Ong Dương Tấn Tự, Phó chủ nhiệm kalup kapul alat ragam meng kan Chăm Mỹ Nghiệp, ban sit Phước Dân, huyện Ninh Phước, tỉnh Ninh Thuận brei thau, Kalup kapul hu padang tagok meng thun 2010, tal harei ini, hu 24 urang, umo meng 40 tal 70 thun, yaok urang yaok raidiuk karei di gauk min halan hatian ba gauk tame ngak brei kalup kapul dak harei dak patgok. Dalam jaik 7 thun tabiak rai, lingiu di bruk me-in alat ragam pamơrơ tuai mai rivang palei ngak, kalup kapul daok hu parang me-in duh ka mikva dalam dom harei Katê, Chabun, Rija…rik daong khik ramik ilamu meng kan di bhap bini Chăm. Ong Dương Tấn Tự daok brei thau lac:" Khol dahlak taong ginang, yuh saranai, pah bumpeh dalm com harei roya yau ye Kate, riya daong ka mikva dalam palei jeng yau brei ka tuia damuai mai rivang ..."

Sa-ai Lưu Ngọc Dĩnh lac urang sit umo di bih thun ini jeng 40 thun. Lac urang dang akaok mban quản lý khu phố 13, ban sit Phước Dân, huyện Ninh Phước, tỉnh Ninh Thuận, sa-ai Dĩnh biak jar var haong bruk duh ka bhap bini. Min sa-ai jeng hu caik tukvak piah hu mbaok tame kalup kapul kayua hatai takre alat ragam bangsa: " Dom ong  ong taha praong thun ye, khin khik ramik veik alat ragam di muk kei drei khol dahlak brei kham merat..." 

Oh njauk lac tok hu sa-ai Dĩnh, bo rilo urang karei dalam kalup kapul jeng biak takre, kham merat yam tapa dom kan kandah, halan hatian mai haong kalup kapul ini. Haniem phul praong abih ngan saong dom urang nan, lac hu me-in dom janih alat ragam drei takre, bo daok brei mboh hatai anit ranam ilamu nghệ thuật bangsa. Lingiu di nan, urang daok caong rik pren yava tame daong khik ramik ilamu meng kan hadah krah, ka harei ini saong ka rairah harei hadei. Ong Quảng Đại Phong thun ini umo labaih 70 thun, thư ký kalup kapul khan lac:" Khol dahlak kham jak ba saong pato veik ka dom anek taco tuk kol nyu padeih bac bilan hè...Khol dahlak jeng hu tavak veik dom ragam giang piah ceik veik ka anek taco mbuan bac..."

Yaom lac gaok kan kandah ka jien padai piah ngak bruk, min dom urang dalam kalup kapul alat ragam meng kan Cam Mỹ Nghiệp jeng daok biak takre nghệ thuật ini. Urak ini, lingiu di bruk duh ka mikva dalam palei, kalup kapul daok hu rilo mikva palei karei dalam tỉnh Ninh Thuận da-a nao me-in tuk Ramưwan, Rija..., tapa nan rik daong khik ramik ilamu bangsa./.