Urang halei tame tabiak hu dut iek pak di labik 

Halan hatian tame bruk pacang jit dịch di ban raya meng akaok bilan 5 tal ini, haong hatai caong khin ba siam mekre ka labik mboh medil lac hu menuac njaom ruak, hu urang pambuak tal F1, F2, sa-ai Trần Huy Đăng (Q.Bình Tân, TP.HCM) – akaok kapul halan hatian BDS – hu buh jien kadung tabiak blei jamriak pruh jru pametai anek ruak, blei ia jru Cloramin B, daong pruh jru pametai anek ruak brei saoh ka mikva daok di dom labik mbuan njaom mbak glaong. Kuhria tal harei ini, kapul hu pruh jaik abih dom phường dalam quận 10, dom labik daok karei pataom gauk, labik mbuan njaom mbak glaong di dom quận huyện karei.

Sa-ai Đăng khan lac: Bruk ngak ini biak mbuan gaok bala saong glaih glar kayua bình pruh jru biak trak (jaik 30kg) saong bhian nao tame dalam labik hu jit, min sahneng tal bruk ba tangin tame haong bhap bini ye adei sa-ai kol dahlak pachreih gauk nao. Meda lac tuk hu panuac ieu daong di karja ye kol dahlak nao, oh lac harei atau melam”.

Urang dang akaok phường 12, quận 10 jeng brei thau: "Oh lac dahlak bo bhap bini daok pak ini biak thau dhar phor bruk halan hatian ngak pahla di kapul". Sa-ai Trần Thanh Ngọc – Phaok akaok UBMT negar Việt Nam quận 10 – khan lac: "Meng tuk tamuh jit mbiah tal harei ini, sa-ai Đăng haong kapul halan hatian hu daong ka quận biak rilo. Sa-ai bahrau daong 500 triệu đồng jien blei jamriak, pandap y tế ka quận, ini lac kapul pruh jru pametai anek ruak brei saoh, oh mek jien. Bhap bini quận 10 thau labik drei daok hu pruh jru pametai anek ruak nan ye rilo menuac buai sambai lo, sa-ai haong abih gauk dalam kapul oh mek hagait, nao tal halei mikva jeng anit ranam".

Urak ini kapul hu labaih 20 urang hu mbaok dalam kapul halan hatian pruh jru pametai anek ruak. Sa-ai Nguyễn Hoài Hận brei thau: "Ini lac bruk ba mai rilo bui sambai haong hu makna. Jeng uan anek lo, min drei uan ye drei caik dalam hatung, diuk kamei bahrau ndih tapui anek hu dom bilan jeng mboh anit lo, min patuah sang drei urang halei jeng pachreih tui bruk drei ngak. Urak ini tok caong ka nyu samar abih jit piah mai sang haong diuk anek". Rilo adei sa-ai daok di Long An, Tiền Giang... tagok ban raya HCM tame kapul. Dom urang ini ndih taphia gauk dom bilan ini mai, urang halei jeng hu diuk anek min oh khin nao sang kayua daok hu jit saong menuac sia daok caong hu drei. Hu thau, sa-ai Đăng hu buh tabiak jaik 800 triệu jien kadung piah blei jamriak, mac moc, jru pruh tui tanut ba tabiak di Mintri Y tế. Sa-ai jeng hu tacei pato tapak ka adei sa-ai thau bruk lai jru saong pruh jru ka nyu njauk. Dalam tuk kadung jien karja daok takik ye bruk daong prein, daong jien meng dom menuac halan hatian yau sa-ai Đăng saong dom urang dalam kapul pruh jru pametai anek ruak ini, hu rik daong tame bruk samar jhul kadun likuk jit ruak./.

Urang lang: Mosaphương -4/7