Gha phun phuong tuk tak trun di Sang bac THPT Nguyễn Du, Q10, TPHCM

Hadei di bruk pandik harao rah tabiak di sang bac THCS Bạch Đằng, gru Huỳnh Thanh Phú, Hiệu trưởng sang bac THPT Nguyễn Du, Quận 10 –TPHCM brei thau, sang bac hu pah menuac gah lingiu tame tak klaak phun phượng, kaoh cakak dhar 3 phun bàng praong, taha tui panuac kakei di urang jakar. Min oh lac buac tal gha yau rilo sang bac karei daok ngak, sang bac ini brei khik veik gha phun phượng piah ka nyu tamuh caduk, tabiak hala, daok meyah nyu oh tamuh veik ye brei pala phong lan atau bông giấy, quỳnh anh pabak tagok veik piah ngak brei mekre mblang sang bac

 “Mboh damen lo nan ye caik veik gha ka nyu tamuh veik. Daok meyah nyu oh tamuh ye drei pala phong lan ataupabak tagok veik ka nyu mekre mblang sang bac. Drei tal bo mek abih gha tagok ye lubang nyu praong lo, ngak brei samu veik abih rilo jien. Di labik glaong 3m lac khik hu siam mekre salamat ye, tui iek jeng mbuan”    

  Urak ini Cty Mblang bein Phun hijao TP.HCM daok khik ramik jaik 88.000 phun. Dom phun hijao hu công ty khik ramik, iek glang, kaoh cakak dhar njauk tui tukvak ba tabiak saong hu po đầu tư pasang iek yaok bilan.. Bruk kaoh, cakak dhar, pasang iek phun hijao hu peih tabiak ngak meng kaok thun saong dahlau di bilan hajan rabuk yaok thun piah trun takik bala meng phun hijao. 

Ong Hứa Văn Sắc, urang hu labaih 30 thun kak kajap haong phun hijao tuk daok ngak bruk di Cty  Mblang bein Phun hijao TP.HCM brei thau, yaom lac hu rilo ilamu tal halei jeng oh meng meta maong bo thau hu ruak di phun. Kayua lac, labaih 30 thun dalam bruk, ong Sắc brei thau ong gaok rilo phun hijao siam min kreih phun atau dalam gha nyu bruk abih. Kayua yau nan ye, tui ong Sắc, drei tok pacang caga meng bruk kaoh cakak dhar gam gam saong sahneng mboh dahlau piah hu jalan langyah. Min tui ong Sắc, bruk dom sang bac brei tak, kaoh abih phun hijao, abih di nyu lac phun phượng dalam mblang bein sang bac yau tukvak tapa lac bruk oh njauk ngak. Dalam tuk phun hijao dak harei dak takik ye sa mbang sang bac oh hu phun hijao dak ngak ka nyu mboh drut drui. Ngan saong dom phun pala bahrau, lingiu di phun phượng, meda pala phun bàng atau phun viết… piah khik hu salamat jang. Anak meta, piah khik siam mekre, salamat, dom sang bac meda kaoh cakak dhar saong ngak gheng pandok meng pasei vil val phun ka nyu lagaih:“Ngak gheng pandok ka phun yau nan gam khik hu salamat gam khik hu hijao, halui ka sang bac. Urak ini sang bac halei jeng tak, kaoh abih, mboh biak damen, biak pandik harao. Rilo phun mboh daok siam min ala gha di nyu yau habar drei oh thau hu, langik siam oh hagait min ngin rabuk oh thau dahlau hu.”

Phó Yam ndok Sở Xây dựng TPHCM Huỳnh Thanh Khiết brei thau: Sở ini oh sahneng tal bruk brei tak, kaoh abih phun dalam sang bac: “ Kol dahlak brei pasang iek duah thau bruk mbuan jaoh jaleih halei oh di dom phun hijao ini, hadei di nan meng brei kaoh cakak dhar khik ka phun dang kajap, oh sahneng tal bruk tak klaak abih phun hijao bo kol drei abih rilo prein yava jak ba rahra, cei gru, nai gru, anek saih pala dalam tukvak tapa.”

Ndom ka jamriak meda maong tapa phun hijao piah pasang iek, samar mboh phun bruk ye ong Huỳnh Thanh Khiết brei thau, Sở Xây dựng oh ka sahneng tal bruk pablei dom jamriak nan. Kayua tui pathau khan di dom gah chức năng ye “oh ka mboh cambaih siam lagaih di dom janih jamriak ini” saong oh pandar hu jamriak ini piah pasang iek taong abih phun hijao di ban raya HCM.

Dalam tuk nan, ong Trần Viết Mỹ, akaok kapul ilamu Kỹ thuật Lâm nghiệp TPHCM mboh lac, yaom lac hu bruk pandik harao rah tabiak min jhui mboh yau nan bo tak klaak dom phun phượng dalam mblang sang bac kayua ini lac janih phun oh mbuan jaoh jaleih meyah labik pala lagaih saong janih phun ini nyu kak kajap haong rai anek saih. Ong Mỹ brei thau, phun phượng lac phun hu gah dalam, phun khang kajap, dhar phun praong pacang halui rilo min nyu diuk oh lavik . Bruk njauk biai nan lac di dom ban praong, mblang sang bac bhian hu ngak meng xi măng nan ye pacang gha tamuh ba tal mbuan jaleih. Kayua yau nan ye, ong Trần Viết Mỹ caong lac salih ka bruk tak kaak abih, njauk kuhri kuhria kanyu tani tanat labik halei lagaih ye pala, saong njauk caik tabiak sa mblang taneh piah ka phun tamuh praong, gam haong nan, lac dom bruk ngak gam gam yau ye kaoh, cakak dhar: “Hu bruk suan di labik ini lac maong iek veik meng jalan pala, jalan iek glang. Nan ye jhui kayua 1 phun jaoh jaleih bo tak klaak abih phun atau cakak abih dhar daok veik phun saoh, maong oh jeng.”

Mboh lac, dalam tuk ban raya TPHCM dak harei dak kurang phun hijao pcang halui ye duah jalan ngak yau habar piah gam khik hu siam mekre salamat ka sang bac, gam khik hu phun hijao lac bruk praong bo dom sang bac saong dom gah pambuak tal njauk kuhri kuhia, sahneng duah./.

Urang lang: M.Phương - 14/6/2020