Talei sang 3 duk bac di phân hiệu 2 – Sang bac tiểu học Cư M’lan di palei Bình Lợi, xã Cư M’lan, huyện Ea Súp bahrau hu ba tame pandar di akaok thun bac 2017 – 2018 hu daong ka anai gru saong anek saih sang bac oh daok glaih glar nao 4-5 km piah tal sang bac praong. Công trình padang ngak hu lac kayua dom urang đoàn, dam dara di Kapul ngak bruk xã hội – dam dara Ea Súp dang tabiak padang ngak meng phun jien daong di dom urang ngak pahla dalam saong langiu tỉnh. Meng yaom jien 1 tỷ đồng, langiu di 3 duk bac ngan haong haong bàn kik njauk tiêu chuẩn umo tiểu học, daok hu 2 duk vệ sinh saong sa baoh bingun aia hacih piah pandar ka gru pato saong anek saih. Anai Nguyễn Thị Tuyết, gru pato sang bac tiểu học Cư M’lan brei thau: “Dom adei nao bac biak kan kandah, hu adei sang daok atah di sang bac tal 4-5km, jalan nao kandah kande. Rilo mbang kol dahlak mboh dom adei sit tal bac 1 dui tangin gauk nao takai angaok jalan janal, labuh khan ao bak gluh, mong mboh anit dom adei ralo. Meng harei phân hiệu 2 di sang bac di palei Bình Lợi hu dom urang ngak pahla saong Kapul ngak bruk xã hội – dam dara Ea Súp padang tagok, bruk nao bac di dom adei hu siam laghaih jang, nao bac chreih chai jang”.

Tui jalan ngak lac “Dam dara halar hatian brei ka rai diuk di bhap bani”, pataom tame gah bhum atah bayah, bhum tapen negar saong bhum biak kan kandah; dom urang di Kapul tuk halei jeng duah bruk saong peih ngak dom dự án, dom công trình daong langyah dom kan kandah di bhap bani, di uranaih dalam huyện, pandar siam lagaih phun jien daong brei meng dom urang ngak pahla. Dom bruk ngak hu ngak jeng angan je di Kapul saong hu pambak prong dalam tỉnh yau: “Sang bac anit ranam”,  “Aia hacih anit ranam”, “Bánh chưng hijao”, “Mblang ma-in uranaih”... Lac urang daok dalam Kapul ngak bruk xã hội, ayut Y Khămta Niê brei thau biak uan tabuan ka dom hagait drei ngak hu: "dahlak mboh dom bruk ngak di Kapul biak hu yaom, kadung dui manuac urang mai jaik veik  haong gauk, patrun khoảng cách không gian jeng yau giới hạn kaya meda kathaot rambah. Tuk hu mbaok tame Kapul ngak bruk xã hội, adei mboh rai diuk di drei hu yaom jang saong caong khin ngak hu ralo bruk siam jang ka xã hội, ka bhap bani.”

Lac urang dang tabiak jak ba, urang dang tabiak peih ngak ka dam dara hu mbaok tame dom bruk ngak halar hatian saong pambuak dom kapul nyaom pahla mai haong bhum kan kandah, sa-ai Lê Hồng Hạnh, urang dang akaok kapul ngak bruk xã hội – dam dara Ea Súp brei thau, tapa jaik 5 thun peih ngak tal ini, kapul hu 50 urang bhian hu mbaok saong jaik 2.000 urang daong bruk. Yaok urang nan biak kham merat abih hatai jai dalam bruk ngak brei ka bhap bani. 

  Meng bruk ba akaok nao dahlau di dam dara urang daok ranaih, hatai pahla di yaok urang, dom urang dalam kapul ngak bruk xã hội – dam dara Ea Súp, huyện Ea Súp, tỉnh Đak Lak jeng daok  rik daong haong puk palei sangka daong ba dom urang kan kandah yam tagok dalam rai diuk./.

Jasi lang tapa sap Cam