Kapul dam dara pajeng tui loa papar sap nao tal yaok jalan di dom puk palei dalam xã Cư Dliê Mnông, huyện Cư Mgar, tỉnh Đắk Lắk 

Meng puac bilan 7 tal urak ni,  oh kuhria langik pandiak atau hajan, dom sruh radaih di kapul dam dara pajeng tui loa papar sap nao tal yaok jalan praong sit di dom puk palei dalam xã Cư Dliê Mnông, huyện Cư Mgar, tỉnh Đắk Lắk piah pathau khan, pacang caga jit Covid -19. Saai Y Diu Ktla, daok di puk Brah, xã Cư Dliê Mnông khan lac, yaok harei, meng maong 6 tal maong 8 mesup saong meng maong 4 tal maong 6 biar harei, dom sruh radaih pajeng loa nduac radei radei di dom jalan  dalam puk, papar sap dom kadha pato tacei bruk pacang caga jit meng sap Êđê. Tapa nan, di puk Brah, meng urang taha tal uranaih jeng thau saong hadar kanal dom jalan pacang caga jit yau ye bhian rao hacih tangin, ngak hacih saat sang danaok, labik daok, cuk pataih pacang pambah tuk tabiak langiu sang saong di labik hu rilo manuac.

Saai Nguyễn Hữu Ân, Bí thư đoàn xã Cư Dliê Mnông brei thau, dahlau dieh kapul dam dara tok khan brei thau meng ba-ar tờ rơi, ba khau tin tagok mạng xã hội di kapul dalam dara. Kapul dam dara xã jeng hu pandar loa kéo di động min tok pataom di labik pasak xã. Meng tuk jit ruak tamuh tabiak viek di puac bilan 7 meng blaoh saong mboh hu dom urang ruak di Đắk Lắk, kapul dam dara hu patagok bruk pandar radaih mac pajeng loa dui nao tal yaok puk palei piah khan brei thau. Ngan saong 11 palei saong 5 puk mikva bangsa Êđê, dom kapul hu 2 urang hu salih gauk nduac rah tui dom jalan di var page saong var bier harei yaok harei. Dalam nan, di dom puk, asal kadha khan brei thau hu lang tapa sap Êđê piah daong ka mikva thau cambaih jang: “Bruk khan brei thau meng loa di động ye mboh lac biak siam lagaih kayua nyu nao tal yaok jalan yaok puk palei, tuk nan bhap bini thau hu cambaih laih saong samar drah jang. Khan brei thau meng 2 sap, sap yuan di dom palei saong khan brei thau meng sap Êđê di dom puk. Dalam dom kadha khan brei thau di kapul dam dara xã ye mada hu pilih ruah khau tin piah khan brei thau, tapa nan mboh mikva bhap bini thau samar drah, siam lagaih jang”.

Meng jalan ngak dreih yau nan, kapul dam dara xã Vụ Bổn, huyện Krông Pắk hu nao pathau khan di taong abih 28 puk,palei dalam xã. Sa-ai La Văn Giang, Bí thư đoàn xã Vụ Bổn brei thau, dom kapuk khan brei thau nao jeng nyaom meng radaih mac khan brei thau yaok harei  2 mbang di tuk page saong bier harei. Khau tin lưu động daong ka bhap bini thau  kajit ruak, kakei bhap bini ngak njauk bruk daok paatah di gauk, thau makna praong glaong di bruk khan y tế, pato tacei bruk yaih khan, ba tabiak jalan ka bhap bini klah rabha khau tin ka jit Covid 19 di mangaok mang, oh klah rabha dom khau tin oh njauk, ngak ka manuac sia suh sah hatai. Saai La Văn Giang ndom lac: “Yaok harei dalak ngak 2 blah khau tin ka bruk khan brei thau tui dom harak pato tacei di UBND xã saong dom harak di pakat angaok dalam bruk pacang caga jit saong papar sap di mangaok loa di xã sa harei 2 mbang. 2 kapul khan brei thau nao tal dom puk palei dalam xã, nao khan brei thau meng phát tờ rơi saong brei pataih pacang pambah oh mek jien ka bhap bini di dom darak pasa, labik hu rilo manuac gam saong bruk, kakei bhap bini cuk pataih pacang pabah di dom labik hu rilo manuac”.

Di xã Cư Pơng, huyện Krông Buk, gam haong pathau khan ka jit ruak Covit 19, dom urang đoàn dam dara daok hu pathau khan ka jit ruak bạch hầu saong ruak pandiak tabiak darah. Tui saai Y Hlý Niê Kđăm, Phó bí thư kapul dam dara xã Cư Pơng, kapul khan brei thau di xã jeng lac kapul ngak bruk xã hội yau nan ye mbuan lagaih tuk ba tabiak dom bruk ngak. Meng 30 urang hu mbaok gam gam saong rilo urang halain hatain lac dom anek saih pakat 2, meng puac bilan 7 tal urak ni, kapul hu parabha sit jeng dom nyaom piah nao khan brei thau di 18 pul, palei dalam xã. Yaom lac rilo harei tapa, langik oh lagaih, hajan rilo harei nan ye ngak ka dom  jalan gluh baok biak kan nao min yaok harei dom nyaom ini  jeng khik bruk khan brei thau, nao tal yaok jalan, yaok baoh sang bhap bini.

Meng jalan pathau khan mbuan lagaih saong dom pandap panda bhian randap, min meng kham merat abih drei, dom kapul pathau khan aw hijao  di Đắk Lăk hu rik prein tame bruk mesuh pacang Covid-19 di dom puk palei dalam tỉnh./.

Urang lang: Thu Thảo – 17/08