Uranaih par kalang angaok jalan mblang padai 

Dom harei tapa blaoh , min rilo menuac di  xã Hàm Cường, huyện Hàm Thuận Nam oh ka abih pandik harao ka bala điện pagam tal bruk par kalang. Dahlau di nan, bier harei  25/4, rilo menuac dok di palei  Phú Lộc, xã Hàm Cường tatuak drei tuk mehit sap patuh khang meng jalan talei điện trung thế nao tapa palei. Di pak ni, saai Dương Đức Thành, sa urang ngak  pah sang daok  di xã Hàm Cường labuh trun tuk kham mek gai mek drei kalang  dok gar angaok talei điện brei sa adei sit . Saai  Thành njauk  điện handaok  pandung abih rup, njauk chấn thương sọ não kayua labuh trun haluk, njauk ba tame sang iek ruak cấp cứu. Ong Nguyễn Văn Dũng, sa urang dok pak ni hu mbaok tame cấp cứu saai Thành lac:

   “Dahlak song mik va pak ni mehit sap patuh nan ye nduac tabiak jaok ia thaik tagok rup. Meng hu ia bo daong ka urang klah di metai”.

Oh lac di labik xã Hàm Cường, huyện Hàm Thuận Nam, bo dom harei tapa, bruk par kalang ala jalan điện hu mboh di rilo labik di  Bình Thuận. Nao rah tapa pasak ban  Phan Thiết jang yau dom labik karei jiak tapen , angaok dom jalan talei điện  mboh hu biak rilo drei kalang, talei  cước gam tame. Bruk njauk menyai nan lac rilo urang kurang sahneng par kalang ala jalan talei điện, lõi cáp trần oh hu katak pacang veik nan ye dom bala pandik harao rah tabiak tuk kham mek kalang gam angaok talei. 

Ong Nguyễn Thành Ngôn, Phaok Yam ndok kỹ thuật  Cty Điện lực Bình Thuận brei thau, yaok thun Cty hu pathau khan ka an toàn jalan điện, dalam nan hu bruk oh brei par kalagn  ala jalan talei điện. Min, bruk ni jeng dok rah tabiak rilo, mbuan ba tal bala kan si thau hu

“Bruk par kalang ala jalan talei điện mbuan ba tal metai lahik song mbuan lahik điện, khat lahik prong dalam bruk  pabak  song parabha  điện. Talei kalang lac  pandap ba  điện, pagap yau  iku kalang ngak  meng  kim tuyến ye langiu di bruk ba tal bala dok ngak brei điện prah tabiak njauk urang par kalan song urang mek kalang gam tame jalan điện”

Par kalang  ala jalan talei  điện lac bruk pakauk oh brei ngak song njauk  phạt  meng  1 – 5 triệu đồng tui  Nghị định 134/2013 di rajaei tabiak bruk tong phạt ngak suan gah điện lực, siam mekre binek  thuỷ điện, pandar  điện patak pataom song kein lagaih. Urak ni, kayua pphun jien buh tame ngak abih rilo nan ye  di  Bình Thuận bahrau hu  12%  dom jalan  điện trung thế 22kv hu kanduh pacang. Bruk par kalang ala dom jalan talei điện oh hu kanduh pacang di dom labik njauk padeih jip  piah khik siam mekre salamat ka bhap bini jang yau an toàn jalan điện./. 

Urang lang: Hanipha- 6/5