Piah dui pachreih urang kamei bangsa takik hu mbaok tame dom bruk xã hội, dom thun tapa, kapul urang kumei tỉnh Tây Ninh jang yau huyện Tân Châu hu dom jalan ngak gheih yau: padang dom tổ mesre phun jien patruh eik patrun kathaot, klup kapul sang hacih bein mekre, tổ pambuak bruk ngak mbang… daong ka adei sa-ai kumei thau dom ilamu bahrau dalam raong glang saong pala drak, pasiam rai diuk, patruh eik patrun kathaot di puk palei.

Huyện Tân Châu hu labaih 85% lac bhap bani bangsa takik, ralo meng lac urang Chăm, Khmer, Tày, Nùng. Dom adei sa-ai kumei rlo meng bac da-a takik, rai diuk daok gaok ralo kan kandah, kurang ralo janih. Kayua yau nan ye, takik thau dom sarak di Đảng, hukum di karja. Piah dui pachreih urang jakar bangsa takik hu mbaok tame dom bruk ngak di kapul urang kamei, Kapul urang kamei huyện Tân Châu hu jhul pakhang dom bruk iek glang tal rai diuk di urang kamei bangsa takik, abih di nyu nan lac dom hội viên hu rai rai diuk kan kandah hu mesraiy phun jien, hu thau ilamu bahrau dalam bruk pala drak, raong glang; brei urang jakar saong hội viên nòng cốt nao rivang, daong dom hội viên, urang kamei tuk ruak kik, pandik harao… Meng dom bruk ngak siam nan hu daong ka dom adei sa-ai salih jalan saneng, jalan ngak dahlau diah di drei, hu mbaok tame sinh hoạt hội dak harei dak ralo.  Dalam huyện Tân Châu urak ini hu 11.830 hội viên, dalam nan hu 550 hội viên lac urang bangsa takik  sinh hoạt di 10 tổ hội urang kamei di huyện.

 Amuk Amina urang Cam – dahlau diah ngak phaok akaok Kapul urang kamei huyện Tân Châu, Ủy viên Ban chấp hành Kapul urang kamei tỉnh Tây Ninh nan lac urang kamei bangsa takik akaok meti saong lac urang hu labaih 20 thun kak kajap haong bruk ngak di kapul urang kamei. Nan jeng lac jalan ngak brei salih bahrau akaok saneng di ralo urang kamei bangsa karei dalam huyện. Urak ini yaom lac padeih hưu, min amuk jeng daok nao pathau khan dom sarak di Đảng, hukum di Karja tal urang kamei bhap bani drei; klah rabha ilamu ka dom akaok chi hội, akaok tổ urang kamei Cam di dom palei, dom xã hu ralo urang Cam daok; jak ba adei sa-ai hu mbaok tame hội. Kayua amuk thau lac, hu mbaok tame ngak bruk Kapul urang kamei jang yau dom bruk xã hội oh lac daong ka urang kamei hu thau ralo dom bruk chính trị, kinh tế - xã hội; bo daok peih tabiak jalan daong ka urang kamei hu mesraiy phun jien, hu thau dom dịch vụ, ba dom ilamu bahrau tame bruk ngak mbang pala drak.

Langiu di nan, kapul urang kamei huyện daok kham merat pambuak haong gah mặt trận, kapul njaom nao jak ba dom urang ngak pahla daong brei jien, vật tư piah padang ngak sang gul pataom, sang anit ranam ka dom hội viên kan kandah, urang kamei daok sa drei hu sang daok tani tanat. 3 thun ini mai, Kapul urang kamei jak ba padang ngak hu jaik 10 baoh sang gul pataom brei ka hội viên kan kandah; dom bruk giao lưu ilamo daoh tamia, padhih dak harei dak patagok, daong ka urang kamei bangsa takik gul pataom jang haong urang jakar Hội.

