Pathau mikva saong taong abih gauk! Urang dahlau daih ngak bol lin angan Nguyễn Tấn Chính, daok di xã Hòa Khánh, ban sit Buôn Ma Thuột, tỉnh Đắc Lắc, lac keih camin yam tapa kan kandah, ngak kaya meda saong hu ralo rik daong dalam bruk ngak pahla, lac sa urang đảng hadah krah, yaom lac dalam bruk halei jeng khik hu hatai siam di “urang lin Wa Hồ”. Urang vak di rayo sap ndom VN daok di Tây Nguyên hu kadha vak brei thau ka urang dahlau daih ngak bol lin angan Nguyễn Tấn Chính. Daa mikva saong taong abih gauk tui pang:

Palei daok di Quảng Nam, meng sit ong Nguyễn Tấn Chính tui amaik ame mai daok di Đắc Lắc. Thun 1975, ong nao lin, ngak bruk di Trường Quân sự Tỉnh đội, bloh hu mbaok tame bruk mesruh metak khik caga biên giới Tây Nam, ngak nghĩa vụ quốc tế, daong taneh ia CPC peih paha.

Thun 1980 padeih ngak lin, ong Chính mai veik palei, padang kinh tế baoh sang saong hu mbaok dalam bruk ngak xã hội di puk palei. Dom thun camereip, sang biak kan kandah, raong glang pala drak glaih glar tok ginup mbang ka 6 urang anek, diuk pasang ong Chính sahneng tal bruk pablei salih sit, pambuak saong bruk ngak nông. Meng tari tarieng ngak mbang, pandar cai kali kalih, sang ong patak pataom hu phun jien, blei jamriak, salih tapa ngak dịch vụ, chai padai, aik tabau, riak saradang. Ong Chính khan:

 “Oh lac ngak sa bruk nao pablei, mai sang hu jien bloh blei padai chai, aik saradang, riak meyeik, blei saradang phi mai riak đường chén nao pablei. Sa janih hasit bloh patak pataom dom pluh thun meng hu hasit phun jien, hadei di nan meng peih hu hộ khấu trừ, bloh tagok hu doanh nghiệp 5 thun ini mai”.

Tari tarieng, sami samar dalam bruk ngak mbang, pablei salih, urang dahlau daih ngak bol lin angan Nguyễn Tấn Chính dak harei dak patak pataom hu phun jien saong peih praong bruk ngak kinh tế baoh sang, blei hu taneh, ngak hu sang. Diuk pasang ong Chính daok raong 6 urang anek mbang bac tamat đại học, hu bruk ngak tani tanat. Meng sa baoh sang pablei salih sit, tal urak ini, urang dahlau daih ngak bol lin angan Nguyễn Tấn Chính lac po doanh nghiệp tư nhân pablei salih kaya nông, jien mek tame yaok thun labaih 800 triệu đồng.

Oh lac ngak kinh tế joi, ong Nguyễn Tấn Chính daok biak abih hatai jai ka bruk xã hội, bhian daong ka dom urang gaok kan kandah, abih di nyu nan lac daong ka ayut sahabat urang dahlau daih ngak bol lin. Yau ye urang dahlau daih ngak bol lin angan Võ Đình Hòa, daok di palei 19, xã Hòa Khánh, ban sit Buôn Ma Thuột. Thun ini, umo jaik 60 thun, min ong Hòa jeng ngak ginup bruk, nduac duah ginup labik piah raong amaik taha umo jaik 100 thun, urang diuk njauk bala angaok jalan mbak diuk thực vật labaih 3 thun ini mai saong urang anek kamei daok bac đại học. Mboh yau nan, ong Chính bhian nao rivang, tangi sua saong jak ba dom urang ngak pahala ba gauk daong brei. Ong Võ Đình Hòa lac:

“Ong biak sangka, langiu bruk ngak pahala oh khan abih hu, jeng oh thau lac hadom, min biak ralo mbang saai daok brei dahlak mesraiy piah bayar njauk tukvak sraiy karei. Tal urak ini dahlak oh ka bayar hu abih dom jien bo saai brei dahlak nyim. Ong Chính njauk lac sa anek menuac hu hatai biak siam, abih hatai daong ka bhap bini, dahlak mboh dom sang bac dalam puk palei hu hagait ye ong Chính hu mbaok tame daong. Menuac kan, sang kathaot ong biak sangka”.

Dom kham merat yam tapa kan kandah ngak kaya meda, daong ka urang kan kathaot di urang dahlau diah ngak bol lin angan Nguyễn Tấn Chính oh lac hu  ayut sahabat uan tabuan, urang kan kathaot anit ranam, bo pakat ủy, karja palei jeng pok meyaom. Ong Trần Dũng, Bí thư đảng ủy xã Hòa khánh, ban sit Buôn Ma Thuột lac: 

 “Ong Nguyễn Tấn Chính lac sa urang đảng yau kreih camin. Lac akaok kapul urang dahalau ngak bol lin ngak biak siam bruk di drei, rik daong ka puk aplei. Ndom ka bruk patruh eik patrun kathaot, yaok thun tuk tết sang ong hu buh tabiak meng 10 tal 15 triệu đồng, daong ka urang kan kathaot mbang tết”.

Meng mblang mesruh mai veik sang danaok, urang dahlau daih ngak bol lin angan Nguyễn Tấn Chính daok di xã Hòa Khánh, ban sit Buôn Ma Thuột, tỉnh Đắc Lắc kham merat yam tapa kan kandah, sami sarar dalam bruk ngak mbang pablei salih, jeng po doanh nghiệp jak jeng, tuk halei jeng brei mboh bruk hadah krah di sa urang đảng, khik kajap hatai siam di “bộ đội Wa Hồ”, hu ayut, sahabat saong bhap bini anit ranam./.