Rilo bruk ngak ba mai jien duah hu ka urang ngak puk palei 

Tapa bruk di dom puk palei bhum bangsa takik brei mboh lac, 1 sang urang bangsa takik hu tuk taduan hu bruk daong di 4 sarak karei di gauk, min asal piah langyah bruk eik lipa, kathaot rambah lac taneh pala drak haong ilamu ka pala drak ye mikva oh ka taduan hu. Tapa pasang iek bhum bangsa takik brei mboh lac: baoh sang kan kathaot dom thun tapa trun samar, min oh ka biak khang kajap, bruk mbuan kan kathaot veik daok biak glaong, rilo sang kurang taneh pala drak, taneh daok, ka oh hu pandar ia hacih. Di dom labik, sarak daok kateik angaok gauk, oh thau pataom tame labik halei piah brei ngak dahlau?

Harei 14/10/2021, Thủ tướng Rajaei brei tabiak Danak dak bruk ngak negar patagok KTXH bhum urang bangsa takik saong bhum ceik vaktu 2021- 2030 (hadei di ini ieu katut lac Danak dak). Mbang ka 1 meng thun 2021 tal thun 2025 brei peih ngak 10 danak dak langyah bruk kurang taneh daok, sang daok, taneh pala drak, ia pandar, rami ramik tani tanat labik daok bhap bini, cakrok bruk ngak nong, ngak glai khang kajap, buh jien padang ngak jalan mbak, cakrok pato pakai, paglaong ilamu menuac ngak gah khik ramik, patagok yaom glaong ilamu meng kan pambuak haong cakrok du lịch, iek glang prein yava ka bhap bini bangsa takik, ngak brei samu gauk, patagok kapul bangsa takik biak takik menuac, saong kapul bangsa daok rilo kan kandah; pasang iek, taong yaom bruk peih ngak danak dak.

Tui ong Bùi Sỹ Lợi, dahlau daih ngak Phaok Chủ nhiệm UB ka dom bruk XH di QH, Danak dak caik tabiak dalam tuk kol drei daok hu 2 danak dak bruk ngak negar. Nan lac danak dak bruk ngak negar padang ngak palei pala bahrau, saong Danak dak bruk ngak negar patrun kathaot khang kajap. Kayua yau nan ye njauk taong yaom, pataom iek veik 2 danak dak ini piah ngak brei cambaih dom bruk buh jien tame ka bhum bangsa, bhum ceik hu tal halei. Daok veik dom bruk praong halei bo oh ka langyah hu ye Danak dak bruk ngak negar patagok KTXH bhum bhap bini bangsa takik saong bhum ceik njauk langyah. Ong Bùi Sỹ Lợi ndom lac:

“Dalam 10 danak dak nan, urak ini daok thau cambaih vaktu camereip lac 50 rabau tỷ buh tame ka patagok, saong 54 rabau tỷ brei ka bruk ngak gam gam, tapa nan mboh cambaih lac kol drei ka oh sangka buh jien ka patagok, bo daok pamaong tal buh jien ka sự nghiệp, nan ye njauk kuhri kuhria veik, ngak habar piah ba jalan ngak mbang, duah jien, ngak brei salih jalan saheng di bhap bini bangsa takik saong bhum ceik, hu jalan piah ka urang hu mbaok tame patagok bruk pala drak piah duah hu jien tame jang”

Ong Đỗ Văn Sinh, UV thường trực UB kinh tế di QH ndom tal Sarak 88 di QH brei ngak Danak dak patagok KTXH bhum urang bangsa takik saong bhum ceik vaktu 2021-2030 ndung bak abih gah hu langyah bruk ini. Saong meyah peih ngak Danak dak njauk tui jalan di Sarak 88 di Quốc hội, ye meda hu dom sarak samu gauk, saong prein khang pataom tame piah langyah dom bruk caik tabiak ka bhum taneh ini. Ong Đỗ Văn Sinh ndom lac:

“Tui dahlak, njauk pataom tame sa labik, gah angaok TƯ meda jao ka 1 Mintri, gah ala puk palei jeng meda jao ka 1 labik piah kol drei yasa prein ngak, piah ngak habar nan, kol drei pataom prein ka njauk menuac, njauk sarak, oh labaih, oh kurang. Ini lac bruk biak praong.”

Urak ini, dom tỉnh ban hu peih ngak dom sarak bangsa dalam puk palei di drei, khik ka “sarak nao tal bhap bini” hu samar di abih saong siam lagaih di abih, padang jalan parabha phun jien njauk buh brei dahlau ka dom tỉnh ban peih ngak labik danak dak bruk ngak negar. Ong Dương Văn Hào, Phaok aakaok UB bhap bini huyện Võ Nhai, tỉnh Thái Nguyên mboh lac:

"Tapa dom sarak nan hu ngak jeng siam lagaih dalam raidiuk rahra. Tui nan akaok sahneng di rahra hu tagok glaong, gam haong nan, bruk cakrok kinh tế jeng hu rilo salih bahrau, bruk pablei salih pandap panda nao mai di dom bhum palei jeng hu siam jang.

Dalam tuk jit ruak Covid 19 rah tabiak srau kadau, dui atah saong kadung jien karja oh hu rilo, Rajaei brei ngak dahlau dom bruk ngak praong, pataom tame dom bhum kinh tế biak kan kandah saong langyah dom bruk njauk ngak chip di urang bangsa./.

Urang lang: Mousaphuong 25/12