Rilo Cty ngak mbang gah ba menuac nao du lịch taduan hu rilo panuac khan meng tuai lac klaak bruk nao me-in

Hadei di tuk hu rilo urang njom Covid-19 dalam bhap bini, gah du lịch Đà Nẵng samar dang anak kan kandah tuk oh ka pasiam veik hu hadom. Rilo tuai du lịch samar klaak tour  tal  Đà Nẵng yaom lac dahlau di nan  hu buh meneing jien  blaoh. Saai  Bùi Thanh Thủy daok di  Hà Nội brei thau, sa  adit dahlau, sang saai kuhria nao  Đà Nẵng song  Hội An 4 harei 3 melam  di akaok bilan  8 tal,  jien tour buh blaoh abih tih 16 triệu đồng. Min, tuk bahrau buh meneing jien harak song jien balik daok, Đà Nẵng hu urang ruak Covid-19 bahrau yau nan ye sang saai klaak bruk nao main ni.

Langiu di ban Đà Nẵng, rilo tuai jeng suh sah tuk palih ruah dom labik karei. Saai Thùy Hương daok di TPHCM hu blei tour  nao  Phú Quốc min oh sahnang hatai. Tui saai  Hương, yaom lac pak ni oh lac labik tamuh tabiak jit min nao meng kapan haoh jeng mbuan njom ruak. Sa urang njom meng bhap bini ye biak kan ka bruk pacang caga, nan ye njauk takik nao tal labik rilo menuac yau ye di mblang kapal haoh lac siam di abih .

Rilo Cty ngak mbang gah ba menuac nao du lịch brei thau lac taduan hu rilo panuac khan meng tuai lac klaak bruk nao me-in. Tui lambaok Công ty VIFA Travel Hà Nội, dalam dom harei tapa, biak rilo tuai klaak tour nao  Đà Nẵng, yaom lac dahlau di nan, bruk blei tour nao tal ni labik rilo di abih.

Tuk vak tapa, kayua kan kandah di jit Covid-19, gah du lịch njauk dom khat lihik trak. Taeng di ban Đà Nẵng, sa dalam dom labik dui pachreih tuai nao tal yaok thun daok gaok  “ 2 mbang ” kan kandah kayua jit ruak ni. Hu thau, tui yaok pataom di  Sở Du lịch Đà Nẵng, dalam quý I/2020, bruk khat lahik di  gah du lịch labaih  1.859 tỷ đồng. Gah  chuyên gia mboh lac, tui kuhria, abih thun ni, taong abih khat lahik  tapak di  du lịch Đà Nẵng lac  labaih 6.806 tỷ đồng.

Dom thun mai ni, tuai meng  Trung Quốc, Hàn Quốc song Japon  meblah tal  61% tuai dunya tal  Việt Nam. Tuk jit  Covid-19 di  3 negar ni trak damak, du lịch Việt Nam jeng gaok trak damak tui. Meng puac bilan 6, tuk danak dak “Urang Việt Nam nao rivang me-in Việt Nam” hu ba tabiak, dom labik main dak harei dak rilo tuai gilac veik. Min, tui bruk di urak ini, du lịch dok “kan kandah kateik tagok kan kandah”. Ong Nguyễn Quốc Kỳ, tổng giám đốc công ty Vietravel brei thau, bruk prong lac  hatai sahneng di tuai. Anak meta tuai dalam negar jeng dok huac, nan ye khin mek veik drak pasa njauk langyah hu bruk suh sah ka tuai damuai, hu yau nan meng meda jhul khang bruk pachreih urang nao ravang me-in, meyah yau urak ni, ye oh hu tuai nao main, hu gam bruk nao me-in dalam negar ./.

Urang lang: Thu Thảo - 31/07