Ong Trần Công Được phaok akok HTX thanh long Dương Xuân, xã  Dương Xuân Hội, huyện Châu Thành, Long An khan brei thau, dahlau tuk Tet, yaom thanh long bhum Châu Thành, tỉnh Long An saong Chợ Gạo, tỉnh Tiền Giang daok blei tame ngan saong yaom 37.000 đồng sa kg janih ka 1. Yau nan min, dua harei tapa,  rilo urang klak jien caik takai atau blei tame yaom 5.000 đồng sa kilo. 

Jeng dreih yau nan, rilo urang pala thanh long di huyen Châu Thành, tỉnh Long An kuhria mboh dahlau lac paik baoh meng kreh tal puac bilan tha jeng daok laik tame bruk meteh paik meteh caik di phun. Dom po bein iew phone mai urang blei khin klak jien caik takai. Page harei  6 bilan tha bhian lac harei akaok thun birau di rilo urang blei, chế biến thanh long piah pablei tapa Trung Quốc. Min thun ini, dom sang blei di huyen Châu Thành tapa Chợ Gạo daok kareik pabah mbang.

Oh lac thanh long, rilo janih baoh kayau karei jeng gaiok kan kandah kayua jit ruak virus corona. Dua gah jalan pambuak dom xã Bình Hòa Phước (huyện Long Hồ, Vĩnh Long), xã Sơn Định, Phú Phụng (huyện Chợ Lách, Bến Tre) saong xã Tân Phú (huyện Châu Thành, Bến Tre), baoh chôm chôm tathak bhong min rilo urang pala urak ini oh khin paik kayua yaom lap. Jeng tukvak ini thun dahlau, chôm chôm Java yaom 30.000 ribau đồng sa kilo, thun ini daok 7.000 -8.000 đồng sa kilo. Bhum taneh pala bei bhong di Vĩnh Long jeng daok laik tame bruk yau nan. Kruac sành di Trà Ôn, kruac bung di ban sit Bình Minh, tỉnh Vĩnh Long jeng salih takik pablei dalm negar, bhap bini oh khin paik ralo. 

Ong Nguyễn Trường An (Tiền Giang) khan lac, hu 2000 phun panat tal tuk paik baoh bo dom harei ini iew urang mai blei oh thei mai. Meyah dahlau tuk Tet, yaom panat labaih 40.000 đồng sa kilo ye urak ini trun daok ala 10.000 đồng sa kilo pablei di bein. Sa bilan tra bo Trung Quốc oh blei veik, dom po bein oh thau ba baoh panat nao halei”

Ong Hoàng Long, urang lambaok sa doanh nghiep bhian pablei baoh kayau tapa Trung Quốc khan lac, yaok thun dom harei ini pandap panda pablei ka Trung Quốc biak ralo, padang cang peih pabah mbang, bo thun ini takik jang. Sa urang pablei baoh kayau tapa Trung Quốc di Bến Tre lac tuk oh ka brei padeih peih pabah mbang jalan tapa negar ye dahlau di nan dom doanh nghiep Trung Quốc jeng takik blei kayua huac jit ruak, bhap bini takik blei.  

Ong Nguyễn Quốc Trịnh - Akok Hiệp hội Thanh long Long An lac, rilo po sang blei thanh long di Long An ginum biai duah jalan langyah saong brei ngak sa jalan yau gauk kham blei veik thanh long tui yaom trun 10.000 đồng sa kilo.

Piah langyah bruk kaya nong baoh kayau daok ndih padang cang, tui ong Lê Minh Đức - giám đốc Sở Công thương tỉnh Long An, sở ini daok ngak bruk saong rilo doanh nghiep. Ong Đức lac, hu dom doanh nghiep ngak tabiak pandap meng baoh kayau mbaok tangin sanya blei luac abih, sa doanh nghiep pandap meng kaya nong blei tame 1.000 tấn baoh thanh long tukvak ini saong kakei mikva brei sahanang hatai brei cang Karja hu sarak daong, plaih njiak urang blei kateik dreik.

Dalam tuk nan, Akok Mentri Công thương Trần Tuấn Anh birau ba tabiak chỉ thị eiw brei pakhang dom jalan pacang caga jit ruak kayua virus corona rah tabiak. Dalam nan, Vụ Darak pasar dalam negar hu jao bruk ngak brei pambuak cung cầu piah jhul pakhang bruk blei tame dom janih kaya di darak dalam negar, abih di nyu lac bruk pataom tame daong pambuak dom janih kaya nong, kaya ia di dom tỉnh bhum taneran kraong Cưu Long. /. 

Urang lang: Aí Nghiêm -5/2