhum taneh thu lagu. Kayua yau nan ye, puac thun 2009, drei khang hatai ba 4 ha taneh tapa pala dom janih njam, 2 ha caga hu ia drei ngak padai song 2 ha dok veik pala phun lavik thun. Piah patak pataom pren ngak song khik hu jalan ia pruh ka taneh pala njam, saai Năng buh jien tabiak labaih 10 triệu đồng piah kuac raok danao mek ia song ngak jalan pruh ia patak pataom ka tong abih taneh pala. Meng caga hu ia pruh, nan ye, hadei di bilan cà rốt bahrau buac bloh, saai salih tapa ratak laow, hala lasun song dom janih njam patam karei karei biak siam lagaih. Hadei di tuk kaoh abih phun jien, yaok thun sang saai  Châu Văn Năng laba hu labaih 250 triệu đồng meng jalan ngak ni

- Nhạc ngắn

Hu hasit phun jien dalam tangin, saai Năng sahaneng lac njauk ba jamriak tame pabak ka bruk pala drak. Kayua yau nan ye, akaok thun 2001, saai buh jien tabiak labaih 300 triệu đồng blei sa jamriak tuốt padai, sa sruh radiah li-ua prong song sa jamriak li-ua tangin piah pabak ka bruk ngak taneh, pajeng ba pandap panda. Dalam tuk pala drak, saai dok ngak hu boh jamriak pruh jru, pruh atah hu 4 mét, meng sa thung katak praong 30 lít, sa mô-tơ phát điện, dom nding talei pruh song trục quay hu 2 kong radeih piah peih angaok mblang hamu. Meng nan, nyu trun hu tukvak pruh jru saong daong ka rup pabhap takik gaok tal jru khik caga phun pala yau jalan ngak klak bo urang nong bhian ngak. Abih di nyu nan lac, bahrau ini, saai ngak hu bruk pagam sa gai tame jamriak dui piah « tra lỗ trĩa ratak laow ». Tui saai Năng, dahlau deih, yaok tuk trun vụ, mik va dalam palei bhian pah urang ngak taneh, trỉa ratak, yaok sào abih meng 5-7 urang ngak, abih labaih 1 triệu đồng. Dok urak ni pandar jamriak dui di saai, yaok sào abih 130.000 đồng min, nan ye mikva dalam palei bhian pah jamriak di saai piah ngak. 

          Oh lac pabak ka bruk pala di sang drei, yaok thun, saai dok taduan mbang pah li-ua, pajeng ba njam patam ka urang nong dalam palei. Meng thau pandar ilamu kỹ thuật bahrau saong thau ba jamriak tame bruk ngak mbang bo kinh tế sang saai dak harei dak khang kajap. Sang saai dok buh jien tabiak peih sang mac chai padai gam song pablei salih padai brah, haleik, mekuac. Yaok thun, hadei di tuk kaoh abih phun jien buh tame ngak, sang saai daok laba hu labaih 400 triệu đồng meng jalan ngak KT tổng hợp./.