Labik rivang main Một thoáng Việt Nam hu tabiak veik hadei di 1 tuk vak atah brei padeih piah ramik ngak pasiam veik

Parang iek "Ðảng drei biak praong glaong" lac bruk hu makna praong piah pahadar 91 thun Harei padang Ðảng CSVN saong salam uan nyaom roya pakat negar mbang ka XIII di Ðảng bahrau peih tabiak di Pasak Parang iek ilamu nghệ thuật Việt Nam (Hà Nội). Hu peih tabiak di sa labik praong, parang iek hu yaih khan ka sajarah di taneh ia ngan saong dom vaktu hadah tanyak dalam bruk meblah mek độc lập, tự do, dak padang, khik caga taneh ia ala bruk pan akaok ba jalan di Ðảng Cộng sản Việt Nam. Tapa parang iek, urang hu mboh dom jak jeng di taneh ia tapa dom saman, meng nan thau cambaih jang ka bruk naih gheih saong bruk pan akaok ba jalan di Ðảng.

Kapul FLC pambuak haong UBND tỉnh Quảng Bình bahrau peih bruk padang ngak hotel song pasak nyaom biai pakat dunya di xã Hải Ninh, huyện Quảng Ninh. Dok dalam labik di FLC Quảng Bình, hotel FLC Grand Hotel Quang Binh hu 2 hotel praong, glaong 12 tal, hu 500 balik 5 patuk hu ginup abih dom janih yau: labik caluai ia, dom labik mbang menyum tanut dunya, sân khấu langiu langik … Pasak nyaom biai dunya FLC Quảng Bình hu hội trường prong jiak 1.200 labik dok song dom balik chức năng. Hu padang ngak tui jalan bahrau, labik ini lac labik ka dom bruk ngak prong yau nyaom biai, ilamu, daoh tamia praong di anak tal. 2 danak dak ni tui kuhria hu ba tame pandar di puac thun ni

Piah pabak bruk nao mai di tuai damuai dalam tuk Tết thun sak kubao 2021, Cty Par dịch vụ Kapal haoh (VASCO) – sa jabat di Vietnam Airlines brei peih veik jalan par di Thành phố Hồ Chí Minh haong Rạch Giá (Kiên Giang) meng harei ini 18/1/2021. Tui nan, jalan par ini hu VASCO brei par 5 mbang dalam 1 adit, meng sruh kapal haoh ATR72 saong yaom meng 590.000 đồng sa mbang par nao, yaom nan hu kuhria gam jien je, jien karei karei.

Labik rivang main Một thoáng Việt Nam hu tabiak veik hadei di 1 tuk vak atah brei padeih piah ramik ngak pasiam veik. Labik rivang main hu padang ngak angaok taneh prong 20ha di huyện Củ Chi (TPHCM), phun jien buh tame ngak labaih 400 tỷ đồng. Lac bhum taneh glai bak mbom, gluh baoh dahlau daih, labik ini urak ini hu padang ngak yau sa taneh ia Việt Nam pataom sit veik ngan song dom ilamu siam gheih hu ginup dom labik meng bhum taneran Bắc bộ tal gah kreih negar, Tây Nguyên, bhum kraong ribaong miền Tây.

Mesup 18-1, CA Bình Thuận brei thau lac daok pasang iek, duah thau bruk paoh gauk di radaih container haong radaih patuh di jalan roya 1. Bruk njauk biai nan lac, hadei meng paoh gauk, urang metai njauk radaih container hua angaok jalan jaik 60km meng thau. Tapa duah thau mboh lac, melam 17-1 sruh radaih container tual biển số tỉnh Tiền Giang kayua Bùi Minh Tùng (49 thun, palei daok di Tiền Giang) peih tui jalan Nam - Bắc. Tuk tal labik canah klau tatua Nam, xã Hòa Minh, huyện Tuy Phong, Bình Thuận, radaih ini haong radaih patuh kayua sa-ai Trần Đức Vân (45 thun daok di xã Hòa Minh) peih gah anak radaih container saong daok caga tapa jalan. Radaih container paoh tame ngak brei sa-ai Vân metai chip saong gam di ala radaih container. Hadei di tuk paoh blaoh, radaih container daok peih tui jalan tabiak Ninh Thuận. 

Abih tih 447 urang gaok kan kandah ka pren yava dalam 2 harei tapa hadei di tuk Ấn Độ peih bruk klauk vắc-xin caga Covid-19. Tui mintri Y tế Ấn Độ, tong abih dom urang gaok kan kandah ka pren yava tal urak ini mboh dalam rup pandiak, pandik akaok song taglaoh taaok …. Tal urak ni hu 2 urang tame sang iek ruak song 2 urang ini daok hu tui iek catang. Kuhria tal harei kabroi, abih tih hu labaih 224.300 urang di Ấn Độ hu klauk vắc-xin pacang caga Covid-19.

Tui yaok pataom di Viện Y tế Negar Bỉ, kuhria dalam 1 adit jaik di ini, dom menuac njaom COVID-19 di Bỉ jeng hu labaih 2.000 urang sa harei, daok menuac metai kayua COVID-19 dalam 7 harei tapa lac labaih 50 urang sa harei. Anak bruk njom vi rút daok tagok khang yau urak ini, rajaei liên bang Bỉ brei khik veik dom jalan pacang caga jit biak catang yau ye kreik pabah mbang taong abih dom labik pablei pandap mbang menyum, kuan kafe, kuan bar; khik bruk giới nghiêm meng mon 10 melam tal mon 6 mesup… saong dom jalan pacang caga jit ini hu khik veik mbiah tal harei 1/3/2021, oh lac harei 15/1 yau dahlau daih hu khan blaoh. Kuhria tal urak ini, jaik 50.000 menuac hu klauk caga COVID-19 di Bỉ.

Huac ka dom bruk njom mbak tagok glaong, lahik laba song mbuan si njauk pacang cakak, karja dom tỉnh ban song sang mac prong di Trung Quốc hu ba tabiak rilo jalan dong piah khik takai urang ngak dok veik dalam tuk Tết Nguyên đán. Dom bruk daong bo dom tỉnh ban hu ba tabiak nan lac bayar jien bilan rilo jang, jien thưởng, dom bruk main sambai, payak mbang taom mbaok melam puac thun saong ramik harei brei padeih veik hadei./.

Urang lang: M. Phương – Hani Pha – 18/01/2021