Kapul urang daong duah urang njauk bala halar hatian 

Jaik 5 bilan meng tuk rah tabiak mbang khuah, sang sa-ai Phạm Văn Phương daok di tổ dân phố Đăng Gia Rít B, bal sit Lạc Dương, huyện Lạc Dương jeng daok kanal hadar bruk daong veih abih drei di dom urang halar hatian, Kapul urang pacang khuah padam khuah, daong veih urang njauk bala di dom urang dahlau diah ngak bol lin bal sit Lạc Dương. Sa-ai Phương brei thau, meyah oh hu kapul, ye taong abih drap ar di dua diuk pasang njauk apui mbang abih: “Jeng patuah hu Kapul urang pacang khuah padam khuah di bal sit, meyah oh hu ye apui nyu mbang taong abih labik ini oh ta-eng hagait baoh sang dahlak”.

Oh lac tok daong ka bhap bani dalam huyện Lạc Dương, Kapul pacang khuah, pdam khuah, daong veih urang njauk bala bal sit Lạc Dương daok hu mbaok tame daong ka urang njauk bala di rilo puk palei karei dalam tỉnh, daong ka tuai damuai tuk gaok kan kandah atau nao suan jalan dalam glai. Ong Nguyễn Phục Quốc, sa urang dalam kapul pacang khuah padam khuah, daong urang njauk bala bal sit Lạc Dương khan lac, dom urang dalam kapul ngak bruk pahla, halar hatian, oh kuhria harei melam:“Hu rilo tuai damuai nao tame glai ma-in blaoh van jalan tabiak, gar veik dalam nan, rilo urang oh thau jalan ye dom adei sa-ai dalam kapul brei manuac nao daong oh huac kanda melam dam. Kapul tuk halei jeng hu urang daok caga piah daong manuac sia saong tuai damuai min oh mek jien padai hagait”.

Hadei di jaik 3 thun padang tabiak, Kapul pacang khuah padam khuah saong daong ka urang njauk bala bal sit Lạc Dương gam haong Cảnh sát pacang khuah padam khuah tỉnh samar drah daong hu labaih 10 bruk, daong ka rilo menuac, peih yaok rituh mbang pathau khan ka bruk pacang caga khuah patuh tal bhap bani.

Urang dahlau diah ngak bol lin Đặng Ngọc Hiệp, urang padang kapul pacang khuah padam khauh, daong ka urang njauk bala bal sit Lạc Dương ndom lac: dom rik daong biak ghieh biak siam ka bol bhap rahra hu jeng pren khang piah ka ong saong dom urang dalam kapul hu mbaok tame rilo bruk ngak pah la karei.“Tuk camereip dahlak mboh bruk ini mbuan ba tal metai lahik kayua nyu pambak tal rup babhap di drei. Abih di nyu lac melam mai meyah hu hajan ribuk, aia sua ye dahlak jeng hu mbaok. Diuk anek dahlak jeng hu ndom, min hadei di tuk mboh dahlak hu mbaok tame dom bruk ngak biak hu makna ye hadiuk anek jeng pachreih tui. Langiu di bruk pacang khuah padam khuah, daong ka urang njauk bala ye dahlak jeng hu mbaok dalam dom bruk ngak pah la karei”.

Meng tuk bahrau padang tagok tok hu 10 urang,  rilo meng lac urang dahlau ngak bol lin, tal harei ini kapul halan hatian ngak bruk pacang khuah padam khuah bal sit Lạc Dương hu prong khang jang 5 mbang, ngan haong  64 urang. Dom bruk ngak hu makna di Urang dahlau diah ngak bol lin dalam kapul jang yau taong abih Kapul halan hatian pacang padam khuah, lingiu di bruk brei mboh hatung hatai siam gheih di bol lin Wa Ho, bo daok rik daong tame bruk pachreih ba, pambak prong bruk halan hatian daong ka bol bhap rah ra, tapa nan, gam haong đảng bộ karja puk palei ba Lạc Dương cak rok patagok./.

Urang lang: Jasi-24/8