Adei Pha-ti-Hah daok di tổ 44, ấp Tân Châu, xã Tân Phú , huyện Tân Châu hu mbaok tame bruk ngak di kapul urang kamei xã Tân Phú meng labaih 1 thun ini mai. Tuk akok mereip, adei mboh daok huac kanda kayua sang kan kandah saong kayua dom adat cambat tanarakun di bangsa drei. Min tuk hu bruk sangka di Chi hội urang kamei xã Tân Phú, Kapul urang kamei huyện Tân Châu, adei kham merat hu mbaok tame dom tal pasram megru paglaong ilamu diuk rai, daok dang, pato bruk ngak. Taphia di nan, kapul urang kamei jeng hu daong brei ka adei mesre 20 triệu đồng meng phun jien vệ sinh môi trường di kapul urang kamei piah ngak bồn aia hacih, padang bein njam hacih, raong menuk tui jalan sinh học… patagok kinh tế baoh sang. Meng dom bruk ngak biak siam ini, adei pataom hu ilamu dalam rai diuk, meng nan adei jak ba hu 28 hội viên Cam dalam palei hu mbaok tame. Taphia di nan, adei Pha-Ti-Hah daok padang hu sa  klup kapul “sang hacih bein mekre” di palei Tân Châu.

Thun 2015 meng bloh, kapul urang kamei huyện Tân Châu padang hu 3 klup kapul urang kamei nan lac: klup kapul urang kamei pathau khan adat hukum, klup kapul sang hacih bein mekre, klup kapul baoh sang 3 hacih; pasiam pakajap 3 Chi hội urang kamei di 3 palei bhap bani Khmer dalam huyện, pachreih hu jaik 100 hội viên Khmer pak 2 xã Tân Phú saong Tân Thành hu mbaok tame. Langiu di nan, kapul jeng hu brei ka 20 baoh sang urang kamei kathaot hu mesre yaok baoh sang 20 triệu đồng meng phun jien vệ sinh môi trường di Kapul urang kamei piah ngak jaman, ngak bồn aia hacih... Mai meng nan, rai diuk di hội viên dak harei dak siam jang.

Anak tal, kapul urang kamei huyện Tân Châu brei patagok talei pambuak bruk haong Ban bangsa, Ban mặt trận negar huyện Tân Châu pakhang pakajap taong abih dom Chi hội urang kamei hu ralo urang bangsa takik sinh hoạt, daong ka dom adei sa-ai hu paglaong akaok sahneng, khang hatai jang dalam bruk padang rai diuk baoh sang di dei; patui jalan dui pechreih hội viên urang kamei tame sinh hoạt dom klup kalpul, tổ, nhóm piah paglaong ilamu di urang kamei di taong abih gah. Abih di nyu nan lac, sangka daong ba, langyah dom kan kandah ka dom adei sa-ai urang kamei bangsa… Amuk Nguyễn Thị Bình – Akaok Kapul urang kamei huyện Tân Châu brei thau: “Ngan haong bruk ngak di hội ye sa dalam dom đối tượng njauk sangka tal nan lac adei sa-ai kumei bangsa takik. Adei sa-ai thau hu saong ba drei tame cộng đồng blaoh, ye khaol drei patui veik daong ka adei sa-ai cak rok patagok jang. Dalam Ban chấp hành di tỉnh, huyện, xã abih di nyu lac xã hu ralo bhap bani bangsa takik ye jeng hu adei sa-ai urang kamei bangsa hu mbaok tame ban chấp hành. Anak tal, dalam Nyaom roya urang kamei dom pakat jeng hu pilih ruah ba urang kamei bangsa takik naih gheih tame ban chấp hành; paglaong akaok sahneng di adei sa-ai ngan haong rai diuk. Peih ngak quyền bình đẳng giới di drei meng dalam baoh sang saong langiu xã hội”.

Meng jalan ngak siam, gheih di Kapul urang kamei huyện Tân Châu, caong lac dalam tukvak anak tal, dom kapul nyaom  urang kamei dalam tỉnh meda salih bahrau bruk ngak, pachreih hu ralo nguồn lực prong nan lac urang kamei bangsa takik; rik daong tame bruk dak padang bhummi dak harei dak gul pataom, siam mekre, kaya meda./.