Meng ilamu siam mekre di urang lin meng kan, dom urang dahlau daih ngak bol lin ban sit Phước Long, tỉnh Bình Phước daok patagok pren khang di drei dalam tukvak patagok kinh tế - xã hội, daok rik daong hu siam tame bruk patruh eik patrun kathaot, dak padang Bình Phước dak harei dak kaya meda. Đoàn Sĩ urang vak di rayo sap ndom VN daok di ban raya HCM hu kadha vak “Kapul urang dahlau daih ngak bol lin ban sit Phước Long patagok ilamu Bộ đội wa Hồ”.

Urang hội Điểu Minh Đoàn daok di palei 7, xã Long Giang, ban sit Phước Long, tỉnh Bình Phước dahlau daih daok dalam baoh sang hala taik tahak saong sa ha taneh bein. 7 urang dalam baoh sang oh hu bruk ngak tani tanat. Hu bruk pachreih ba di kapul urang dahlau daih NGAK BOL LIN ban sit Phước Long, thun 2011, ong hu mesraiy 35 triệu đồng meng kadung jien di kapul piah blei 2 drei limo saong 600 phun pajaih cao su. Hadei di 6 thun tari tarieng ngak mbang, tal urak ini ong padang ngak hu baoh sang khang kajap, pala hu 8 sào cao su. Yaok thun mek jien tame yaok pluh triệu đồng. Ong Đoàn brei thau: “Hu bruk daong ba di kapul pakat angaok brei mesraiy jien blei limo, blei pajaih cao su, tal urak ini sang hu tani tanat. Urak ini hu radaih, hu sang, anek bhik hu nao mbang bac  Likau ndua dhar phon KAPUL pakat angaok daong ka sang dahlak luac tukvak tapa”.

Kapul urang dahlau daih NGAK BOL LIN ban sit Phước Long oh lac daong phun jien, ANEK PAJAIH, phun pajaih, khak drak, jru halak, bo daok sangka daong ngak sang “Nghĩa tình đồng đội” ka dom urang hội kan kandah ka sang daok. Dalam 5 thun tapa (2012-2017), hội hu jak ba rik daong padang ngak 16 baoh sang, yaom labaih 500 triệu đồng. Baoh sang urang hội Nguyễn Thanh Phương daok di khu phố 9, phường Long Phước, ban sit Phước Long tame padang mbang ngui dalam tỉnh Bình Phước di thun 2010. Tuk nan kan kandah ka sang daok, rai diuk jeng biak rambah rambup. Thau bruk kan kandah di baoh sang ong, kapul urang dahlau daih ngak bol lin ban sit Phước Long hu jak ba dom urang hội saong dom urang ngak pahala daong baoh sang ong 30 triệu đồng piah padang ngak sang “Nghĩa tình đồng đội”. Meng nan sang ong Phương hu sanang hatai padang mbang ngui. Ong Nguyễn Thanh Phương chreih chrai lac: “Hu bruk sangka daong ba di kapul pakat angaok, gam saong cơ sở pakat ala, ayut sahabat sangka daong ka dahlak padang ngak sa baoh sang piah hu labik daok. Tal urak ini rai diuk hu tani tanat”.

Tui jalan ngak lac “brei gai vah siam jang brei drei ikan”, tukvak tapa, kapul urang dahlau daih NGAK BOL LIN ban sit Phước Long hu pambuak gam saong dom urang hội kan kathaot, daong ka dom urang hội ini patagok sản xuất, yam tagok meng pren di drei. Ong Phạm Khoa Nam – phaok akaok kapul urang dahlau daih ngak bol lin ban sit Phước Long, tỉnh Bình Phước brei thau:  “Dom urang kan kathaot saong jaik si kan kathaot bo hu tư liệu sản xuất, hu pren ngak mbang tok kurang phun jien ye kol dahlak ieu pataom phun jien piah daong. Tal urak ini duk saong bruk hu ba tabiak ye lac ngak salah. Daok palahik sang taik tahak jeng lac ngak tui jalan nan, drei ieu pataom phun jien oh bayar veik, kol dahlak palahik hu 16 baoh sang. Urak ini, sang meng tang krem dalam hội oh daok tra”.

Tui jalan ngak lac meng pren khang di drei, paglaong tinh thần đồng đội, daong ba gauk, kapul urang dahlau daih ngak bol lin ban sit Phước Long hu ieu pataom yaok nguồn lực piah daong gauk patagok kinh tế, yam tapa truh kan kathaot. Tapa nan, mboh hu ralo bruk ngak, jalan ngak ghreih. Yau bruk “kaquan brah anit ranam” di mban liên lạc urang kamei dahlau daih ngak bol lin ban sit Phước Long. Yaom lac barau hu meng thun 2015, bruk ngak ini pachreih hu ralo urang kamei dahlau daih ngak bol lin hu mbaok tame daong jien, daong pandap. Tal urak ini, ieu pataom hu labaih 3 tấn brah saong 14 triệu đồng daong ka ralo adei saai urang kamei dahlau daih ngak bol lin lac urang hội kan kandah yam tagok dalam rai diuk. Amuk Trần Thị Minh Cúc – akaok mban Liên lạc urang kamei dahlau daih ngak bol lin ban sit Phước Long, tỉnh Bình Phước brei thau: “Dalam mesruh metak adei saai rambah rambup ye, urak ini daong gauk hu yau ini lac biak siam. Sangka rivang sua gauk dalam dom tuk lễ tết, bloh tuk hu bruk ini bruk daih kan kandah drei jeng daong ka adei saai yau nan”.

Ndom ka dom bruk ngak di kapul urang dahlau daih ngak bol lin ban sit Phước Long, ong Nguyễn Hoàng Thái - Bí thư Thị ủy Phước Long, tỉnh Bình Phước brei thau: “Kapul tuk halei jeng nao dahlau dalam dom bruk ngak, ABIH DI NYU NAN lac bruk urang dahlau daih ngak bol lin daong ba gauk patruh eik patrun kathaot, palahik sang taik tahak dalam kapul. Gam saong dom tổ chức chính trị ngak siam dom danak dak pambuak gauk dalam bruk pataok pakai ilamu meng kan ka rai rah ranaih thau ka sajarah dak rai di taneh ia, di sa-ai bộ đội wa Hồ. Iek glang ka dom urang sarak karja di puk palei dak harei dak siam jang”.

Dom bruk ngak di kapul urang dahlau daih ngak bol lin ban sit Phước Long, tỉnh Bình Phước  dalam tukvak tapa hu rik daong klah rabha kan kandah ka urang hội, daong ka urang hu jalan yam tapa kan kandah, ngak kaya meda piah miat miat njauk saong ilamu “Bộ đội cụ hồ” , lac kreih camin hadah ka dam dara urang daok ranaih bac megru, ngak tui./.