Sa mblang ngak tui jalan ngak nong hacih saat 

Yaok tapa dom janih njam hacih angaok mạng, labik pablei pandap panda hacih sa-at, mbang darak kaya nong…, ye mboh pandap panda di dom ayut ranaih oh ka rilo, min lac kadha njauk bui sambai. Labik “guan gauk” bhian randap piah ka dom ong po amuk po ranaih meyaih khan pandap panda kaya nong jeng lac dom mbang darak kayua hiệp hội, kapul nyaom peih ngak. Cagar veik, binah prong pandap panda kaya nong hu angan je nao tapak tame dom siêu thị, pasak pablei salih, labik pablei salih mbuan laghaih…

Tui panuac khan di Hoàng Anh, bhian parabha pandap panda kaya nong hacih sa-at di quận 7 (TPHCM), pandap panda yau njam patam baoh karaoh that, pambu thu mai meng Lâm Đồng, Đắk Lắk, Đồng Tháp… parabha ka darak pasar sit sot. Kayua dom labik ngak tabiak tok pabak hu binah sit, pambuak gauk veik ba tabiak darak pasar. Urang blei jeng lac menuac blei pandar di sang, dom amuk ngak mbang ngak huak daok ranaih.

Hoàng Anh khan lac: “Suai lavik, dom ayut ini meda nao tui jalan padang mbang angui ngak nong công nghệ glaong. Min ndom biak kan si meriak gauk hu dalam tuk dom doanh nghiệp dalam saong langiu negar thei jeng buh jien tabiak ngak sang bein chuyên nghiệp yau urak ini. Rilo sang bein pah chuyên gia negar langiu pasang iek, tacei pato ilamu, jien buh tame ngak tagok tal yaok pluh tỷ đồng di Lâm Đồng lac pagap yau nan”.

Akaok sa công ty bhian pala njam dalam aia di Cao Lãnh (Đồng Tháp) khan lac, piah hu pandap panda hu labik dang hu mong lac tani tanat angaok darak pasar, bhian lahik jaik 4-5 thun. Bruk pala njam dalam aia di sa-ai jeng yau nan. Ngan haong phun jien buh tabiak ngak bein labaih 2 tỷ đồng, min mbang pala njam akaok meti khut khat abih. Tuk pasiam veik hu, ba njam hacih sa-at tabiak darak pasar, bruk meriak gauk meng bahrau peih mbaok. Yaom lac pandap panda  pabak hu bruk siam hacih, jalan ngak khép kín, mek hu chứng nhận VietGAP min yaom pablei oh hu glaong hadom dut haong pandap panda pablei langiu darak. 

Dom janih njam patam baoh karaoh di urang giám đốc nan urak ini hu mbaok di Co.opMart, BigC min jien laba duah hu biak takik saong jalan ngak tabiak, pablei salih jeng daok rilo kan kandah. Dom urang pablei salih di dom darak prong (Bình Điền, Hóc Môn, Thủ Đức) jeng hu rilo mbang khan brei thau, hu dom mbang, njam hacih sa-at hu ba mai meyaih khan di darak ngan haong yaom chit jang dom ribau đồng yaok ký. Meng kadha ini bo nyu ngak ka dom urang ranaih bahrau dak padang mbang angui mboh khin kadun likuk.

Kadha “kaya nong pala njauk, lahik yaom, hu yaom pala oh hu” jeng daok hu mboh dalam rilo thun ini mai. Ini jeng lac dom hagait daok rah tabiak di gah ngak nong, bo urang ranaih bahrau padang mbang angui njauk caik hatai, caga haong cuang kandah tavak tave ini dahlau di tuk chreih chai mek tangin tame bruk ngak. Dalam mbang nyaom biai ndom ka bruk ngak nong hacih sa-at bahrau ini, sa urang ilamu pablei salih kakei dahlau lac: Dom ayut ranaih meyah caong khin  padang mbang angui tui jalan ngak nong hacih sa-at, njauk pabak jang dom tiêu chuẩn GlobalGAP piah pamaong tal bruk pablei tabiak negar langiu, salih ka bruk tok pablei dalam taneh aia ngan haong tiêu chuẩn VietGAP bhian randap. Tuk jak jeng, pandap panda meda padang hu angan je Việt Nam angaok dunya, patagok yaom ka pandap panda kaya nong Việt, ba jien negar langiu tame ka taneh aia nan jeng lac jalan ngak kaya meda khang kajap./.

Urang lang: Jasi -12/11