Ni lac jalan sa pataok mbaok meta di dom tỉnh jiak tapen 

Urak ni, jalan praong nao mai di ban raya HCM, Tây Ninh song dom negar dalam bhum bahrau hu sa jalan nan lac jalan roya 22. Min, jalan ni bhian gar radeih. Kayua yau nan ye, bruk padang jalan  nduac samar  ban raoya HCM - Mộc Bài (Tây Ninh) lac hu makna biak prong dalam bruk  patagok kinh tế oh lac ka 2 tỉnh ban ni, bo dok dong ka Việt Nam pambuak bruk pablei salih nao mai  song negar Campuchia. Kayua yau nan ye, rilo thun ni mai, bruk ngak jalan ini daok hu cong khin samar buh jien tabiak ngak  piah tapa nan, rik dong patagok kinh tế bhum taneh.

Tui Sở jalan mbak pajeng ba ban raya HCM, piah peih ngak jalan ni, ban raya HCM song tỉnh Tây Ninh njauk peih taneh riya, bruk padang ngak hu peih ngak tui harak pambuak bruk  BT. Urak ni, dom gah dok  batabiak  sarak buh jien tabiak padang ngak, kham merat peih tabiak ngak dalam thun  2022. Jalan nduac samar ban raya HCM - Mộc Bài atah  53 km meteh, labik jalan nao tapa  TPHCM atah 24km, tapa  tỉnh Tây Ninh jiak 30km. Tong abih phun jien buh tabiak  ngak tui kuhria lac labaih 13.600 tỷ đồng, dalam nan jien peih taneh labaih 5.100 tỷ đồng.

Jalan nduac samar TPHCM - Mộc Bài peih tabiak meng jalan Vành đai 3 (huyện Hóc Môn, ban raya HCM), nao samu haong jalan pasei  (tui quy hoạch  patagok jalan pasei Việt Nam tal thun  2030 – urak ni oh ka hu) Tân Chánh Hiệp - Trảng Bàng (Tây Ninh). Tal labik mblang radeih jalan pasei  Gò Dầu vaih gah hanuak, cakak  tapa jalan roya 22B bloh vaih gah hanuak, nao tapa krong Vàm Cỏ mai gah  jalan roya  22 pambuak pagam song pabah mbang negar pakat dunya Mộc Bài.

Mbang camereip padang ngak 2 labik, labik meng ban raya HCM nao  Trảng Bàng atah  33km,hu 4 jalan radeih, nduac hu 120km/sa tuk song labik meng ban sit Trảng Bàng nao Mộc Bài atah  20km meteh, hu 4 jalan radeih, nduac hu 80km/sa tuk. Mbang ka  2 hu peih prong tagok  6-8 jalan radeih. Dalam thun 2021, dom gah peih bruk bayar jien peih taneh, padang labik daok bahrau.

Ndom ka bruk  kinh tế di jalan nduac samar TPHCM - Mộc Bài, Akaok UBND tỉnh Tây Ninh Nguyễn Thanh Ngọc brei thau, jalan nduac samar  TPHCM - Mộc Bài  lac jalan kinh tế đối ngoại pakat negar  tapa pabah mbang negar pakat dunya Mộc Bài. Lingiu di nan, meng pabah mbang negar pakat dunya Mộc Bài, jalan ni hu pambuak pagam song dom negar ASEAN yau Thái Lan, Malaysia, Singapore…Kayua yau nan ye, padang ngak jalan nduac samar ini, lac bruk njauk ngak, kayua nyu pambuak bruk kinh tế dom bhum saong pambuak pagam rilo negar .

Jeng tui ong Nguyễn Thanh Ngọc, jalan roya TPHCM - Mộc Bài oh lac pambuak pagam, jhul patagok  kinh tế, xã hội di ban raya HCM song Tây Ninh bo dok rik dong jhul patagok,  pambuak pagam abih bhum kinh tế Đông Nam bộ. Kayua jalan ni hu dom canah jalan pambuak song jalan  Vành đai 3, Vành đai 4 di TPHCM; patrun patakik tuk vak pajeng ba pandap panda di abih bhum dalam bruk pablei salih tame tabiak haong negar Campuchia tapa pabah mbang negar pakat dunya Mộc Bài. Bhum gah merong urak ni  hu labaih 1.000km jalan tapen negar hong Campuchia song dalam nan, pabah mbang negar pakat dunya Mộc Bài lac pabah mbang prong di abih, lac labik pablei salih pandap panda tame tabiak ka abih bhum  Đông Nam bộ song abih di nyu nan lac  “akaok kapal kinh tế” ban raya HCM. Dom pandap panda di negar song di dom tỉnh Đông Nam bộ nao tapa pabah mbang Mộc Bài biak prong. Urak ni, gah Campuchia jeng dok ngak jalan nduac samar piah pambuak song pabah mbang negar pakat dunya Mộc Bài.

Dahlau deih, bhum kinh tế Mộc Bài hu ba tabiak jalan patagok pablei salih prong song sarak oh kak je pandap tapa negar, min oh kein lagaih song urak ni, sarak ni oh dok lagaih. Urak ni,  tỉnh Tây Ninh dok pambuak bruk song dom chuyên gia tong yaom veik, piah hu dom jalan ngak lagaih ka bruk padang bhum kinh tế pabah mbang negar. Dalam nan, bruk hu jalan nduac samar  TPHCM - Mộc Bài meda lac sa bruk hadah bahrau, rik dong jhul patagok kinh tế pabah mbang negar. Tây Ninh dok likau sarak roh duah song hu panuac likau ramik veik bruk kinh tế song ba tabiak jalan ngak, ngak jeng prein khang bahrau ka bhum  kinh tế pabah mbang negar pakat dunya Mộc Bài. Jalan nduac samar TPHCM - Mộc Bài hu padang ngak lac sa bruk peih tabiak piah dui pachreih ba dom urang ngak mbang prong, hu ilamu, hu pren khang./.

Urang lang: Hanipha -22/2