Hu padang tagok meng thun 2004 saong 5 - 6 urang dam sup meta, mbiah tal thun 2014, Kalup kapul caoh mbang urang sup meta Sài Gòn, di Công ty Cổ phần Dịch vụ Thể thao Sài Gòn meng hu hadah hadai jang tapa bruk kham merat di mBan Chủ nhiệm saong dom urang dalam kalup kapul, kham merat nao jak ba, duah menuac daong, kham merat patahu khan piah dom urang sup meta thau piah mai tut angan tame me-in. Tal harei ini, kalup kapul hu labaih 20 urang umo thun meng 20 tal 30 mai me-in. Yaok mesup harei car, dom urang nan sanya taom gauk di Nhà Thi đấu Thể dục thể thao Phú Thọ (quận 11, ban raya Hồ Chí Minh) piah pasram angaok sân bóng. Nguyễn Hữu Nghĩa, hu mbaok dalam kalup kapul meng thun 2008 mbiah tal harei ini, chreih chrai lac:

" Tapa nan hu daong kol adei hu labik me-in, param rup pabhap, pakhang pren yava. Kol adei sup meta oh mboh hagait, tok mehit bloh sahneng, bloh hu thau rilo jang. Dom cei gru, nai gru peih ngak yau ini, hu daong ka dom adei hu labik me-in biak bui, biak sambai."

Mbang caoh mbanh meng 6h tal 8h pagaiy mesup piah ka dom urang sup meta nan nao ngak mbang duah jien, rilo meng lac ngak massage di Kapul urang sup meta ban raya Hồ Chí Minh, Kapul urang sup meta Gò Vấp saong dom labik massage karei karei di ban raya. Jien duah hu takik, lingiu mbang cai daok daong ka amaik ame, nan ye bruk me-in sambai yau oh hu hagait. Kayua yau nan ye, mblang caoh mbanh miễn phí puac adit ngan saong dom urang sup meta nan biak hu makna, oh lac labik pasram, pakhang pren yava bo daok lac labik piah taom gaok, daong ka dom urang nan mboh hu bruk anit ranam di menuac sia saong thau hu yaom glaong di raidiuk. Võ Thanh Triều, gam ngak massage gam lac sinh viên thun 4 Sang bac Đại học Khoa học Xã hội saong Nhân văn ban raya Hồ Chí Minh lac:

" Adei caoh mbang lavik paje, jaik 10 thun. Adei biak takre kayua hu me-in, hu bui sambai saong hu pasram pakhang pren yava. Adei hu nao pakacah di Thái Lan thun 2013, pakacah Paragames di Singapore thun 2015. Adei caong hu nao Paragames sa mbang tra piah."

Piah khik hu kalup kapul caoh mbanh urang sup meta Sài Gòn dalam luac pluh dom thun tapa, lingiu bruk kham merat di gah chủ quản lac Công ty Cổ phần Dịch vụ Thể thao Sài Gòn ye njauk ndom tal bruk kham merat yam tapa kan kandah di mBan Chủ nhiệm kalup kapul. Mblang pasram hu Nhà Thi đấu thể dục thể thao Phú Thọ brei nyim me-in yaok adit, daok dom janih karei yau ia menyum, capha ao, takhaok thể thao… jeng kayua mBan Chủ nhiệm  nao jak ba, meyah oh ginup ye buh jien kadung tabiak pabak tame.  Sa-ai Nguyễn Ngọc Tiên Tiến,  1 dalam 4 urang dalam mBan Chủ nhiệm kalup kapul caoh mbang Sài Gòn chreih chrak khan lac, bahrau ngak hu jalan biên piah lắp đặt ka mblang pakacah caoh mbanh brei ka urang sup meta saong yaom jien abih jaik 30 triệu đồng, dalam nan jak ba hu oh ka tal meteh. Jalan biên ini biak quan trọng ngan saong dom urang sup meta, hu ngak meng khung pasei, ván ép glaong labaih 1,2 mét, atah 1,4 mét, yaok gah 16 jalan biên rah tui chiều dài sân, piah tuk caoh, mbanh gaok tame jalan biên oh taprah tabiak lingiu saong dom urang sup meta caoh mbanh oh gaok vật cản nan ye oh njauk hagait. Sa-ai Nguyễn Ngọc Tiên Tiến caong lac:

" Caong ka dom urang sup meta hu ginup abih janih ka bruk caoh mbanh, kayua urak ini daok kurang rilo janih. Biak kan min mboh anit nan ye drei kham merat ngak. Urak ini hu bruk xã hội hoá, thei hu hatai anit ye ngak hu, kham merat ye ngak hu."

Lingiu di jalan biên meng pasei saong ván ép, bruk caoh mbanh brei ka urang sup meta daok hu kadha karei lac, baoh mbanh hu lục lạc yava tabiak ap, băng bịt akaok piah khik an toàn saong bịt meta piah khik công bằng di dom urang caoh mbanh, taong abih dom janih nan jeng kayua kalup kapul blei. Dalam mbang pakacah Paragames thun 2015 di Singapore, kapul caoh mbanh urang up meta Việt Nam mek hu meda ban, hu mBan tổ chức alin yaok kapul  10 baoh mbanh hu lục lạc, piah kapul param. Bahrau ini, kalup kapul hu blei 5 baoh tra di Trung Quốc, yaom 1 triệu đồng sa baoh piah pabak brei kapul. Lingiu kapul caoh mbanh urang up meta, bahrau ini, kalup kapul daok hu param caoh mbanh ka dom urang thiểu năng. Dalam dua harei, harei 15/4 aong harei 22/4 tal, kalup kapul peih 2 giải caoh mbanh brei ka urang up meta saong urang thiểu năng, hu mbaok 12 kapul. Taong abih dom bruk ngak ini piah pachreih patagok hatai takre thể thao, daong ka dom urang oh patuah njauk jaoh jo, hu labik me-in bui sambai, chreih chrai, khang takai yam tapa dom kan kandah di raidiuk meng hu bruk daong ba, anit ranam di bhap bini./.