Di huyện Krông Năng, tỉnh Đắc Lắc, bruk paik baoh song pablei durieng di  urang nong mboh biak chreih chrai, bui sambai. Kayua hu dom urang meng dom tỉnh karei mai blei nan ye rah tabiak bruk meriak gauk. Urang meng labik karei mai blei yaom glong jang ba tal kandah gauk, puac mesao gauk, bloh taong gauk. Saai Nguyễn Văn Tín meng Tiền Giang mai blei durieng brei thau:

Dom harei dahlau oh hu bruk hagait rah tabiak, tapa harei hadei blei bein di saai Tư daok jaik ini, bahrau ngak harak hợp đồng bloh, tabiak tal canah klau, hu 2 urang likau cang jalan taong drei. Kol nyu lac, habar tame labik ni blei yaom glaong, ngak khut yaom, min  drei blei yaom 27 ribau đồng min.

Saai Nguyễn Văn Dưỡng dok di palei Ea Chăm, xã Ea Tân, huyện Krông Năng hu 5 ha cà phê pala pablak haong 700 phun durieng dok paik boh. Saai Dưỡng lac:

Jeng mboh harak mbao lac yau nan, min di palei khol hulin  oh hu bruk bảo kê hagait. Kayua urang nong ngak tabiak hu dom boh durieng, jien ndo hadom bo bảo kê.

Xã  Ea Tân, huyện Krông Năn hu meng labaih 300 tal 400 ha phun durieng pala pablak dalam bein cà phê, yaok thun hu meng 200 tal  300 tấn baoh. Ni lac tuk vak urang nong paik baoh pablei. Bruk pablei salih hu rilo menuac mai ngak srau kadau bruk an ninh trật tự puk palei. Ong Phạm Văn Tương, Phó akaok UB bhap bini xã Ea Tân, huyện Krông Năng brei thau:

Hadei di tuk mehit lac palei Ea Chăm, Ea Đinh, xã Ea Tân  hu menuac bảo kê ka urang blei durieng,  UB bhap bini xã hu tacei pato gah công an trun puk palei duah thau. Min tapa duah thau tal tuk vak ni,  oh ka mboh bruk bảo kê ka urang blei durieng.

Jeng dalam tuk vak ni, di huyện Krông Pách, tỉnh Đắc Lắc, bruk pablei salih durieng jeng ngak srau kadau an ninh trật tự. Bruk 36 urang ngak di xưởng pablei salih durieng Minh Tâm njauk urang glam klaok xăng jeng mai meng bruk kandah gauk dalam tuk blei durieng . Thượng tá Nguyễn Văn Dân, Phó trưởng công an huyện Krông Pách brei thau

Urak ni khol hulin dok dalam tuk vak duah thau, oh ka thau cambaih  makna kayua habar urang glam klaok xăng ni. Meng bloh hu dom harak mbao brei thau lac kayua bruk pablei salih durieng. Min bruk ni dok dalam tuk vak duah thau, khol hulin oh ka chap hu thủ phạm  nan ye khol hulin oh ka thau cambaih bruk nan.

Yaom lac hu atau oh bruk bảo kê blei salih durieng, atau lac bruk meriak gauk oh siam, ye trách nhiệm khik caga an ninh trật tự di dom puk palei lac bruk di karja cơ sở song gah công an di labik nan. Njauk duah thau cambaih laih piah pacang cakak, oh brei rah tabiak dom bruk oh siam, oh caik ka boh durieng jeng sa bruk duh hatai di tong bih menuac urang./.