Thun 1990, hadei di tuk padeih ngak lin, Hoàng Văn Nam saong dom urang dalam sang di drei meng palei Cao Bang tame Binh Phuoc padang mbang ngui birau. Trang trại di thương binh Hoàng Văn Nam bangsa Tày daok di puk Bưng Mây, palei 6, xã Tân Thành, ban sit Đồng Xoài, tỉnh Bình Phước praong jaik 20 hecta. Langiu phun cao su, pa-ok plait, ong daok kuac danao raong ikan, pala hareik raong limo palimek saong lai pabui glai…Ong mboh bhum taneh lagaih ngak jeng ia nduac piah ngak tabiak điện, ong buh tabiak jaik 50 triệu đồng piah pagam pin ngak pandiak meng ia harei. Tui jalan ngak nan hu ngak tabiak điện ginup ka baoh sang ong pandar. Langiu di nan, ong pandar khak limo, khak pabui piah ngak pandap cuh. Meng jalan ngak Bein-Danao- Var ro, yaok thun ong duah jien tameh hu labaih 200 triệu đồng. Hu drap ara yau harei ini, oh thei thau lac 30 thun dahlau bhum taneh ini glai klo joa lange mbuan ruak kik. Yau nan  min, meng hatai khang saong bruk kham merat yam tagok  di urang lin, ong Nam padang hu raidiuk kaya meda meng plak tangin saoh. Ong brei thau:

“ mai pak ini padang mbang ngui tuk nan biak kan kandah,rilo urang huac ruak kik, urang klak nao abih. Dahlak daok veik, yaom lac kan kandah hadom dahlak jeng daok. Tuk camereip hagait jeng kan, meng kan hu jak, diuk pasang daong gauk ngak mbang,mek katut raong atah,  mbang cai patak pataom bloh peih praongbruk ngak mbang. Meng nan bo hu yau harei ini.”

Jeng lac urang dahlau diah ngak bol lin min tuk mai sang ong Nguyễn Hồng Dũng daok di labik 118 Nguyễn Huệ, khu phố Bình Thiện, phường Tân Thiện, ban sit Đồng Xoài, tỉnh Bình Phước lihik sa gah tangin tuk mesruh metak. Yaom lac yau nan, min ong Dũng ngak ginup bruk piah duah jein raong diuk anek. Meng bruk pablei carem tal peih radaih pajeng apah ka urang…Jien mek tame meng bruk ngak apuh, raong glang. Hadei di rilo thun patak pataom, ong buh tame peih praong bruk ngak mbang, pala drak. Tal thun 1995, sang ong hu 20 hecta taneh pala phun cong nghiep. Angaok mblang  taneh di drei, ong pala padai, pala pa-ok plait pablak caosu…Tapa rilo thun rambah rambeip, urak ini sang ong Dũng hu bingi sahanang. Yaok thun, sang ong mek tame hu labaih 200 triệu đồng. Ongjeng hu ba bruk ngak tani tanat ka jaik 10 urang dalam palei. Ong Dũng brei thau, lac sa urang dahlau diah ngak bol lin urak ini jaoh jo min diuk rai khang hatai tui jalan urang lin Wa Ho jaoh jo min oh klak parah. Ong Nguyễn Hồng Dũng khan lac:

“ Lac urang lin drei brei kham merat.  Drei oh joi jang urang karei. Kadha praong lac brei tari trieng khang hatai dalam bruk ngak mbang. Bruk praong veik jia tame  rup drei eng, juai cang thei brei… hagait drei oh thau ye njauk bac megru, duah thau saong kham ngak ka bahu”.

Oh lac kham merat yam tapa kan kandah piah patagok bruk ngak mbang, bruk praong njauk pok meyaom di dua urang dahlau diah ngak bol lin angaok nan lac dom rik daong ka xa hoi. Meng raidiuk kan kathaot tuk tabiak truh bol lin, meng tari taring ngak mbang bo hu kaya meda, saong biak anit ka mikva kathaot dalam palei. Langiu bruk daong mikva saong ayut phun jien ngak mbang oh mek laba, yaok thun dom urang nan daok hu daong pandap ngak nong ka dom urang dahlau deih nghak bol lin gaok kan kandah. Meng bruk daong abih hatai jai ini bo hu oh sang ngak mbang pala drak veik hu kein laba. Ndom ka bruk kham merat di dua urang dahlau diah ngak bol lin nan, ong Le Duc Hùng – Pho akaok Kapul urang dahlau diah ngak bol lin tỉnh Bình Phước brei thau:

“Ong Dũng lac  thương binh lihik sa tangin, meng gah barak tame ini peih radaih kua, urak ini kham merat ngak mbang hu kaya meda, anek bik hu bac da-a tal labik tal dhua. Nan lac sa dalam rilo urang yau kareih camin. Yaok thun jeng hu rik jien daong Kapul urang dahlau deih ngak bol lin saong dom kapul nyaom karei, daong urang kan kathaot saong dom bruk ngak di palei.”

Yaom lac yaok urang hu sa raidiuk karei di gauk, min dua urang dahlau ngak bol lin angaok nan jeng hu sa kadha dreih yau gauk nan lac kham merat yam tagok, bloh tuk ngak mbang hu kaya meda, urang hu daong ka ayut sahabat di drei. Langiu di nan, urang daok diukrai abih hatung hatian ka mikva, ka puk palei./.